မဲခေါင်၊ စက်တင်ဘာ ၂၄
ရှမ်းပြည်မြောက်ပိုင်းတွင် တည်နေရာ၊ စီးပွားရေးနှင့် လုံခြုံရေးအရ အရေးပါမှုမြင့်မားသော အခြေခံအဆောက်အအုံ ၄၇ ခုရှိပြီး ထိုအထဲမှ ၁၂ ခု၊ ၂၆ ရာခိုင်နှုန်းကို ကိုးကန့်တပ်ဖွဲ့ -MNDAA က အပြည့်အဝ ထိန်းချုပ်ထားကြောင်း ISP-Myanmar ၏ အစီရင်ခံစာအရ သိရသည်။
ISP-Myanmar၏ ယခုစက်တင်ဘာလထုတ် အစီရင်ခံစာအရ အဆိုပါ အရေးပါမှု မြင့်မားသော အခြေခံအဆောက်အအုံများကို ကိုးကန့်တပ်ဖွဲ့က ၁၂ ခု ၊၂၆ ရာခိုင်နှုန်း၊ စစ်ကောင်စီတပ်တပ်က ၈ ခု၊ ၁၇ ရာခိုင်နှုန်း၊ UWSA က ၅ ခု၊ ၁၁ ရာခိုင်နှုန်း၊ ညီနောင်မဟာမိတ်အဖွဲ့က ၃ ခု၊ ၆ ရာခိုင်နှုန်းနှင့် TNLA က ၂ ခု၊ ၄ ရာခိုင်နှုန်း အသီးသီး အပြည့်အဝ ထိန်းချုပ်ထားသည်။
ထို့အပြင် အရေးပါမှုမြင့်မားသော အခြေခံအဆောက်အအုံ ၄၇ ခုထဲမှ ၁၀ ခု၊ ၂၁ ရာခိုင်နှုန်းမှာ စစ်ကောင်စီတပ်အပါအဝင် တိုင်းရင်းသားလက်နက်ကိုင်အဖွဲ့များအကြား ထိန်းချုပ်နိုင်ရေးအတွက် အားပြိုင်နေသော အခြေအနေရှိသည်ဟု ISP-Myanmar က ဖော်ပြထားသည်။
အဆိုပါ အရေးပါမှုမြင့်မားသည့် အခြေခံအဆောက်အအုံများတွင် မြန်မာ-တရုတ် နယ်စပ်ကုန်သွယ်ရေးဂိတ်များအပြင် တရုတ်နိုင်ငံနှင့် ကုန်သွယ်ရေးလမ်းကြောင်းများကို ချိတ်ဆက်ထားသော လမ်းပိုင်းများ ပါဝင်သည်။
ယခုအချက်အလက်များသည့် ရှမ်းပြည်မြောက်ပိုင်း မြို့နယ် ၂၄ ခုအတွင်းရှိ အခြေခံအဆောက်အအုံ စုစုပေါင်း ၄၇၂ ခုကို ISP-Myanmarက လေ့လာထားခြင်းဖြစ်ပြီး အဆိုပါ အဆောက်အအုံများထဲတွင် လမ်း၊ တံတားနှင့် နယ်စပ်ကုန်သွယ်ရေးစခန်းများလည်း ပါဝင်သည်။
ထိုအခြေခံအဆောက်အအုံ ၄၇၂ ခုများကို TNLAက ၁၃၀ ခု၊ ၂၈ ရာခိုင်နှုန်းဖြင့် အများဆုံး အပြည့်အဝ ထိန်းချုပ်ထားပြီး စစ်ကောင်စီတပ်က ၈၃ ခု၊ ၁၈ ရာခိုင်နှုန်းနှင့် MNDAAက ၆၀ ခု၊ ၁၃ ရာခိုင်နှုန်း ထိန်းချုပ်ထားကြောင်းလည်း ISP-Myanmar က ဆိုသည်။
ထို့အပြင် စစ်ကောင်စီတပ်၊ MNDAA၊ TNLA၊ KIA၊ UWSA နှင့် SSPP/SSA အပါအဝင် လက်နက်ကိုင်အဖွဲ့များအကြား ထိန်းချုပ်နိုင်ရေးအတွက် အားပြိုင်နေသော အခြေခံအဆောက်အအုံမှာ ၇၄ ခု၊ ၁၆ ရာခိုင်နှုန်းရှိသည်။
စစ်ကောင်စီတပ်၊ MNDAA၊ SSPP၊ UWSA နှင့် ညီနောင်မဟာမိတ်အဖွဲ့ အပါအဝင် လက်နက်ကိုင်အဖွဲ့များအကြား တရားဝင်သဘောတူညီချက်မဟုတ်သော်လည်း ညှိနှိုင်းမှု သို့မဟုတ် မျှဝေထိန်းချုပ်မှုသဘောမျိုးဖြင့် ထိန်းချုပ်ထားသော အခြေခံအဆောက်အအုံ ၇၄ ခု၊ ၁၆ ရာခိုင်နှုန်းလည်း ရှိသည်။
ISP-Myanmar၏ လေ့လာချက်အရ တရုတ်ကုမ္ပဏီများ အကောင်အထည်ဖော်နေသော စက်ရုံအချို့ကို စစ်ကောင်စီတပ်က ထိန်းချုပ်ထားနိုင်သော်လည်း တရုတ်နိုင်ငံနှင့် ကုန်သွယ်ရေးအတွက် မဟာဗျူဟာအရ အရေးပါပြီး စီးပွားရေးအကျိုးစီးပွားနှင့် ဆက်စပ်မှုများပြားသော အဆောက်အအုံများ၊ စီမံကိန်းနေရာများနှင့် လမ်းပိုင်းများမှာ တိုင်းရင်းသားလက်နက်ကိုင်အဖွဲ့များ၏ ထိန်းချုပ်မှုအောက်တွင် ရှိနေသည်ဟုISPကဆိုသည်။
ထူးခြားချက်တစ်ရပ်အနေဖြင့် ရှမ်းမြောက်တွင် အရေးပါမှုမြင့်မားသော အခြေခံအဆောက်အအုံများအနက် KIA နှင့် SSPP/SSAတို့က တစ်ခုကိုမျှ အပြည့်အဝ ထိန်းချုပ်ထားနိုင်ခြင်းမရှိသည်ကိုလည်း တွေ့ရသည်ဟု အစီရင်ခံစာတွင် ဆိုသည်။
ယခုအချက်အလက်များ ၂၀၂၆ ခုနှစ် မတ်လ ၁၈ ရက်အထိ ရရှိထားသော အချက်အလက်များအပေါ် အခြေခံထားခြင်းဖြစ်ပြီး ISP-Myanmar က အများပြည်သူ လွတ်လပ်စွာ ရယူကြည့်ရှုနိုင်သော ရင်းမြစ်များကို အသုံးပြု၍ လေ့လာထားခြင်း ဖြစ်သဖြင့် ဒေတာရရှိမှု အကန့်အသတ်နှင့် နည်းနာပိုင်းဆိုင်ရာ ကွဲပြားမှုများကြောင့် အချက်အလက်အချို့တွင် ကွဲလွဲမှုများ ရှိနိုင်ကြောင်းလည်း ISP-Myanmar က အသိပေးထားသည်။
#MeKongNews
#ရှမ်းမြောက်
#ကိုးကန့်
#အဆောက်အဦ
#MNDAA
#ထိန်းချုပ်
