မဲခေါင်၊ စက်တင်ဘာ ၁၃
ကရင်နီပြည်နယ်မှာ ပြင်းထန်နေတဲ့ တိုက်ပွဲတွေကြောင့် နေရပ်စွန့်ခွာ ထွက်ပြေးပြီး စစ်ဘေးရှောင် စခန်းတွေမှာ ခိုလှုံနေရတဲ့ ကလေးငယ် အများစုမှာ အာဟာရချို့တဲ့နေတဲ့ လက္ခဏာတွေ ခံစားနေရတယ်လို့ စစ်ဘေးရှောင် ကူညီနေသူတွေက မဲခေါင်သတင်းဌာနကို ပြောပါတယ်။
၂၀၂၁ ခုနှစ် နှောင်းပိုင်းက စတင်ခဲ့တဲ့ ကရင်နီပြည်နယ်က တိုက်ပွဲတွေကြောင့် နေရပ်စွန့်ခွာ ထွက်ပြေးနေရတဲ့ စစ်ရှောင်တွေ အတွက် လိုအပ်တဲ့ စားနပ်ရိက္ခာ၊ ဆေး၀ါးတွေ ရေရှည် မထောက်ပံ့နိုင်လို့ အခုလို အာဟာရ ချို့တဲ့မှုတွေ ဖြစ်ပွားလာတာလို့ စစ်ဘေးရှောင်တွေကို ကူညီနေသူ တစ်ဦးက ဆိုပါတယ်။
လက်ရှိ စစ်ရှောင်စခန်းတွေမှာ စားနပ်ရိက္ခာ မလုံလောက်မှု၊ သန့်ရှင်းတဲ့ရေ ရှားပါးမှုနဲ့ ဆေး၀ါး မလုံလောက်မှု တွေကြောင့် စစ်ရှောင် အားလုံးနီးပါး အာဟာရချို့တဲ့မှုဒဏ် ခံစားနေရတာဖြစ်ပေမဲ့ ကလေးငယ်တွေ ပိုမိုခံစားနေရတယ်လို့ သူကပြောပါတယ်။
“အဓိက ဖြစ်တာတော့ ကလေးတွေမှာ အများဆုံး တွေ့ရတယ်။ အသားဓာတ် လိုအပ်မှုတွေကြောင့်လည်းပါတယ်။ အခြား ဖြည့်စွက် စားသောက်စရာ ဆိုတာလည်း စစ်ရှောင် စခန်းတွေမှာ မရှိဘူး။ ဆေး၀ါးကလည်းနည်း၊ ဆန်တစ်မျိုးတည်းကိုပဲ မနည်းခြိုးခြံ စားသောက်နေကြရတော့ အခုလို ဖြစ်လာတယ် ထင်ပါတယ်” လို့ သူက ရှင်းပြပါတယ်။
အာဟာရချို့တဲ့မှုကို ဆေး၀ါးနဲ့ တစ်ဖက်တစ်လမ်းကနေ ပြန်လည် ကုစားဖို့ အတွက်က စစ်ရှောင်စခန်းတွေမှာ ဆေး၀ါး မလုံလောက်ဘူးလို့ စစ်ဘေးရှောင်တွေကို ကူညီနေတဲ့ နောက်ထပ် ဒေသခံ တစ်ဦးက ဆိုပါတယ်။
အခုလို အာဟာရချို့တဲ့မှုရဲ့ နောက်ဆက်တွဲ ပြဿနာအဖြစ် စစ်ရှောင် ကလေးငယ်တွေ ရောဂါကူးစက်လွယ်မှု၊ အားအင်ကုန်ခမ်းမှုနဲ့ ဦးနှောက် စွမ်းဆောင်ရည် ကျဆင်းမှုတွေ ဖြစ်ပေါ်လာမှာ စိုးရိမ်နေရတယ်လို့ သူကဆိုပါတယ်။
“ကလေးတွေက စာသင်ရတာ နည်းနည်းလေး ခက်လာတယ်။ ထိခိုက်လွယ်လာတာကိုလည်း တွေ့ရပါတယ်။ ဒဏ်ရာလွယ်လွယ်ရပြီး ပျောက်ဖို့ အတွက် အချိန်ပေးနေရတယ်။ အားမရှိတဲ့ ပုံမျိုး၊ မလန်းဆန်းတဲ့ ပုံစံမျိုးတွေလည်း တွေ့ရပါတယ်” လို့ စစ်ရှောင် ကလေးငယ်တွေကို ပညာသင်ကြားပေးနေသူ တစ်ဦးက ရှင်းပြပါတယ်။
ဒီလို အခြေအနေတွေကို အမြန်ဆုံး ကုစား ဖြေရှင်းဖို့ လိုအပ်နေပြီး ကလေးငယ်တွေ အတွက် အဟာရ ဖြည့်စွက်စာတွေ၊ အသားငါးတွေနဲ့ ဆေး၀ါးတွေ အရေးပေါ် လိုအပ်နေတယ်လို့ သူက ထောက်ပြပါတယ်။
ကရင်နီပြည်နယ်မှာ လက်ရှိအချိန်အထိ တိုက်ပွဲတွေ ဆက်တိုက် ဖြစ်ပွားနေတာကြောင့် လူဦးရေ ၂ သိန်းခွဲခန့် နေရပ်စွန့်ခွာ ထွက်ပြေးနေရပြီး ရိက္ခာ၊ မိုးကာ၊ ဆေး၀ါးတွေ အရေးပေါ် လိုအပ်နေလို့ ပြည်သူတွေ အနေနဲ့ ကူညီထောက်ပံ့ပေးဖို့ စစ်ဘေးရှောင် ကူညီနေသူတွေက မေတ္တာရပ်ခံ ထားပါတယ်။
MK-007
#MeKongNews
#ကရင်နီ
#စစ်ဘေးရှောင်
#အာဟာရချို့တဲ့