မဲခေါင်၊ မေ ၉
တနင်္သာရီတိုင်း၊ သရက်ချောင်းမြို့နယ်မှ ပဲဒက်ရွာမှ စစ်ကောင်စီနဲ့ ပျူစောထီးစခန်းကို ကရင်အမျိုးသားလွတ်မြောက်ရေးတပ်မတော် (KNLA) နဲ့ PDF တို့ မေ ၅ ရက်က ဝင်တိုက်ခိုက်မှုမှာ စစ်ကောင်စီအဖွဲ့ ၂၆ ယောက်ကို အရှင်ဖမ်းမိပြီး လက်နက်တွေလည်း သိမ်မိတယ်လို့ သိရပါတယ်။
၄ ရက်ကြာတိုက်ခိုက်ခဲ့ရတဲ့ အဲ့ဒီစခန်းကို မနေ့ မေ ၈ ရက်မနက်ပိုင်းမှာ အပြီးသတ် တိုက်ခိုက် သိမ်းပိုက်နိုင်ခဲ့တယ်လို့ သိရပါတယ်။
အဲ့ဒီ့စခန်းကို တိုက်ခိုက်ချိန်မှာ စစ်ကောင်စီရေတပ်မှ လက်နက်ကြီး ၁၃ ကြိမ်၊ လေကြောင်းပစ်ကူ အကြိမ် ၂၀ နဲ့ ဗုံးအလုံး ၁၀၀ ခန့်ကြဲချခဲ့တဲ့ကြားမှ သိမ်းပိုက်နိုင်ခဲ့တာလို့ သိရပါတယ်။
“အရှင်ဖမ်းမိသူတွေထဲမှာတော့ စခန်းတက်သိမ်းချိန် သေမှာစိုးလို့ လက်နက်ချ အညံ့ခံ လက်မြှောက်သူ၊
ထွက်ပြေးလို့ ပြန်ဖမ်းမိသူတွေ ပါဝင်ပါတယ်” လို့ တနင်္သာရီ စစ်ဌာန ပြောရေးဆိုခွင့်ရှိသူက မဲခေါင်သတင်းဌာနကို ပြောပါတယ်။
ဖမ်းမိသူတွေဟာ စစ်ကောင်စီတပ်ဖွဲ့ဝင်တွေလား၊ ပျူစောထီးအဖွဲ့ဝင်တွေလား ဆိုသည်ကိုတော့ သေချာမစိစစ်ရသေးဘူးလို့ သူက ဆက်ပြောပါတယ်။
စစ်ကောင်စီတပ် ၂၆ ယောက်နဲ့အတူ လက်နက် ၃၀ နဲ့ ခဲယမ်းမီးကျောက်တွေကို သိမ်းပိုက်မိခဲ့တယ်လို့လည်း သိရပါတယ်။ ပူးပေါင်းအဖွဲ့တွေဘက်ကလည်း ၂ ဦး ကျဆုံံးပြီး ၆ ဦး ဒဏ်ရာရခဲ့တယ်လို့ ဆိုပါတယ်။
ဆုံးရှုံးသွားတဲ့စခန်း ပြန်ရဖို့ စစ်ကောင်စီက ကြည်း၊ရေ၊ လေ သုံးကာ ရှိသမျှနဲ့ ပြန်လည်တိုက်ခိုက်နေလို့ အဲ့ဒီဒေသတဝိုက်မှာ စစ်ရေးရှုပ်ထွေးနေတယ်လို့ ဆိုပါတယ်။
အဲ့ဒါကြောင့် ထားဝယ်နဲ့ တနင်္သာရီတိုင်းအတွင်းမှ ပြည်သူများအနေနဲ့ လေကြောင်းရန်ကာကွယ်ရေးတွေ လုပ်ဆောင်ထားကြဖို့လည်း တနင်္သာရီတိုင်း စစ်ဌာနက သတိပေးထားပါတယ်။
MK-001