မဲခေါင်၊ ဖေဖော်ဝါရီ ၂၅
ရန်ကုန်တိုင်း၊ ဒေါပုံမြို့နယ်၊ ရန်အောင် ကားမှတ်တိုင်မှာ အမျိုးသမီးငယ် တစ်ဦး ပိုက်ဆံအိတ် လုယူခံရတဲ့ အတွက် ပတ်ဝန်းကျင်ကို အော်ဟစ် အကူအညီ တောင်းခံစဉ် ဓားထိုးခံရမှု ဖြစ်ပွားခဲ့တယ်လို့ ဒေသခံတွေက မဲခေါင်သတင်းကို ပြောပါတယ်။
ဖေဖော်ဝါရီ ၂၄ ရက်၊ ည ၈ နာရီကျော်က မောင်ဖြစ်သူနဲ့ ဓားထိုးခံရသူ အမျိုးသမီးတို့ ကားမှတ်တိုင်မှာ ကားစောင့်နေစဉ် ပိုက်ဆံအိတ် လုယူခံရတာဖြစ်ပြီး အမျိုးသမီးက ပတ်ဝန်းကျင်ကို အော်ဟစ် အကူအညီ တောင်းတဲ့ အတွက် လုယက်သူ အမျိုးသားက ဓားနဲ့ထိုးကာ ထွက်ပြေးသွားတာ ဖြစ်တယ်လို့ သွားရောက်ကူညီ ကယ်ဆယ်ရာမှာ ပါဝင်သူ တစ်ဦးက ပြောပါတယ်။
“ ကလေးမလေး မောင်နှမ ၂ ယောက် ကားမှတ်တိုင်မှာ ဖြစ်သွားတာ။ ဓားနဲ့ထိုးခံရတော့ အနီး ပတ်ဝန်းကျင်က လူတွေလည်း ရောက်လာကြတယ်။ ကူညီ ကယ်ဆယ်ရေး ကားတွေလည်း ရောက်လာပြီး ကလေးမလေးကို ရန်ကုန် ဆေးရုံကြီး ပို့ပေးလိုက်ကြတယ်။ အသက်အန္တရာယ်တော့ မရှိပါဘူး။ ဓားနဲ့ထိုးခံရတော့ မိန်းကလေးငယ်လည်း ဖြစ်တော့ ကြောက်သွားတာပေါ့။ ဘယ်စစ်သားနဲ့ ရဲတွေ တစ်ကောင်မှ ရောက်မလာပါဘူး။ ဖမ်းမိလည်း သူတို့လက်ထဲ အပ်လိုက်ရင် ပြန်လွတ်လာတာပဲလေ” လို့ သူကပြောပါတယ်။
အလားတူ အင်းစိန်မြို့နယ်မှာ ဖေဖော်ဝါရီ ၂၁ ရက်၊ ညပိုင်းက ကုန်ထမ်းပြီး ပြန်လာတဲ့ လူငယ်တစ်ဦး လုယက်ခံရပြီး လူငယ်က ပြန်ခုခံရာက တင်ပါး ဓားထိုးခံခဲ့ရကာ စက်ဘီးနင်းပြေး တဲ့အတွက် လွတ်မြောက်ခဲ့ ပေမယ့် ကုန်ထမ်းလို့ရတဲ့ ငွေတွေ ပါသွားတယ်လို့ သွားရောက် ကူညီပေးခဲ့သူ တစ်ဦးက ပြောပါတယ်။
ရန်ကုန်တိုင်းမှာ စစ်ကောင်စီတပ်ဖွဲ့က လုယက်မှု၊ ဓားပြမှုနဲ့ လူသတ်မှုတွေကို ဖော်ထုတ် ဖမ်းဆီးမှု မရှိဘဲ နိုင်ငံရေးနဲ့ ပတ်သက်သူများကိုသာ ဖမ်းဆီး စစ်ဆေး အရေးယူမှုတွေ ပြုလုပ်နေတယ်လို့ ဒေသခံတွေက ပြောပါတယ်။
MK-005
