မဲခေါင်၊ ဩဂုတ် ၁၂
ရှမ်းပြည်နယ် မြောက်ပိုင်း၊ လားရှိုးမြို့နယ်၊ မယ်ဟန်ကျေးရွာ၊ ဝေဠုဝန်ကျောင်းတိုက်မှ ကိုရင်လေး တစ်ပါးကို စာမရလို့ဆိုပြီး ကျောင်းထိုင် ဆရာတော်က အရှိုးရာပေါ်တဲ့ အထိ ပြင်းပြင်းထန်ထန် ရိုက်နှက်မှု ဖြစ်ပွားခဲ့ပါတယ်။
အသက် ၉ နှစ်ရွယ်သာ ရှိသေးတဲ့ ကိုရင်လေး က မြန်မာဗျည်းအက္ခရာကို အလွတ်ပြန်ဆိုရာမှာ “စ”လုံးအက္ခရာ မေ့လို့ဆိုပြီးတော့ ကျောင်းထိုင် ဆရာတော်က အချက်ပေါင်းများစွာ အရှိုးရာပေါ်တဲ့အထိ ရိုက်နှက်ခဲ့တာ ဖြစ်တယ်လို့ ကိုရင်လေးရဲ့ မိသားစုဝင်တွေက ပြောပါတယ်။
“စလုံးကို မေ့လို့ဆိုပြီး ကြက်မွှေး တံမျက်စည်းနဲ့ ရိုက်တာ၊ အစက မတ်တပ်ရပ်ခိုင်းပြီး ရိုက်တယ်။ ပြီးတော့ မှောက်အိပ်ခိုင်းပြီး ထပ်ရိုက်တယ်။ ရိုက်ပြီးတော့ ကိုရင်လေးကိုလည်း ရေမပေးသောက်ဘူး။ အခုထိ ပက်လက်အိပ်လို့ မရသေးဘူး။ မှောက်ပြီး အိပ်လို့ပဲရတယ်” လို့ ကိုရင်လေးရဲ့ မိသားစုဝင် တစ်ဦးက ပြောပါတယ်။
ပြီးခဲ့တဲ့ ဩဂုတ်လ ၈ ရက်နေ့မှာ ကိုရင်လေးကို စာတစ်လုံး မေ့လို့ဆိုပြီး ကျောင်းထိုင် ဆရာတော်က အချက်ပေါင်းများစွာ ရိုက်ပြီးတဲ့နောက် ထွန်းရွှေဝါ လိမ်းပေးတဲ့အတွက် ပူပြီး တစ်ညလုံး အိပ်မရတာကြောင့် ဩဂုတ်လ ၉ ရက်နေ့မှာ သူငယ်ချင်း ကိုရင်လေးရဲ့ ဖုန်းနဲ့ မိဘဆီ ဖုန်းဆက်ပြီး လာခေါ်ပေးဖို့ ပြောဆိုခဲ့တာ ဖြစ်ပါတယ်။
“အစက ဖုန်းထဲမှာပြောတော့ တစ်ချက် နှစ်ချက် ရိုက်တယ်ပဲ ထင်တာ။ ကျွန်မတို့ သွားခေါ်တော့ ကိုရင်လေးက ငိုနေတာ ထတောင် မထနိုင်ဘူး။ အရှိုးရာတွေပေါ်တဲ့အထိ အများကြီး အရိုက်ခံရတော့ အိမ်ကို တစ်ခါတည်း ခေါ်လာပြီး ဆေးခန်း သွားပြလိုက်တာ။ ဆရာတော်ကတော့ တောင်းပန်ပါတယ်။ ဒါပေမယ့် ကိုရင်လေးကို ဒီလိုရိုက်တာ မကျေနပ်ဘူး” လို့ ကိုရင်လေးရဲ့ အစ်မ ဖြစ်သူက ပြောပါတယ်။
ကိုရင်လေး ဒဏ်ရာကုဖို့ အတွက် ဆေးဖိုးကို ဆရာတော်က ပေးမယ်လို့ ပြောပေမယ့် ၉ ရက်နေ့ နဲ့ ၁၀ ရက်နေ့ အတွက် ကုန်ကျတဲ့ သွားလာရေး စရိတ် ၉ သောင်းကျပ်ကိုသာ ပေးခဲ့ပြီး ဒီကနေ့ ကုန်ကျတဲ့စရိတ်ကိုတော့ ပြန်မပေးဘဲ ဘောက်ချာကိုသာ သိမ်းထားခိုင်းတယ်လို့ ကိုရင်လေး မိသားစုဝင်ကပြောပါတယ်။
ကိုရင်လေး ဒဏ်ရာပျောက်ရင် ကျောင်းကို ပြန်လာပို့ပေးဖို့ ဆရာတော်က ပြောပေမယ့် မိသားစုဝင်တွေ အနေနဲ့ ပြန်မပို့တော့ဘူးလို့ ဆိုပါတယ်။
“ကိုရင်လည်း မသွားချင်တော့ဘူး။ ကျွန်မတို့လည်း မပို့တော့ဘူး။ ပို့လိုက်ရင် အညှိုးနဲ့ ထပ်ရိုက်မှာ ကြောက်တယ်။ အဲ့ကျောင်းမှာရှိတဲ့ ရှမ်းကိုရင်လေးတွေလည်း အကုန်နီးပါး ထွက်ပြေးကြပြီ။ ၂ ပါးပဲ ကျန်တော့တယ်” လို့ ကိုရင်လေးရဲ့ အစ်မဖြစ်သူက ပြောပါတယ်။
လက်ရှိ ကိုရင်လေးကို ဆေးခန်းပြ ကုသနေတာကြောင့် လမ်းလျှောက်နိုင်ပြီး ဒဏ်ရာ သက်သာလာပြီလို့ မိသားစုဝင်တွေက ဆိုပါတယ်။
ပြီးခဲ့တဲ့ ၂၀၂၁ ခုနှစ်၊ ဩဂုတ်လ ၂၄ ရက်ကလည်း ကျေးသီးမြို့နယ်၊ မိုင်းကောင်ကျေးရွာမှာ နွားနို့ ခိုးသောက်လို့ ဆိုပြီး ကိုရင်လေး တစ်ပါးကို ဦးဇင်း တစ်ပါးက ရိုက်နှက်ရာက ကိုင်ရင်လေး အသက်ဆုံးရှုံး ခဲ့ရပါတယ်။
CJ-002
#MeKongNews
#လားရှိုးမြို့နယ်
#ကိုရင်
#ရိုက်နှက်