မဲခေါင်၊ အောက်တိုဘာ ၂၇
ရှမ်းပြည်တောင်ပိုင်း၊ တောင်ကြီးမြို့နယ်တွင် PNO ပြည်သူ့စစ်တပ်ဖွဲ့ဝင်အချင်းချင်း ပစ်ခတ်မှုဖြစ်ပွားပြီး နှစ်ဦးသေဆုံးခဲ့သည့်အပြင် အနီးရှိကျေးရွာမှ အသက် ၁၅ နှစ်နှင့် ၁၉ နှစ်အရွယ် အမျိုးသမီးငယ်နှစ်ဦးလည်း သေနတ်ထိမှန်သေဆုံးခဲ့ကြောင်း သိရသည်။
အောက်တိုဘာ ၂၆ ရက် နံနက် ၅ နာရီခန့်က ဇလဲမြောက်ဘက်ရှိ ကျောင်းတောဂိတ်တွင် တာဝန်ကျနေသည့် PNO ပြည်သူ့စစ်တပ်ဖွဲ့ဝင် ခွန်သူရမင်းနှင့် ခွန်ညွန့်ဝင်းတို့ စကားများရန်ဖြစ်ရာမှ ခွန်သူရမင်းက ခွန်ညွန့်ဝင်းကို သေနတ်ဖြင့် ပစ်သတ်ခဲ့ပြီးနောက် သေနတ်ယူဆောင်ကာ ထွက်ပြေးသွားခဲ့ကြောင်း သိရသည်။
ထို့နောက် ညနေ ၇ နာရီခွဲခန့်တွင် ထွက်ပြေးသွားသည့် ခွန်သူရမင်းကို ပြည်သူ့စစ်တပ်ဖွဲ့ဝင်များက သွားရောက်ဖမ်းဆီးစဉ် ၎င်းက ပြန်လည်ခုခံပစ်ခတ်ခဲ့သဖြင့် အသေပစ်ခတ်ဖမ်းဆီးခဲ့ကြောင်း PNO တပ်ဖွဲ့ဝင်တစ်ဦးထံမှ သိရသည်။
ပစ်ခတ်မှုသည် ၁၅ မိနစ်ခန့်ကြာမြင့်ခဲ့ပြီး ကျောင်းတောကျေးရွာနှင့် ကပ်လျက်ရှိသည့် ကောင်းမှုစဉ်ရွာတွင် လမ်းမပေါ်၌ ရှိနေသည့် အသက် ၁၉ နှစ်နှင့် ၁၅ နှစ်အရွယ် အမျိုးသမီးငယ်နှစ်ဦးမှာ ဦးခေါင်းကို သေနတ်ထိမှန်ကာ သေဆုံးခဲ့ကြောင်း သိရသည်။
“အချင်းချင်း ပြဿနာဖြစ်ပြီး ပစ်ခတ်ကြတာမှာ ဘာမှမဆိုင်တဲ့ ဒေသခံလူငယ်မိန်းကလေးနှစ်ယောက်ပါ အသက်ဆုံးရှုံးရတာ စိတ်မကောင်းစရာပါ။ ပြည်သူတွေက ဘယ်အချိန် ဘယ်နေရာမှာ ပစ်ခတ်မှုဖြစ်မလဲဆိုတာ မသိနိုင်တော့ ကိုယ့်အိမ်မှာနေရင်းနဲ့တောင် လုံခြုံမှုမရှိသလို ခံစားနေရတယ်” ဟု ဒေသခံတစ်ဦးက မဲခေါင်သို့ ပြောသည်။
အဆိုပါဖြစ်စဉ်တွင် လက်နက်ကိုင်တပ်ဖွဲ့ဝင်အချင်းချင်း ဖြစ်ပွားသည့် ပဋိပက္ခ၏ အကျိုးဆက်ကို အရပ်သားပြည်သူများကပါ ခံစားခဲ့ရခြင်းဖြစ်ပြီး သက်ဆိုင်ခြင်းမရှိသည့် အမျိုးသမီးငယ်နှစ်ဦး အသက်ဆုံးရှုံးခဲ့ရသည်။
ဒေသခံများအနေဖြင့် ပစ်ခတ်မှုတွင် ပါဝင်ခြင်းမရှိသော်လည်း အနီးအနားတွင် နေထိုင်ခြင်းကြောင့် ကျည်ထိမှန်နိုင်သည့်အန္တရာယ်ကို ရင်ဆိုင်နေရပြီး မိသားစုဝင်များ၏ လုံခြုံရေးအတွက်လည်း စိုးရိမ်နေရကြောင်း သိရသည်။
“အခုလိုဖြစ်စဉ်တွေမှာ နစ်နာရတာက သာမန်ပြည်သူတွေပါပဲ။ ပစ်ခတ်မှုဖြစ်တဲ့အခါ ဘယ်သူ့ကိုမှ အကူအညီတောင်းဖို့၊ ဘာတွေဖြစ်နေလဲဆိုတာ မေးမြန်းဖို့တောင် ခက်ခဲတယ်။ အခုလည်း သေဆုံးသွားတဲ့ မိန်းကလေးနှစ်ယောက်အတွက် မိသားစုတွေရဲ့ နာကျင်မှုကို ဘယ်သူမှ ပြန်ဖြည့်ပေးလို့မရဘူး” ဟု ဒေသခံတစ်ဦးက ပြောသည်။
ထို့အပြင် ယခုဖြစ်စဉ်နှင့်ပတ်သက်၍ အွန်လိုင်းနှင့် မီဒီယာများပေါ်တွင် မတင်ရန်၊ မပြောဆိုရန်လည်း PNO ပြည်သူ့စစ်က တားမြစ်ပြောဆိုထားကြောင်း သိရသည်။
#MeKongNews
#PNO
#ပြည်သူ့စစ်
#ပစ်ခတ်မှု
#တောင်ကြီး
#အမျိုးသမီး
