မဲခေါင်၊ ဖေဖော်ဝါရီ ၁၉
ဘန်ကောက်ရာဇဝတ်တရားရုံးက ဖမ်း၀ရမ်း စုစုပေါင်း ၇ စောင်ထုတ်ထားရပြီး ထိုင်းမူးယစ်ဆေးဝါး ဘုတ်အဖွဲ့က ထုတ်တဲ့ ဖမ်း၀ရမ်းအပါ စုစုပေါင်း ဖမ်း၀ရမ်း ၂၃ ခု ထုတ်ခံထားရတဲ့ မူးယစ်ရာဇာ မစ္စတာပရာနာဝစ် ပရာသွန် ခေါ် ကိုကဲ ဟာ မြန်မာရဲတပ်ဖွဲ့က ဖမ်းဆီးထားတဲ့ စိုင်းအောင်မိုင်းပဲဖြစ်ကြောင်း ထိုင်းဘက်က အတည်ပြုလိုက်ပါတယ်။
ဖေဖော်ဝါရီလ ဒုတိယပတ်အတွင်းက မြန်မာဘက် တာချီလိတ်မြို့မှာ လက်နက်ကိုင်ဆောင်ပြီး ဖုန်းအရောင်းဆိုင်ထဲ အုပ်စုလိုက်ဝင်ရာကနေ စိုင်းအောင်မိုင်းကို ဖမ်းမိတာဖြစ်ပြီး ထိုင်းနိုင်ငံဘက်က စိုင်းအောင်မိုင်းကို DNA နဲ့ လက်ဗွေလာစစ်ဆေးပြီးနောက်မှာ သူဟာ ပရာနာဝစ်ပရာသွန် ခေါ် ကိုကဲတယ်လို့ အတည်ပြုပေးခဲ့တာ ဖြစ်ပါတယ်။
ကိုကဲဟာ ထိုင်းနိုင်ငံ မူးယစ်ဆေးဝါးလောကမှာ အွန်လိုင်းပေါ်ကနေ ရောင်းချတဲ့အထိ ရဲတင်းပြီး လက်တံ့ကျယ် ပြန့်လွန်းတဲ့ ဂိုဏ်းစတားဖြစ်တာကြောင့် ထိုင်း မူးယစ်ဆေးဝါးဘုတ်အဖွဲ့ရဲ့ ဖမ်း၀ရမ်းမှာ ဆုတော်ငွေ ဘတ် ၁ သန်းအထိ ထုတ်ထားရသူဖြစ်ပါတယ်။
၂၀၁၉ ခုနှစ် အောက်တိုဘာလက ဆမတ်ပရာကန်ခရိုင်၊ ချိုင်ယာပရောက် အိမ်ရာကို ထိုင်းစစ်တပ်၊ ရဲနဲ့ ငွေကြေးခဝါချမှုတိုက်ဖျက်ရေးအဖွဲ့တွေ အလုံးအရင်း ဝင်စီးနင်းပြီးရာမှာ ကိုကဲ ခေါင်းဆောင်တဲ့ မန်တွတ်မတ် ဂိုဏ်းသား ၄ ဦး ဖမ်းဆီးမိသလို ငွေသား ဘတ် ၁၈ သန်းအပါ၊ ကား ၉ စီးနဲ့ တခြား အသုံးအဆောင်နဲ့ မူးယစ်ဆေးဝါး စုစုပေါင်းဘတ်သန်း ၁၀၀ တန်ဖိုးရှိ ပစ္စည်းတွေကို သိမ်းဆည်းခဲ့ပါတယ်။
အဲဒီကတည်းက မန်တွတ်မတ် ဂိုဏ်းခေါင်းဆောင် ကိုကဲဟာ အိမ်နီးချင်းနိုင်ငံကို ထွက်ပြေးလွတ်မြောက်သွားပြီး အဲဒီကနေပဲ မူးယစ်ဆေးကွန်ရက်ကို ဆက်လက်ထိန်းချုပ်ပြီး ခိုင်းစေမှုတွေ လုပ်နေခဲ့တာဖြစ်ပါတယ်။
စိုင်းအောင်မိုင်းခေါ်၊ ပရာနာဝစ်ပရာသွန် ခေါ် ကိုကဲ ကို မြန်မာဘက်မှာ လက်နက်မှု၊ တရားမဝင်နယ်စပ်ဖြတ်ကျော်မှုတွေနဲ့ တရားစွဲမှာဖြစ်ပြီး ပြစ်ဒဏ်ကျခံပြီးတဲ့နောက်မှာ ထိုင်းဘက်အခြမ်းကို ပြန်လွှဲပေးမယ်လို့ သိရပါတယ်။
Ref: MAESAIPRESS
