ဒီဇင်ဘာလ ၂၆ ရက် ညနေ ၅ နာရီ ဝန်းကျင်မှာ ဒီပဲယင်းမြို့ပေါ်က ထွက်လာတဲ့ ခလရ (၇၀၁) တပ်ရင်းမှ အင်အား ၅၀ ကျော်ပါတဲ့ တပ်ဖွဲ့က ကြည်ရွာနဲ့ ဘုရားထွက်ကျေးရွာတွေထဲ ဝင်ရောက်ပြီး နေအိမ်တွေကို မီးရှို့ဖျက်ဆီးခဲ့တယ်လို့ သိရပါတယ်။
ဒီဇင်ဘာ ၂၇ ရက်နေ့မှာလည်း စစ်တပ်က ဆက်လက် မီးရှို့ခဲ့တာကြောင့် ၂ ရက်အတွင်း ကြည်ရွာက အိမ်ခြေ ၃၀၀ ဝန်းကျင် ဆုံးရှုံးခဲ့ရပြီး ဘုရားထွက်ရွာ ကတော့ အိမ်ခြေ ၄၀၀ ဝန်းကျင် မီးလောင် ဆုံးရှုံးခဲ့ရတာကြောင့် ၁၅ အိမ်ခန့်သာ ကျန်ရှိပြီး ရွာလုံးကျွတ်နီးပါး မီးလောင် ပြာကျ ခဲ့ရတယ်လို့ ဆိုပါတယ်။
စစ်ကောင်စီတပ်တွေဟာ နေအိမ်တွေ မီးရှို့ဖျက်ဆီးတဲ့ အပြင် ပြည်သူတွေ သိုလှောင်ထားတဲ့ စားနပ်ရိက္ခာ ဆန်၊ စပါးနဲ့ အခြား အသုံးအဆောင် ပစ္စည်းတွေကိုလည်း မီးရှို့ဖျက်ဆီးသွားတယ်လို့ သိရပါတယ်။
ဒါ့အပြင် မနေ့က မကျည်းစောက်ရွာကို မီးတင်ရှို့နေရာ ပျက်စီး ဆုံးရှုံးမှု အခြေနေကိုတော့ အခုထိ မသိရသေးပါဘူး။
ပြီးခဲ့တဲ့ ၂၀၀၃ ခုနှစ်၊ မေလ ၃၀ ရက် ည ၈ နာရီ ဝန်းကျင်မှာ ဒေါ်အောင်ဆန်းစုကြည်နဲ့ အမျိုးသား ဒီမိုကရေစီ အဖွဲ့ချုပ် ပါတီဝင်တွေရဲ့ စည်းရုံးရေး ယာဉ်တန်းဟာ ဒီပဲယင်းမြို့နယ်၊ ကြည်ရွာ အရောက်မှာ စစ်အုပ်စုရဲ့ လက်ပါးစေ စွမ်းအားရှင် အမည်ခံ လူ ၅,၀၀၀ နီးပါးရဲ့ လုပ်ကြံ သတ်ဖြတ်မှုကို ခံခဲ့ရတာကြောင့် လိုက်ပါလာတဲ့ NLD ပါတီဝင် ၇၀ အပါအဝင် ကြည်ရွာနဲ့ အနီးနားက ရွာသူရွာသား ၂၀၀ ဝန်းကျင် သေဆုံးခဲ့တယ်လို့ သိရပါတယ်။
စစ်ကောင်စီတပ်ဟာ ဒီဇင်ဘာလ အတွင်းမှာ ဒီပဲယင်းမြို့နယ် ကျေးရွာ ၂၂ ရွာက အိမ်ခြေ ၃,၀၀၀ နီးပါးကို မီးရှို့ဖျက်ဆီးခဲ့ပြီး စစ်အာဏာသိမ်းပြီးချိန်ကစလို့ ဒီပဲယင်းမြို့နယ်က အိမ်ခြေ ၄,၀၀၀ ကျော် မီးလောင် ပြာကျ ခဲ့ရတယ်လို့ ဒီပဲယင်းမြို့နယ် ညီနောင်များအဖွဲ့ရဲ့ အချက်အလက်တွေအရ သိရပါတယ်။