မဲခေါင်၊ မေ ၉
ရှမ်းပြည်နယ် တောင်ပိုင်း၊ တောင်ကြီးခရိုင်၊ ပအိုဝ်း ကိုယ်ပိုင်အုပ်ချုပ်ခွင့်ရဒေသ၊ ကျောက်တလုံးကြီးမြို့နယ်၊ ကက္ကူရွာမှာရှိတဲ့ မွေတော်ကက္ကူဘုရားမှာ ဒီနှစ်ပိုင်း အတွင်း သက်တမ်းရင့် ညောင်ပင်ကြီးတွေ ပြိုလဲမှု မကြာခဏ ဖြစ်နေတာကြောင့် သတိပြုကြဖို့ ဒေသခံတွေက ဘုရားဖူးတွေကို တိုက်တွန်းလိုက်ပါတယ်။
မွေတော်ကက္ကူဘုရားဟာ တောင်ကြီးမြို့ကနေ ကားနဲ့ တစ်နာရီခွဲခန့်သာ သွားရတာကြောင့် ခရီးသွားများစွာ လာရောက်တဲ့ အထင်ကရနေရာ ဖြစ်ကာ မေလ ၆ ရက်က ဘုရားဖူးကား တစ်စီးပေါ် ညောင်ပင် တစ်ပင် ပြိုလဲခဲ့တယ်လို့ ဒေသခံ အမျိုးသမီး တစ်ဦးက ပြောပါတယ်။
“ဧည့်သည်တွေ ဘုရားပေါ် ရောက်ချိန်ဆိုတော့ အရိပ်ရတဲ့ နေရာ ရှာရပ်ကြတာ။ သစ်ပင် သက်တမ်းတွေက များပြီဆိုတော့ ဂရုစိုက်သင့်တယ်။ ရပ်ဝေး ဧည့်သည်တွေကို ပိုဂရုစိုက်သင့်၊ သတိပေးသင့်တယ်” လို့ သူက ပြောပါတယ်။
ဘုရားရင်ပြင်ရှေ့မှာ သက်တမ်း နှစ် ၁၀၀ ကျော်ပြီဖြစ်တဲ့ ညောင်ပင် ၇၀ ခန့်ရှိပြီး ဘုရားဖူးတွေ အနားယူဖို့ ညောင်ပင် ခြေရင်း ပတ်လည်မှာ ခုံတွေ ပြုလုပ်ပေးထားတာကြောင့် ကားသမားများ အနားယူလေ့ ရှိသလို ကားတွေကို အရိပ်ရတဲ့ ညောင်ပင်တန်းအောက်မှာ ရပ်လေ့ရှိတာကြောင့် အခုလို သတိပေးရတာလို့ ဆိုပါတယ်။
သက်တမ်းရင့် ညောင်ပင်ကြီးတွေဟာ လွန်ခဲ့တဲ့ ၄ နှစ်ကစကာ အလွယ်တကူ ကျိုးကျလေ့ရှိပြီး ၂၀၁၉ ခုနှစ်မှာ အမြင့်ပေ ၈၀ ခန့်ရှိတဲ့ ညောင်ပင် တစ်ပင် အမြစ်မှ ကျွတ်ပြီး လဲကျတာကြောင့် လူတစ်ဦး ထိခိုက်ကာ ဂေါပကရုံး ပျက်စီးခဲ့ရသလို ၂၀၂၀ ခုနှစ်မှာလည်း မိုးရေကြောင့် အမြစ်များ ဆွေးမြေ့ပြီး လဲကျခဲ့တဲ့ မှတ်တမ်းတွေ ရှိတယ်လို့ ဒေသခံတွေက ပြောပါတယ်။
ရှေးဟောင်းသုတေသနနဲ့ သမိုင်းပညာရှင် ဒေါက်တာသန်းထွန်း ကတော့ မွေတော်ကက္ကူဘုရားကို ခရစ်နှစ် ၁,၈၀၀ ခန့်က ယွန်းရှမ်းလူမျိုးတွေ တည်ထားခဲ့ဟန်ရှိတယ်လို့ ဘုရားမှာ တွေ့ရသော နတ်ရုပ် တွေရဲ့ အနေအထားကို ကြည့်ပြီး သုံးသပ်ထားပါတယ်။
ညောင်ပင်တွေ စိုက်ခဲ့တဲ့ မှတ်တမ်းကို သီးခြား မတွေ့ရပေမယ့် ဒေသခံတွေ အဆိုအရ အနည်းဆုံး နှစ် ၁၀၀ ခန့်ရှိပြီလို့ ဆိုပါတယ်။
ပအိုဝ်းကိုယ်ပိုင် အုပ်ချုပ်ခွင့်ရဒေသထဲမှာ ရှိတဲ့ မွေတော်ကက္ကူဘုရားကို ရှေးဟောင်း သာသနာ့နယ်မြေ အဖြစ် သတ်မှတ်ပြီး ပအိုဝ်းပြည်သူ့စစ်-PNO က လုံခြုံရေး ယူထားပေမယ့် အခုလို ညောင်ပင်တွေ ကျိုးကျလို့ ဘုရားဖူးတွေနဲ့ ယာဉ်တွေ ထိခိုက်တာ မဖြစ်အောင် သတိပေးတာတွေတော့ မရှိပါဘူး။
အခုနှစ် နွေရာသီမှာ နမ့်ဗေး ရေတံခွန်ကို လာလည်ရင်း ၁၅ မိနစ်သာဝေးတဲ့ မွေတော်ကက္ကူဘုရားကို ဝင်ဖူးကြသူတွေနဲ့ စည်းကားနေပြီး ဒေသထွက်ကုန်များ ရောင်းချတဲ့ ကက္ကူဈေးအပြင် ဘုရားရှေ့က ညောင်ပင်တန်းကြီးအောက်မှာ အနားယူသူတွေနဲ့ စည်ကားနေတာ ဖြစ်ပါတယ်။
CJ – 001
#MeKongNews
#မွေတော်ကက္ကူ
#ပအိုဝ်းပြည်သူ့စစ်
#ညောင်ပင်