မဲခေါင်၊ စက်တင်ဘာ ၂၉
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ သပြေပင်သစ် အမှတ် (၃) ကျေးရွာနေ မိသားစုကို စစ်ကောင်စီ ဖမ်းဆီးထားတာ တစ်လကျော် ကြာပြီးနောက် စက်တင်ဘာ ၂၇ ရက်နေ့က နေအိမ်ကိုပါ ချိပ်ပိတ်သွားတယ်လို့ စုံစမ်းသိရှိရပါတယ်။
အဲ့ဒီ မိသားစု ၄ ဦးကို ဩဂုတ်လ ၂၈ ရက်ညမှာ စစ်ကောင်စီက ဖမ်းဆီးခဲ့တာဖြစ်ပြီး သားနဲ့ သမီး ဖြစ်သူကို ဩဂုတ်လ ၃၁ ရက်နေ့မှာ ပြန်လွှတ်ပေးခဲ့ပေမယ့် မိဘ ၂ ဦးကိုတော့ အခုအချိန်ထိ ဖမ်းဆီးထားတဲ့အပြင် နေအိမ်ကိုပါ ချိပ်ပိတ်ခဲ့တာ ဖြစ်ပါတယ်။
“ပစ္စည်းသိမ်းခွင့်ကို ၃ ရက် အချိန်ပေးပြီး ၂၇ ရက်မှာ နေအိမ်ကို ချိပ်ပိတ်သွားတယ်လေ” လို့ အင်းလေး ဒေသခံ တစ်ဦးက ပြောပါတယ်။
စစ်ကောင်စီက အခုလို နေအိမ်ကို ချိပ်ပိတ်လိုက်တဲ့ အတွက် ပြန်လွတ်လာတဲ့ ကလေး ၂ ဦးဟာ အဖွားဖြစ်သူရဲ့ နေအိမ်မှာ သွားရောက် နေထိုင်နေရတယ်လို့ ဒေသခံတွေက ပြောပါတယ်။
“မိဘ ၂ ပါးက ခုထိ မလွတ်သေးဘူး။ ပိုပြီးဆိုးတာက အိမ်ကို ချိပ်ပိတ်လိုက်တယ် ဆိုတာပဲ။ မိဘ ၂ ပါး မရှိလို့ ခိုကိုးရာမဲ့နေပါတယ်ဆို အိမ်ပါ နေစရာမရှိ ဖြစ်သွားတဲ့ အဖြစ်။ ဒီမတရားတဲ့ အဖြစ်ကို ဘယ်သူမှလည်း မကယ်နိုင်ဘူး။ ဘာမှလည်း လုပ်လို့မရဘူး။ ဒီအတိုင်း လက်ပိုက်ကြည့်နေကြရတယ်” လို့ အင်းလေး ဒေသခံ အမျိုးသမီး တစ်ဦးက ပြောပါတယ်။
ပြီးခဲ့တဲ့ ဩဂုတ်လ ၂၈ ရက်ညမှာ သပြေပင်ကျေးရွာနေ ကိုအောင်မျိုးဝင်း နဲ့ မမြအေး တို့ ဇနီးမှောင်နှံနဲ့ ကလေး ၂ ဦးကို စစ်ကောင်စီ စက်လှေ ၂ စီး၊ အင်အား ၁၀ ဦးကျော်နဲ့ နေအိမ်မှာ လာရောက် ဖမ်းဆီးသွားခဲ့တာ ဖြစ်ပါတယ်။
အဲဒီလို ဖမ်းဆီးရာမှာ စစ်ကောင်စီတပ်ကို အင်းလေး ပျူစောထီးတွေ လမ်းပြပေးတဲ့အပြင် ကူညီ ဖမ်းဆီးပေးခဲ့တယ်လို့ ဒေသခံတွေက ပြောပါတယ်။
အာဏာသိမ်းပြီးနောက်ပိုင် စစ်ကောင်စီတပ်၊ အင်းလေး ပျူစောထီးနဲ့ PNO ပြည်သူ့စစ်တွေ အင်းလေး ဒေသမှာ ပြည်သူလူထုကို မတရား အနိုင်ကျင့်၊ နှိပ်စက်မှု တစ်နေ့ထက်တစ်နေ့ ပိုမို ဆိုးရွားလာတယ်လို့ JMC- Innlay မှ ဒါရိုက်တာ မယုလှိုင်သင်းက ပြောဆိုထားပါတယ်။
CJ-002
#MeKongNews
#အင်းလေး
#ချိပ်ပိတ်
#ပျူစောထီး
