မဲခေါင်၊ ဇူလိုင် ၁၂
ကရင်နီ ပြည်နယ်တွင်း တိုက်ပွဲတွေကြောင့် နေရပ်စွန့်ခွာ ထွက်ပြေးနေရတဲ့ ပြည်သူတွေ ခိုလှုံရာ ထိုင်း-ကရင်နီ နယ်စပ်မျဉ်းက စစ်ရှောင်စခန်းကို စစ်ကောင်စီက ဇူလိုင်လ ၁၁ ရက် ညပိုင်းကမှာ လေကြောင်းက ဗုံးကြဲခဲ့ရာ အနည်းဆုံး ပြည်သူ ၃ ဦး သေဆုံးပြီး အများအပြား ထိခိုက် ဒဏ်ရာရခဲ့တယ်လို့ စစ်ရှောင်ကူညီနေသူ တစ်ဦးက မဲခေါင်သတင်းဌာနကို ဒီကနေ့ ပြောပါတယ်။
ကရင်နီပြည်နယ်၊ မယ်စဲ့နဲ့ ရွာသစ်မြို့နယ်တွေမှာ ဖြစ်ပွားနေတဲ့ တိုက်ပွဲတွေကြောင့် ပြည်သူတွေ နေရပ်စွန့်ခွာ ထွက်ပြေးရာမှာ ထိုင်းအာဏာပိုင်တွေက လူအရေအတွက် ကန့်သတ် လက်ခံတာကြောင့် ထိုင်း-ကရင်နီ နယ်စပ်မှာ ယာယီ ခိုလှုံနေစဉ် အခုလို တိုက်ခိုက်ခံရတာ ဖြစ်တယ်လို့ သူကပြောပါတယ်။
“ ကျွန်တော်လည်း ဆက်သွယ် နေပါတယ်။ မနေ့ကမှ ကျွန်တော်လည်း အဝေးရောက်နေတော့ ဒီနေ့လယ်တော့ ရောက်ပါမယ်။ ကနဦး သိရတာတော့ ပြည်သူ ၃ ဦး သေဆုံးသွားတယ်။ ဒဏ်ရာရတဲ့ ပြည်သူ ဆယ်နဲ့ချီရှိတယ်။ ကျွန်တော်ရောက်မှ ထပ်အတည်ပြုပေးပါ့မယ်” လို့ သူကပြောပါတယ်။
အဆိုပါ ဗုံးကြဲခံရတဲ့ စစ်ရှောင်စခန်းဟာ ထိုင်း-ကရင်နီ နယ်စပ်မျဉ်းမှာ တည်ရှိတာဖြစ်ပြီး စစ်ကောင်စီရဲ့ လေကြောင်း တိုက်ခိုက်မှုကြောင့် ထိုင်းဘက်ခြမ်းမှာ လှုပ်လှုပ်ခတ်ခတ် ဖြစ်သွားတယ်လို့ ဆိုပါတယ်။
လက်ရှိ ထိုင်းဘက်ခြမ်းက စစ်ရှောင်တွေ ထပ်မံ လက်မခံတော့ပေမဲ့ ရိက္ခာ သယ်ယူ ပို့ဆောင်မှု ခွင့်ပြုထားကြောင်း၊ အဆိုပါ ယာယီ စစ်ရှောင်စခန်းမှာ ခိုလှုံနေတဲ့ ပြည်သူ ၅,၀၀၀ ကျော်ရှိတယ်လို့ စစ်ရှောင် တွေကို ကူညီနေသူ မယ်စဲ့မြို့နယ် NLD အမတ်ဟောင်း ဦးသန်းလင်းလင်း ကပြောပါတယ်။
MK-007
#MekongNews
#ထိုင်း-ကရင်နီနယ်စပ်
#စစ်ဘေးရှောင်စခန်း
#ဗုံးကြဲ
