မဲခေါင် ၊ မေ ၃၀
ညီနောင်မဟာမိတ် ၃ ဖွဲ့ဖြစ်တဲ့ ရခိုင်အဖွဲ့ AA၊ တအာင်းအဖွဲ့ TNLA ၊ ကိုးကန့်အဖွဲ့ MNDAA နဲ့ စစ်ကောင်စီရဲ့ အမျိုးသားစည်းလုံး ညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေး ကော်မတီ (NSPNC) တို့ မနက်ဖြန် မိုင်းလားမှာ တွေ့ဆုံဆွေးနွေးကြမယ်လို့ မိုင်းလားအဖွဲ့ NDAA က ဒီနေ့မှာ သတင်းထုတ်ပြန်ပါတယ်။
ဒါ့အပြင် အဲ့ဒီဆွေးနွေးပွဲမှာ တရုတ်နိုင်ငံ ယူနန်ပြည်နယ် နိုင်ငံခြားရေးရာ အထူးသံတမန် မစ္စတာ ကောပေါင် ကလည်း ဆွေးနွေးပွဲ အောင်မြင်စွာဖြစ်မြောက်ရေးအတွက် တရုတ်နိုင်ငံ ကိုယ်စားလှယ်အဖြစ် ပါဝင်သွားမယ်လို့ ထုတ်ပြန်ချက်မှာဖော်ပြထားပါတယ်။
မနက်ဖြန် မိုင်းလားမှာ ပြုလုပ်မယ့် စစ်ကောင်စီကိုယ်စားလှယ် နဲ့ မဟာမိတ် ၃ ဖွဲ့ ဆွေးနွေးပွဲမှာ ဘယ်အကြောင်းအရာတွေကို ဆွေးနွေးမယ်ဆိုတာကိုတော့ ထုတ်ပြန်ချက်မှာဖော်ပြထားခြင်းမရှိပါဘူး။
မိုင်းလားမှာ ပြုလုပ်မယ့် ဆွေးနွေးပွဲဟာ နယ်မြေကိစ္စတွေ၊ ရခိုင်ပြည်နယ် မိုခါမုန်တိုင်း နောက်ဆက်တွဲ အကူအညီပေးရေးကိစ္စတွေ နဲ့ စစ်ကောင်စီက ပြုလုပ်ချင်တဲ့ ရွေးကောက်ပွဲကိစ္စတွေဟာ ဆွေးနွေးမှုမှာ ပါဝင်လာနိုင်တယ်လို့ မြောက်ပိုင်းမဟာမိတ်အဖွဲ့ဝင်တွေနဲ့ ဖွဲ့စည်းထားတဲ့ ပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီ – FPNCC နဲ့ နီးစပ်တဲ့ သတင်းရင်းမြစ်တစ်ဦးကပြောပါတယ်။
“ကိုးကန့်အဖွဲ့ နဲ့ တအာင်းအဖွဲ့က နယ်မြေကိစ္စတွေ ဆွေးနွေးနိုင်တယ်။ နောက်ပြီးတော့ AA အနေနဲ့က အခုရခိုင်မှာ ဝင်ရောက်လာမယ့် အကူအညီတွေကို စစ်ကောင်စီက ပိတ်ဆို့တာတွေလည်းရှိတော့ ရခိုင်ပြည်နယ် မိုခါ မုန်တိုင်းနောက်ဆက်တွဲကိစ္စတွေကို ဆွေးနွေးနိုင်တယ်” လို့ FPNCC နဲ့ နီးစပ်သူက ပြောပါတယ်။
ဒါ့အပြင် အခု စစ်ကောင်စီ နဲ့ တွေ့ဆုံဆွေးနွေးမယ့် မဟာမိတ် ၃ ဖွဲ့ဟာ ပြည်သူ့ကာကွယ်ရေးတပ်မတော် PDF ကို အကူအညီပေးနေတဲ့ အဖွဲ့တွေဖြစ်တာကြောင့် PDF အပေါ်လည်း သက်ရောက်မှု ရှိနိုင်တယ်လို့ သူက သုံးသပ်ပါတယ်။
“ ၃ ဖွဲ့လုံးက PDF တွေကို အကူအညီပေးနေတာတွေရှိတဲ့အတွက် စစ်ကောင်စီဘက်က အဲ့ဒီကိစ္စနဲ့ပတ်သက်ပြီး ဖိအားပေး ဆွေးနွေးနိုင်တယ်၊ ဒါကြောင့် PDF အပေါ် တစ်စုံတစ်ရာ သက်ရောက်မှုလည်း ရှိချင်ရှိလာနိုင်တယ်” လို့ သူ ကပြောပါတယ်။
ဒါ့အပြင် မနက်ဖြန်တွေ့ဆုံဆွေးနွေးမှုမှာ တရုတ်နိုင်ငံကိုယ်စားလှယ်လည်း တက်ရောက်မှာဖြစ်တဲ့အတွက် ဆွေးနွေးပွဲဖြစ်မြောက်ဖို့ တရုတ်နိုင်ငံက ကြားဝင်ပြီး ဖိအားပေး ဆောင်ရွက်မှုကြောင့် ဆွေးနွေးပွဲဖြစ်လာတာဖြစ်တယ်လို့ သတင်းရင်းမြစ်ကသုံးသပ်ပြောဆိုပါတယ်။
အဲ့ဒီဆွေးနွေးပွဲကို တက်ရောက်ဖို့ ရခိုင်တပ်တော် AA၊ တအာင်းအမျိုးသားလွတ်မြောက်ရေးတပ်မတော် TNLA ၊ မြန်မာအမျိုးသား ဒီမိုကရက်တစ်မဟာမိတ်တပ်မတော် MNDAA ရဲ့ ကိုယ်စားလှယ်တွေဟာ မိုင်းလားမြို့ကို ရောက်ရှိလာပြီဖြစ်တယ်လို့ မိုင်းလားအဖွဲ့ NDAA က ထုတ်ပြန်ပါတယ်။
မနက်ဖြန် မိုင်းလားမှာ ပြုလုပ်မယ့် မဟာမိတ် ၃ ဖွဲ့နဲ့ စစ်ကောင်စီ ကိုယ်စားလှယ် NSPNC တို့ ဆွေးနွေးပွဲနဲ့ပတ်သက်ပြီး TNLA ပြောရေးဆိုခွင့်ရှိသူတွေ နဲ့ ကိုးကန့်အဖွဲ့ MNDAA အဖွဲ့ရဲ့ ဖုန်းတွေကို ဆက်သွယ်မေးမြန်းပေမယ့် ပြန်လည်ဖြေကြားတာမရှိပါဘူး။
စစ်ကောင်စီရဲ့ အမျိုးသားစည်းလုံး ညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေး ကော်မတီ (NSPNC) ကို စစ်တပ်က အာဏာသိမ်းပြီးတဲ့နောက် ဖွဲ့စည်းခဲ့တာဖြစ်ပြီး ဒုတိယဗိုလ်ချုပ်ကြီးရာပြည့် က ဥက္ကဌ ဖြစ်ပါတယ်။
ပြီးခဲ့ မတ်လ ၂၂ ရက်နေ့မှာ မြောက်ပိုင်းမဟာမိတ်အဖွဲ့ဝင်တွေထဲက “ဝ”ပြည်သွေးစည်း ညီညွတ်ရေးပါတီ (UWSP)၊ မိုင်းလား ခေါ် အမျိုးသားဒီမိုကရက်တစ်မဟာမိတ်အဖွဲ့ (NDAA) နဲ့ ရှမ်းပြည်တိုးတက်ရေးပါတီ (SSPP) ကိုယ်စားလှယ်အဖွဲ့ နဲ့ စစ်ကောင်စီရဲ့ ငြိမ်းချမ်းရေးအဖွဲ့ ခေါင်းဆောင် ဒုတိယဗိုလ်ချုပ်ကြီးရာပြည့် ဦးဆောင်တဲ့အဖွဲ့တို့ဟာ နေပြည်တော်မှာ ၃ ရက်တိုင်တိုင် တွေ့ဆုံခဲ့ကြီး ရွေးကောက်ပွဲကိစ္စကို ဆွေးနွေးကြတဲ့ ဖြစ်စဉ်လည်းရှိပါတယ်။
ဒါကြောင့် အခု AA ၊ TNLA ၊ MNDAA မဟာမိတ် ၃ ဖွဲ့နဲ့ စစ်ကောင်စီ ကိုယ်စားလှယ်တွေ မိုင်းလားမှာ တွေ့တာဟာလည်း စစ်ကောင်စီဖက်က ရွေးကောက်ပွဲကိစ္စနဲ့ ပတ်သက်ပြီး ဆွေးနွေးနိုင်တယ်လို့ ရှမ်းပြည်အရေး ကျွမ်းကျင်သူတစ်ဦးက သုံးသပ်ပါတယ်။
ပြီးခဲ့တဲ့ မတ်လ ၁၅ ရက်မှာလည်း ဝ အဖွဲ့UWSP၊ မိုင်းလားအဖွဲ့-NDAA၊ ရှမ်းပြည်တိုးတက်ရေးပါတီ SSPP ၊ ကချင်ပြည်လွတ်လပ်ရေးအဖွဲ့ (KIO)၊ ရက္ခိုင့် တပ်တော် (AA) ၊ တအာင်း အမျိုးသားလွတ်မြောက်ရေးတပ်မတော် (TNLA) နဲ့ မြန်မာအမျိုးသားဒီမိုကရက်တစ် မဟာမိတ်တပ်မတော် (MNDAA) တို့ဟာ ပန်ဆန်းမြို့မှာ ၂ ရက်ကြာ တွေ့ဆုံခဲ့ကြပါတယ်။ အဲ့ဒီ တွေ့ဆုံပြီးတဲ့နောက် မြောက်ပိုင်းမဟာမိတ်အဖွဲ့ဝင် ခေါင်းဆောင် တချို့ဟာ တရုတ် အစိုးရရဲ့အထူးကိုယ်စားလှယ် တိန့်ရှီကျန်နဲ့ တရုတ်နိုင်ငံ ကူမင်းမြို့မှာ တွေ့ဆုံခဲ့ကြပါသေးတယ်။
CJ – 002
#MeKongNews
#TNLA
#AA
#MNDAA
#မိုင်းလား
