မဲခေါင်၊ ဇွန် ၁၉
ဇွန် ၁၈ ရက်ညပိုင်းက ဒုံးကျည်ပေါင်း ၃၇၀ ဝန်းကျင်ဖြင့် အစ္စရေးနိုင်ငံသို့ အီရန်ဘက်မှ ပစ်ခတ်ခဲ့ပြီး နောက် အီရန်အား အစ္စရေးဘက်မှ ဝင်တိုက်ရန် အမေရိကန် သမ္မတ ဒေါ်နယ်ထရမ့်နှင့် စစ်ဘက်ရေးရာ အကြီးအကဲများ မိနစ် ၈၀ ကြာအရေးပေါ် အစည်းအဝေးလုပ်ကာ ၂၄ နာရီနှင့် ၄၈ နာရီအတွင်း စစ်ပွဲထဲ ပါဝင်မည့် အရေး ဆုံးဖြတ်သွားမည်ဟု သိရသည်။
အီရန်ခေါင်းဆောင် ခါမီနီက အမေရိကန် ဝင်တိုက်ခိုက်လျှင်လည်း မည်သည့်အခါတွင်မှ လက်နက်ချ အညံ့ခံမည်မဟုတ်ဘဲ ဗုံးတစ်လုံးမျှသာ မိမိနိုင်ငံအပေါ် ကျဲလျှင် အမေရိကန် ငရဲကျစေရမည်ဟုပါ ခြိမ်းခြောက်ပြောဆိုသွားခဲ့သည်။
ဒေါ်နယ်ထရမ့်ဘက်ကလည်း သံတမန်နည်းလမ်းဖြင့် စစ်ပွဲရပ်တန့် စေရန် ဦးစွာဆွေးနွေးမည်ဖြစ်ကာ ခါမီနီဘက်မှ နျူကလီးယားဖျက်သိမ်းရေး လက်မခံလျှင် ၂၄ နာရီ နှင့် ၄၈ နာရီကြား အီရန်ကို ဝင်တိုက်ခိုက်ရေး ဆုံးဖြတ်သွားမည်ဟု ဆိုသည်။
ဒေါ်နယ်ထရမ့်က လက်ရှိ အီရန်ခေါင်းဆောင် ခါမီနီမည်သည့်နေရာတွင် ပုန်းနေသည်ဆိုခြင်းအား သိရှိ ထားကြောင်း၊ ထိုစကားက ခါမီနီကို ခုချက်ချင်း ရှင်းလင်းမည်ဟု ဆိုလိုခြင်းမျိုးတော့ မဟုတ်သေးကြောင်း ၊မည်သည့်အခါမျှ လက်နက်မချဟု ခါမီနီဆိုသည့်စကားအတွက် ကံကောင်းပါစေ (Good luck) ဟု တုံ့ပြန်ခြင်းအရ လာမည့် ၂ ရက်အတွင်း အီရန်ကို ဝင်တိုက်ခိုက်ဖွယ်ရှိနေသည်ဟု သတင်းများ ကျယ်ကျယ်ပြန့်ပြန့် ထွက်ပေါ်လာသည်။
လက်ရှိ အီရန်၏ အရေးအပါဆုံး နျူကလီးယားဆိုက် Fordow သည် ကျောက်သားထုများအောက် ပေ ၃၀၀ အနက်တွင် တည်ဆောက်ထားရာ အစ္စရေး၌ ထိုအနက်အထိ ထိုးဖောက်ဝင်ရောက် ဖျက်ဆီးနိုင် သော လက်နက်မရှိဟု ဆိုသည်။
ထို့ကြောင့် အမေရိကန်သည် တီဟီရန်နှင့် ၁၂၅ မိုင်အတွက်တွင် ရှိသော Fordow နျူကလီးယားဆိုက်ကို မြေအောက် ပေ ၂၀၀ အနက်အထိ ထိုးခွဲဝင်ရောက်ပြီး ပေါက်ကွဲစေနိုင်သော Massive Ordnance Penetrator (MOP) ဗုံးဖြင့် ကြဲချဖျက်ဆီးရန်လည်း ရှိနေ ကြောင်း သိရသည်။ အဆိုပါ MOP ဗုံးသည် ပေ ၂၀ ရှည်ကာ အလေးချိန် ပေါင် ၃၀၀၀၀ ရှိပြီး အီရန် နျူကလီးယားဆိုက်ကို ဖျက်ဆီးနိုင်စွမ်းရှိသော တစ်ခုတည်းသော လက်နက်ဟု ဆိုသည်။
ကိုကလင်း
Ref: Thesun
#MeKongNews
#အီရန်
#အမေရိကန်
#ဒေါ်နယ်ထရမ့်
#ခါမီနီ
