မဲခေါင်၊ မတ် ၂၃
စစ်ကျွန်ပညာရေးကို သပိတ်မှောက်ထားတဲ့ ကျောင်းသူ ကျောင်းသူတွေ အတွက် အဆင့်မြင့်ပညာ ခြေလမ်းသစ် တစ်ခု အကောင်အထည်ဖော် လိုက်တယ်လို့ နွေဦးတက္ကသိုလ်က ကြေညာ လိုက်ပါတယ်။
မတ်လ ၂၂ ရက်မှာ နွေဦးတက္ကသိုလ်နဲ့ The University of Arizona တို့ သဘောတူညီမှု စာချွန်လွှာ ရေးထိုးခဲ့ပြီး မိတ်ဖက် ပူးပေါင်းဆောင်ရွက်ခြင်း လုပ်ငန်းစဉ်တွေနဲ့ ပညာရပ်ဆိုင်ရာ သင်တန်းတွေ ပူးပေါင်းဖွင့် လှစ်သွားတော့မယ်လို့ နွေဦးတက္ကသိုလ်က ဖော်ပြပါတယ်။
“ နွေဦးတက္ကသိုလ်ဟာ ကြားကာလအတွင်း မြန်မာ ကျောင်းသား ပြည်သူတွေ အတွက် ပညာရေးဆိုင်ရာ ပူးပေါင်း ဆောင်ရွက်မှု အစီအစဉ်၊ ပရောဂျက်တွေကို လုပ်ဆောင်ဖို့ University of Arizona (UA) နဲ့ မိတ်ဖက် အဖွဲ့အစည်းအဖြစ် သဘောတူညီမှု စာချွန်လွှာ လက်မှတ်ရေးထိုး လိုက်တယ်” လို့ Spring University Myanmar ရဲ့ တာဝန်ရှိသူက ပြောပါတယ်။
လက်ရှိ နွေဦးတက္ကသိုလ်မှာ ပို့ချနေတဲ့ သင်တန်း ၅၀၇ ခုရှိပြီး သင်ကြားရေးမှာ ပါဝင်အားဖြည့်ပေးတဲ့ CDM ဆရာ ဆရာမနဲ့ ပညာရှင် စုစုပေါင်း ၂၀၀ ကျော်ရှိကာ နိုင်ငံတစ်ဝှမ်း ကျောင်းသား လူငယ် ၁၃,၀၀၀ တက်ရောက်ခဲ့တယ်လို့ ဆိုပါတယ်။
“ပညာရပ်ဆိုင်ရာ သင်တန်းတွေ ပူးပေါင်းဖွင့်လှစ်တာ Virtual Student Exchange Programme တွေ ကျင်းပတာနဲ့ နွေဦးတက္ကသိုလ်မှ ပညာသင်ယူ ပြီးမြောက်သွားရင် University of Arizona မှာ အသိအမှတ်ပြု ပညာ ဆက်လက်သင်ကြားနိုင်ရေး လုပ်ငန်းစဉ်တွေ ပါဝင်တယ်” လို့ Spring University Myanmar တာဝန်ရှိသူက ပြောပါတယ်။
The University of Arizona နဲ့ ပူးပေါင်းဖွင့်လှစ်မယ့် ရက်တို သင်တန်းတွေမှာ ကျောင်းသားတွေ အနေနဲ့ သင်ကြားရေး ခရပ်ဒစ် ရရှိမှာဖြစ်ပြီး အခု သဘောတူ စာချွန်လွှာ ရေးထိုးပြီးနောက် တက္ကသိုလ် ၂ ခုမှာ မြန်မာ ကျောင်းသား လူငယ်တွေ အတွက် သင်တန်းတွေ စတင် ပြင်ဆင်နေပြီလို့ သိရပါတယ်။
MK-010
#The-University-of-Arizona