မဲခေါင်၊ နိုဝင်ဘာ ၁၄
စက်သုံးဆီလုပ်ငန်းရှင်တွေကို ခွဲတမ်း လျော့ချလိုက်တာကြောင့် ရန်ကုန်မှာ စက်သုံးဆီပြတ်လပ်မှုနဲ့ ကြုံတွေနေရတယ်လို့ စက်သုံးဆီ အသိုင်းအဝန်းကစုံစမ်းသိရှိရပါတယ်။
နိုဝင်ဘာလ ၁၁ ရက်နေ့မှစတင်ကာ ရန်ကုန်မြို့အပါအဝင် အခြားမြို့တွေမှာ ဆီပြတ်လပ်ပြီး လုပ်ငန်းလည်ပတ်ရန် အခက်ခဲတွေနဲ့ကြုံတွေ့နေရပြီး ဆီဆိုင်များတွင်လည်း ကားတန်းရှည်ကြီးများနဲ့ စောင့်ဆိုင်းနေရပါတယ်။
“အရင်က စစ်တပ်ကိုတရားဝင်ဆီသွင်းဖို့ ကုမ္မဏီ ၃ ခုနာမည်ခံထားတယ်။ အခုက အခြားမထင်မရှား တွေရှိလာတယ်၊ ဒီနေ့ ခွဲတမ်းမပေးတော့ဘူး ရက်ရွေ့ဆိုင်းတယ်၊ အခုက ဆီတွေအခြားနေရာမှာအသုံးပြုဖို့ဆိုတဲ့ ရည်ရွယ်ချက်လည်းပါတယ်၊ မူဝါဒကလည်းနေ့စဉ်နဲ့အမျှပြောင်းလဲနေတာ” လို့ အမည်မဖော်လိုသူ ဆီလုပ်ငန်းရှင်တစ်ဦးကပြောပါတယ်။
ပုံမှန်အားဖြင့် ဆီဆိုင်တစ်ဆိုင်ကို ဆီခွဲတမ်းအနေနဲ့ ဘောက်ဆာ ၂ စီး ရရှိပေမယ့် ယခု တစ်စီးသာပေးပြီး ယနေ့မှာတော့ ခွဲတမ်းရရှိမှုမရှိဘူးလို့လည်း သိရပါတယ်။
ရန်ကုန်မြို့မှာ စက်သုံးဆီအရောင်းဆိုင် ၁၄၆ ဆိုင်ရှိပြီး နိုဝင်ဘာလ ၁၁ ရက်နေ့မှစတင်ကာ ဆီခွဲတမ်းရရှိမှုလျော့ချခြင်း၊ ခွဲတမ်းမရခြင်းတွေကြောင့် ဆီပြတ်လပ်မှုတွေ ရှိနေတာလည်း ဖြစ်ပါတယ်။
အဲ့ဒီလို ဆီပြတ်လပ်မှုနဲ့ပတ်သက်ပြီး စစ်ကောင်စီ ရဲ့ ပြောရေးဆိုခွင့်ရှိသူ ဇော်မင်းထွန်းက ဆီကအလုံလောက်အလောက်ရှိပြီး၊ ရန်ကုန်အပါအဝင် မြို့ကြီးတွေမှာဆီပြတ်လပ်မှုရှိတယ်လို့ ကောလဟလ ဖြန့်ဝေတာတွေပြုလုပ်နေပြီး ဘယ်စက်သုံးဆီ အမျိုးအစားကိုမဆို တစ်လအရန်ရှိအောင်အမြဲတမ်းဆောင်ရွက်နေတယ်လို့ ပြောဆိုထားပါတယ်။
ဆီလုပ်ငန်းရှင်တစ်ဦးက “ခွဲတမ်းအပြည့်အဝပေးတယ်ဆို ၊ဆီဆိုင်တွေမှာ ကားတွေစီတန်းစရာအကြောင်းမရှိဘူး၊ သတင်းတွေမှာပြောတာကတစ်မျိုး လက်တွေ့ကတစ်မျိူးဖြစ်နေတယ်၊ ခွဲတမ်းက သူတို့နဲ့ပဏာသင့်တဲ့သူမဟုတ်ရင် လုံးဝကိုမရပါဘူး” လို့ ပြောပါတယ်။
ရန်ကုန်မြို့တွင်းရှိ စက်သုံးဆီအရောင်းဆိုင်အချို့မှာ ဓာတ်ဆီဝယ်မရသည့်အခက်အခဲများရှိနေတယ်လို့ အငှားယာဉ်မောင်းတွေရဲ့ပြောပြချက်အရ သိရပါတယ်။
“၃ရက်ရှိပြီ ဆီထည့်လို့မရတာ၊ ဆိုင်တွေလိုက်ပတ်ထည့်နေတာ ကားတန်းက အစီးရာကျော်တယ်၊ ညအိပ်စောင့်ထည့်နေရတယ်၊ ဈေးကအရမ်းတက်မလာပေမယ့် ဆီကိုမရတာ၊ တန်းစီရင်းနဲ့ ကိုယ့်အလှည့်ရောက်ခါမှမရဘူးဆိုတာတွေလည်း ကြုံနေရတယ်၊ လုံးဝမရတော့ရင် ရတဲ့နေရာမှာ မှောင်ခိုရောင်းတာတွေကို ဈေးကြီးပေးဝယ်နေရတယ်” လို့သုဝဏ္ဏမြို့နယ်နေသူ အဌားယာဉ်မောင်းတစ်ဦးကပြောပါတယ်။
စစ်ကောင်စီလက်အောက်ခံ စက်သုံးဆီတင်သွင်း သိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက စက်သုံးဆီ သိုလှောင်ထားတဲ့ Terminal (၃)ခုမှ အရောင်းဆိုင်တွေကို ဖြန့်ဖြူးနိုင်မှု စွမ်းအားအလျင်မမှီခဲ့တာကြောင့် ဆီ ပြတ်လတ်မှုဖြစ်ပေါ်ခဲ့ပြီး Urgent စနစ်ဖြင့် ဖြည့်တင်းခဲ့တယ်လို့ ပြောဆိုထားပါတယ်။
စက်သုံးဆီလုံလောက်မှုရှိအောင် စီမံထားပြီး လက်ရှိ အများသုံးဓာတ်ဆီ 92 RON ဂါလံ (၁၃)သန်းကျော်၊ 95 RON ဂါလံ ၃ သန်းကျော်၊ 97 RON ၁ ဒသမ ၄ သန်းကျော်၊ ရိုးရိုးဒီဇယ် ၂၉ သန်းကျော်နှင့် ပရီမီယမ်ဒီဇယ် သန်း ၂၀ ကျော် ကျန်ရှိပြီး ပြတ်လပ်မှု မရှိစေအောင်ဆောင်ရွက်နေတယ်လို့ သိရပါတယ်။
MK-006
#MeKongNews
#စက်သုံးဆီ
#ပြတ်လပ်
#ရန်ကုန်
#ခွဲတမ်း
