မဲခေါင်၊ ဧပြီ ၂၆
ကရင်ပြည်နယ် ၊ ဖာပွန်အခြေစိုက် စစ်ကောင်စီ ခမရ-၄၃၄ တပ်ရင်းကို ကရင်အမျိုးသားလွတ်မြောက်ရေးတပ်မတော် (KNLA) နဲ့မဟာမိတ်ပူးပေါင်းတပ်တွေက ဧပြီ ၂၄ ရက်မှာ တိုက်ခိုက်သိမ်းပိုက်နိုင်ခဲ့တယ်လို့ သိရပါတယ်။
သိမ်းမိတဲ့ စစ်ကောင်စီစခန်းမှ လက်နက်ခဲယမ်း အမြောက်အများရရှိခဲ့တယ်လို့ ကရင်အမျိုးသားအစည်းအရုံး (KNU) က ထုတ်ပြန်ပါတယ်။
“ လုပ်ငန်းရဲ့ လုံခြုံရေးအရ ရှေ့ဆက်လုပ်ဆောင်သွားမယ့် လုပ်ငန်းများအပေါ် လုပ်ငန်းဖြစ် မြောက်ခဲ့သမျှကို ကောက်ကာငင်ကာ ထပြီးမဖော်ပြချင်သေးဘူး။ သို့ပေသိ လတ်တလော ဖြစ်ပေါ်နေတဲ့ ပြည်သူတွေ စိတ်ကုန်လက်ပန်းကျစရာ အကြောင်းအရာတွေ တွေ့နေရတော့ မဖော်ပြမဖြစ် ဖေါ်ပြပေးရခြင်းဖြစ်တယ်” လို့ ရှေ့တန်းစစ်မျက်နှာရှိ ဗိုလ်အယ်ခူစိုးက ပြောပါတယ်။
စခန်းသိမ်းတိုက်ပွဲကို KNLA၊ ပြည်သူ့ကာကွယ်ရေးတပ်မတော် (PDF)၊ Force For Federal Democracy (FFD) နဲ့ ဗမာပြည်သူ့လွတ်မြောက်ရေးတပ်တော် (BPLA) တို့ပါဝင်သော မဟာမိတ်ပူးပေါင်းအဖွဲ့မှ တိုက်ခိုက်ခဲ့တာလို့ သိရပါတယ်။
စစ်ကောင်စီစခန်း မကျဆုံးမိနဲ့ ကျဆုံးအပြီးမှာ ဖာပွန်ခရိုင်အတွင်းရှိ မြို့နယ် ၃ ခုကို စစ်ကောင်စီက တိုက်လေယာဥ်၊ ဒရုန်း တို့ဖြင့် ဗုံးကြဲတိုက်ခိုက်မှုတွေ ပြုလုပ်ခဲ့တယ်လို့ သိရပါတယ်။
CJ-015
