မဲခေါင်၊ မေ ၃
အာဏာသိမ်း စစ်ကောင်စီ လက်အောက်ခံ “မြန်မာနိုင်ငံ သတင်းမီဒီယာ ကောင်စီ” ဟာ လွတ်လပ်တဲ့ မြန်မာ မီဒီယာတွေကို ကိုယ်စားမပြုဘူး ဆိုပြီး ပြည်တွင်း၊ ပြည်ပ သတင်းမီဒီယာ ၄၀ ကျော်က တစ်ခဲနက် ရှုတ်ချလိုက်တယ်လို့ ဒီကနေ့ မေလ ၃ ရက်နေ့စွဲနဲ့ မီဒီယာတွေရဲ့ သဘောတူညီမှုနဲ့ ထုတ်ပြန်ထားပါတယ်။
စစ်တပ် အာဏာသိမ်းပြီး နောက်ပိုင်း ထိန်းချုပ်ခံလိုက်ရတဲ့ “မြန်မာနိုင်ငံ သတင်းမီဒီယာ ကောင်စီ” ဟာ လွပ်လပ်ပြီး အမှီကင်းတဲ့ သတင်းမီဒီယာတွေကိုပါ ထိန်းချုပ်ဖို့ ကြိုးစားလာလို့ ပြည်တွင်း၊ ပြည်ပ သတင်းမီဒီယာ ၄၀ ကျော်က “မြန်မာနိုင်ငံ သတင်းမီဒီယာ ကောင်စီ” ကို တစ်ခဲနက် ရှုတ်ချလိုက်တာပါ။
လွတ်လပ်တဲ့ မြန်မာ သတင်းမီဒီယာတွေ အမှီအခိုကင်းတဲ့ ကိုယ်တိုင်ထိန်းညှိမှု ယန္တရား ဖွဲ့စည်းဖို့ ကြိုးစားနေရာ ယန္တရား ပေါ်ပေါက်ရေး အတွက် လုပ်ငန်း ဖော်ဆောင်ရေး အဖွဲ့တစ်ခုကို ဖွဲ့စည်းခဲ့တယ်လို့ ပြောပါတယ်။
ဒါ့ကြောင့် “ဖက်ဒရယ် မြန်မာနိုင်ငံသို့ ရှေးရှူသော မီဒီယာ” ခေါင်းစဉ်နဲ့ ပြည်တွင်းနဲ့ ပြည်ပက လွတ်လပ်တဲ့ သတင်းမီဒီယာတွေက အဋ္ဌမ အကြိမ် တိုင်းရင်း မီဒီယာ ညီလာခံကို နယ်စပ်အနီး တစ်နေရာမှာ ဧပြီလ နောက်ဆုံးပတ် အတွင်း ၃ ရက်တာ ကျင်းပကာ ဖက်ဒရယ် ဒီမိုကရေစီ၊ တိုင်းရင်းသား ပြည်နယ်တွေနဲ့ တိုင်းဒေသကြီးတွေကို အခြေခံတဲ့ လူထု ဝန်ဆောင်မှု မီဒီယာတွေ ပေါ်ပေါက်လာရေး၊ တိုင်းရင်းသား မီဒီယာ မူဝါဒ အဆိုပြုချက်တွေကို တိုင်ပင် ဆွေးနွေးခဲ့ကြတယ်လို့ ဆိုပါတယ်။
ဒီညီလာခံမှာ လွတ်လပ်ပြီး အမှီအခို ကင်းတဲ့ မီဒီယာတွေ အတွက် Facebook နဲ့ Youtube တို့လို အွန်လိုင်း ပလက်ဖောင်းတွေ ကနေ ဝင်ငွေရှာဖွေနိုင်တဲ့ အခွင့်အလမ်းတွေ၊ အနာဂတ် အလားအလာတွေ နဲ့ “မြန်မာနိုင်ငံမှ အသံများကို အာဆီယံဒေသသို့ ချဲ့ထွင်ခြင်း” ဆိုတဲ့ ခေါင်းစဉ်နဲ့ ပြည်သူတွေရဲ့ အသံကို နိုင်ငံတကာက အမှန်တိုင်း သိစေနိုင်ဖို့ ရည်ရွယ်ကာ မြန်မာနိုင်ငံရဲ့ ပကတိ အခြေအနေကို သုံးသပ်ဆွေးနွေးခဲ့ကြတယ်လို့ ထုတ်ပြန်ချက်မှာ ဖော်ပြထားပါတယ်။
စစ်တပ်အာဏာသိမ်းပြီးနောက်ပိုင်း လွတ်လပ်ပြီး အမှီအခိုကင်းတဲ့ မြန်မာမီဒီယာတွေကို စစ်ကောင်စီက ပစ်မှတ်ထား ဖမ်းဆီးခဲ့ရာ လုံခြုံရေး၊ ရပ်တည်မှု အခက်အခဲတွေကြားက သတင်းစာ ဆရာတွေ၊ သတင်းမီဒီယာ အဖွဲ့အစည်းတွေရဲ့ သတင်းတင်ဆက်မှု အခြေအနေကိုလည်း ညီလာခံမှာ အသိအမှတ်ပြုခဲ့တယ်လို့ ဆိုပါတယ်။
အဆိုပါ အဋ္ဌမ အကြိမ် တိုင်းရင်း မီဒီယာ ညီလာခံကို တိုင်းရင်းသားနဲ့ ဒေသဆိုင်ရာ မီဒီယာ အဖွဲ့အစည်း ၁၅ ဖွဲ့နဲ့ ဖွဲ့စည်းထားတဲ့ Burma News International (နိုင်ငံတကာ မြန်မာသတင်း) အဖွဲ့က ဦးဆောင် ကျင်းပခဲ့တာ ဖြစ်ပါတယ်။
MK-007
#MeKongNews
#မီဒီယာကောင်စီ
#BNI
#ဖက်ဒရယ်ဒီမိုကရေစီ
