မဲခေါင်၊ မတ် ၂၂

တာချီလိတ်ခရိုင်အတွင်းက ရပ်ကွက်နဲ့ ကျေးရွာအုပ်စုတွေမှာ အာဏာသိမ်းစစ်တပ်မှာ စစ်မှုထမ်းဖို့အတွက် လူစတင်ကောက်ခံနေပြီဖြစ်တယ်လို့ ဒေသခံတွေထံက သိရပါတယ်။

တာချီလိတ်ခရိုင်အတွင်းမြို့နယ်တွေဖြစ်တဲ့ တာချီလိတ်မြို့နယ်၊ မိုင်းဖြတ်မြို့နယ်နဲ့ မိုင်းယောင်းမြို့နယ်ထဲမှာရှိတဲ့ ရပ်ကွက်နဲ့ ကျေးရွာအုပ်စုတွေမှာ မတ်လ ၂၁ရက်က စတင်ပြီး စစ်သားစုဆောင်းရေးအတွက် အစည်းအဝေးလုပ်ကာ အကြောင်းကြားလာတယ်လို့ ဒေသခံတွေက ပြောပါတယ်။

ကျေးရွာပေါင်း ၈၂ရွာရှိတဲ့ တာချီလိတ်မြို့နယ်ထဲက မိုင်းကိုးကျေးရွာအုပ်စုမှာ စစ်မှုထမ်းအပတ်စဉ် ၁ ခုအတွက် ၅ယောက်စစ်မှုထမ်းရမှာဖြစ်ပြီး အပတ်စဉ် ၃ခုစာအတွက် ၁၅ယောက် ပေးဖို့ အမိန့်ကျတယ်လို့ မိုင်းကိုးကျေးရွာနေပြည်သူ ၁ဦးက မဲခေါင်ကို ပြောပါတယ်။

“မိုင်းကိုးမှတော့ မဲမနှိုက်ဘူး။ တအိမ်ကို ဘတ် ၃၅၀ (ကျပ် ၃၅၀၀၀ ခန့်) ထည့်ရမယ်။ အဲဒီပိုက်ဆံတွေစုပြီးတော့ စစ်မှုထမ်းမယ့်လူ ၁၅ယောက်ကို တယောက် ဘတ် ၁ သိန်းပေးမယ်ဆိုပြီး သူကြီးတွေကို ပြောလာတယ်” လို့ သူက ပြောပါတယ်။

မိုင်းကိုးကျေးရွာအုပ်စုဟာ ရှမ်း၊ အာခါနဲ့ လားဟူတိုင်းရင်းသား အများစုနေထိုင်တဲ့ ကျေးရွာအုပ်စုဖြစ်ပြီး ကျေးရွာပေါင်း ၈၂ရွာနဲ့ အိမ်ခြေ ၄၅၀၀ ခန့်ရှိတဲ့ ကျေးရွာအုပ်စုတစ်ခု ဖြစ်ပါတယ်။

မိုင်းကိုးကျေးရွာအုပ်စုသာမက နားယောင်းကျေးရွာအုပ်စု၊ မိုင်းဖုန်း (က) ကျေးရွာအုပ်စုနဲ့ မိုင်းဖုန်း (ခ) ကျေးရွာအုပ်စုတွေမှာလည်း နေအိမ်တွေက ပိုက်ဆံစုပြီး လူရှာပေးမယ့်အစီအစဉ်သာ လုပ်ကြတယ်လို့ တာချီလိတ်မြို့နယ်အတွင်းက သားသည်ဖခင် ၁ဦးက ပြောပါတယ်။

“ဒေသခံတွေအများစုက ဘယ်သူမှ မလိုက်ချင်ကြဘူး။ ပိုက်ဆံထည့်ဆိုတော့ ထည့်လိုက်တာပေါ့။ အဲဒါ ဆေးသမားတွေ၊ အလေအလွင့်တွေကို တယောက်ကို ဘတ် ၁သိန်း၊ ၁သိန်းခွဲပေးပြီး လွှတ်မယ်ကြားတယ်” လို့ သူက ပြောပါတယ်။

တာချီလိတ်မြို့ပေါ်ရပ်ကွက်တွေဖြစ်တဲ့ ရန်အောင်မြေရပ်ကွက်၊ မကာဟိုခမ်းရပ်ကွက်နဲ့ ပုန်းထွန်ရပ်ကွက်တွေမှာလည်း မတ်လ ၂၁ရက်က စစ်သားစုဆောင်းရေးအတွက် အစည်းအဝေးပြုလုပ်ကြပြီး မကာဟိုခမ်းရပ်ကွက်မှာတော့ ရပ်ကွက်ထဲနေထိုင်သူတွေထဲက မဲနှိုက်ရွေးချယ်ဖို့ ဆုံးဖြတ်တယ်လို့ တာချီလိတ်မြို့ပေါ်နေထိုင်သူတစ်ဦးက ပြောပါတယ်။

“ပုန်းထွန်ရပ်ကွက်မှာ ၆ယောက်။ ဝမ်ကျောက်လုံဖက်တော့ စစ်မှု့မထမ်းချင်ရင် အိမ်ထောင်စုတစ်စုကို ဘတ် ၁ထောင်ထည့်ရင် တစ်နှစ်စာလွတ်တယ်ကြားတယ်။ အိမ်ထောင်စုတစ်စု ဘတ် ၁ထောင်က လူစားထိုးမယ့်လူကိုပေးရမယ်လို့ကြားတယ်ဗျ။ ဆန်ဆိုင်းဘက်လည်း ကောက်နေပြီ။ မကာဟိုခမ်းရပ်ကွက်ကတော့ ဒီနေ့ (မတ်လ ၂၂ရက်) မဲနှိုက်ပြီး သင်တန်းတက်ရမယ်” လို့ သူက ပြောပါတယ်။

စစ်သားစုဆောင်းရေးအတွက် မဲနှိုက်ရမယ့်ရပ်ကွက်တွေက ပြည်သူတွေအနေနဲ့ စိတ်ဆင်းရဲနေရပြီး အမျိုးသားဦးရေများတဲ့ အိမ်ထောင်စုက အမျိုးသမီးတွေအနေနဲ့ ပိုပြီး စိတ်ပင်ပန်းရတယ်လို့ မကာဟိုခမ်းရပ်ကွက်နေ အမျိုးသမီးတစ်ဦးက ပြောပါတယ်။

ရှမ်းပြည်အရှေ့ပိုင်းမှာ တာချီလိတ်ခရိုင်အတွင်းမှာသာမက ကျိုင်းတုံခရိုင်ထဲက ရပ်ကွက်တွေ၊ ကျေးရွာအုပ်စုတွေမှာလည်း မတ်လ တတိယပတ်အတွင်း စတင်ကောက်ခံနေပြီလို့ ဒေသခံတွေထံက သိရပါတယ်။

ရှမ်းအရှေ့မှာ စစ်ကောင်စီက ထုတ်ပြန်တဲ့ စစ်မှုထမ်းဥပဒေအရ လူစုဆောင်းတာတင်မကဘဲ ပြည်သူ့စစ်အဟောင်းတွေကိုလည်း စစ်သင်တန်းပြန်ပေးတာတွေ ပြုလုပ်နေတယ်လို့ ဒေသခံတွေက ပြောပါတယ်။

MK – 004

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)