မဲခေါင်၊ ဇန်နဝါရီ ၁၆
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသမှာ ဇန်နဝါရီလ ၁၃ ရက်က တောင်ယာလုပ်ပြီး အနားယူနေတဲ့ ရွာသားတွေကို စစ်တပ်က ဝင်ပစ်ရာ တစ်ဦးသေပြီး ၅ ဦးကို ဖမ်းဆီးသွားတယ်လို့ ဒေသခံတွေထံက သိရပါတယ်။
အင်းလေးဒေသ၊ မင်းချောင်းကျေးရွာအုပ်စု၊ မင်းချောင်းအလယ်ရွာမှာ ဇန်နဝါရီလ ၁၃ ရက်၊ မနက် ၁၀ နာရီ ဝန်းကျင်က တောင်ယာလုပ်ပြီး အနားယူနေတဲ့ ရွာသားတွေကို စစ်တပ်က ပစ်ခတ်ခဲ့တာလို့ ဆိုပါတယ်။
“ ခြံလုပ်ပြီး နားနေတဲ့ ရွာသားတွေကို စစ်တပ်က ဝင်ပစ်တာ။ မျက်လုံး ပေါက်ထွက်ပြီး တစ်ယောက် သေသွားတယ်။ ၅ ယောက်ကိုလည်း ဖမ်းခေါ်သွားတယ်” လို့ ဒေသခံ တစ်ဦးက ပြောပါတယ်။
အဖမ်းခံရတဲ့ ရွာသား ၅ ဦးအနက် တစ်ဦးမှာ မျက်လုံးပေါက်ထွက် ဒဏ်ရာ၊ တစ်ဦးမှာ ခြေထောက် ကျည်ထိမှန် ဒဏ်ရာတွေ ရရှိထားပြီး လက်ရှိ အချိန်ထိ သူတို့နဲ့ အဆက်အသွယ် မရသေးဘူးလို့ သိရပါတယ်။
စစ်တပ်က ပစ်ခတ်မှုကြောင့် သေဆုံးသွားတဲ့ ရွာသား တစ်ဦးကိုတော့ ဇန်နဝါရီလ ၁၄ ရက်က ညောင်ရွှေမြို့မ သုဿန်မှာ မီးသင်္ဂြိုဟ်ခဲ့ပြီး သူ့ကို မှားယွင်း ပစ်ခတ်မိတာ ဖြစ်တယ်လို့ မိသားစုဝင်တွေထံ စစ်တပ်က လာရောက် ပြောကြားသွားတယ်လို့လည်း သိရပါတယ်။
MK-008
#MeKongNews
