ဒေါ်အောင်ဆန်းစုကြည်ကို စစ်ကောင်စီက အာဏာသိမ်းကတည်းက ဖမ်းဆီးထားတာ ၁၈ လရှိပြီဖြစ်ပြီး အရင် တရားစွဲဆိုချက် ၁၄ မှုမှာ အပြစ်ရှိတယ်လို့ အဓမ္မဆုံးဖြတ်ချက်ချပြီး ထောင်ဒဏ်ပေါင်း ၂၆ နှစ်ချမှတ်ထားပြီး ဖြစ်ပါတယ်။

ငြိမ်းချမ်းရေးနိုဗယ်ဆုရှင် ဒေါ်အောင်ဆန်းစုကြည်ကို တရားစွဲထားတဲ့ နောက်ထပ်အမှုကျန်က ငါးခုရှိသေးပြီး ဒီဇင်ဘာ ၂၆ ရက် တနင်္လာနေမှာ နှစ်ဖက်စလုံးက လာမယ့်သောကြာနေ့ကို လက်ကျန်အမှုငါးမှုအတွက် စီရင်ချက် ချဖို့၊ (ဒေါ်အောင်ဆန်းစုကြည်ဘက်က ခုခံချေပဖို့) သဘောတူခဲ့ကြတာလို့ AFP သတင်းရင်းမြစ်က ဆိုပါတယ်။

“နှစ်ဖက်စလုံးက တနင်္လာနေ့မှာ လက်ကျန်အမှု ၅ မှုအတွက် လာမယ့် ဒီဇင်ဘာ ၃၀ ရက် (သောကြာနေ့) မှာ အပြီး စီရင်ဖို့ လက်ခံဆုံးဖြတ်ခဲ့တယ်။ ဒေါ်အောင်ဆန်းစုကြည်ဟာ နေကောင်းကျန်းမာနေပါတယ်”

လို့ အမည် မဖော်ပြလိုတဲ့ နီးစပ်အသိုင်းအဝိုင်းက ပုဂ္ဂိုလ်တစ်ယောက် AFP ကို ပြောသွားခဲ့တာဖြစ်ပါတယ်။

အရင် အမှုတွေတုန်းက တစ်မှုကို ထောင်ဒဏ်သုံးနှစ်စီချမှတ်ခဲ့တာကြောင့် လက်ကျန် ၅ မှုမှာ အမြင့်ဆုံးထောင်ဒဏ်အဖြစ် ၁၅ နှစ်အထိ ထပ်ချမှတ်နိုင်ကြောင်းလည်း သုံးသပ်နေကြတယ်။

လူ့အခွင့်အရေး အသိုင်းအဝိုင်းကတော့ ပြစ်ဒဏ်အားလုံးစီရင်ချက်ချပြီးရင် စစ်ကောင်စီဟာ လာမယ့်ရွေးကောက်ပွဲမှာ ဒေါ်အောင်ဆန်းစုကြည်ကို ပါဝင်လာအောင်စည်းရုံးပြီး လွတ်ငြိမ်းချမ်းသာခွင့်နဲ့ ပြန်လွှတ်ပေးတာမျိုးလည်း လုပ်လာနိုင်တယ်လို့ သုံးသပ်နေကြပါတယ်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)