ကြားကာလမှာ ပညာရေးကို နည်းလမ်း အမျိုးမျိုးနဲ့ ဆောင်ရွက်ကြရာမှာ ရှိရင်းစွဲ သင်ရိုးညွှန်းတမ်းတွေမှ ဖက်ဒရယ် ဒီမိုကရေစီ စံနှုန်းများနဲ့ မဆန့်ကျင်တဲ့ သင်ရိုးတွေ၊ တိုင်းရင်းသား ပညာရေးဌာနတွေက ရေးဆွဲထားတဲ့ သင်ရိုးတွေနဲ့ ဒီမိုကရေစီနိုင်ငံတွေမှ သင်ရိုးတွေကို သင့်တော်သလို လွတ်လပ်စွာ မှီငြမ်း အသုံးပြုနိုင်တယ်လို့ ဖော်ပြထားပါတယ်။
ဖက်ဒရယ် ဒီမိုကရေစီ စံနှုန်းတွေနဲ့ မဆန့်ကျင်တဲ့ သင်ရိုးတွေကို ကိုးကားပြီး ကျောင်းသား၊ ကျောင်းသူတွေရဲ့ စွမ်းရည်ကို မြှင့်တင်နိုင်ရေး ဆောင်ရွက်ကြရာမှာ အခြေခံပညာအဆင့် မူလတန်း၊ အလယ်တန်း၊ အထက်တန်း အသက်အရွယ်အလိုက် ရှိသင့်တဲ့ တတ်ကျွမ်းမှု စွမ်းရည် စံသတ်မှတ်ချက်တွေကို မှီငြမ်း အသုံးပြုနိုင်ဖို့ အမျိုးသား ညီညွတ်ရေး အစိုးရ၊ ပညာရေးဝန်ကြီးဌာန အနေနဲ့ အကြံပြု ထုတ်ပြန်ပေးတာလို့လည်း ထုတ်ပြန်ချက်မှာ ဖော်ပြထားပါတယ်။
ဖက်ဒရယ် ဒီမိုကရေစီ ပညာရေးစနစ်မှာ ပြဋ္ဌာန်း စာအုပ်ပါ အကြောင်းအရာတွေကိုသာ အလွန်အမင်း မှီခိုပြီး အလွတ်ကျက်မှတ် ပြန်လည်ဖြေဆိုတဲ့ ပညာရေးစနစ်ထက် ကျောင်းသူ၊ ကျောင်းသားတွေရဲ့ ကျိုးကြောင်း ဆင်ခြင်နိုင်စွမ်း၊ ဝေဖန်ပိုင်းခြားနိုင်စွမ်း၊ လွတ်လပ်စွာ တွေးခေ ါ်မြော်မြင်နိုင်စွမ်း၊ တီထွင်ဖန်တီးနိုင်စွမ်းတွေကို အားပေးအားမြှောက်ပြုမယ့် ပညာရေးစနစ်တွေဖြစ်ဖို့ လိုအပ်တယ်လို့လည်း ထောက်ပြထားပါတယ်။
တတ်ကျွမ်းမှု စွမ်းရည်ကို အခြေခံတဲ့ သင်ရိုးညွှန်းတမ်းစနစ်-Competency-based Curriculum က နိုင်ငံ အများအပြားမှာ ပြောင်းလဲ ကျင့်သုံးနေတဲ့ မျက်မှောက်ခေတ်နဲ့ လျော်ညီတဲ့စနစ် ဖြစ်တယ်လို့ ဆိုပါတယ်။
ပြဋ္ဌာန်းစာအုပ် အကြောင်းအရာ အခြေပြု -Content-based စနစ်မှ တတ်ကျွမ်းမှုစွမ်းရည်အခြေပြု-Competency-based စနစ်သို့ ကူးပြောင်းရာမှာ စနစ်တကျအချိန်ယူပြီး အဆင့်ဆင့် ဆက်လက်ညှိနှိုင်း လုပ်ဆောင်သွားဖို့ လိုအပ်တယ်လို့ ဖော်ပြထား ပါတယ်။
NUG ပညာရေးဝန်ကြီးဌာန အနေနဲ့ ပထမဆုံး အကြိမ် “ကြားကာလ အခြေခံပညာတတ်ကျွမ်းမှုစွမ်းရည် စံသတ်မှတ်ချက်များ -Statement of Basic Education Competency Standards for Interim Period (Version 2) ကို စတင် အကြံပြု ထုတ်ပြန်တာဖြစ်ပြီး ဆရာ ဆရာမတွေ၊ ကျောင်းသား ကျောင်းသူတွေရဲ့ အတွေ့အကြုံနဲ့ သုတေသန လေ့လာတွေ့ရှိချက်တွေကို အခြေခံပြီး ပိုမိုကောင်းမွန်အောင် အခြေခံပညာ တတ်ကျွမ်းမှု စွမ်းရည် စံသတ်မှတ်ချက်တွေ (Version 3, 4, 5, …) ကို စနစ်တကျ အဆင့်ဆင့် ဆက်လက် ဆောင်ရွက်မှာ ဖြစ်တယ်လို့လည်း အသိပေး ဖော်ပြထားပါတယ်။
