မဲခေါင်၊ မေ ၁၀
ကရင်နီပြည်၊ ဘောလခဲမြို့ နယ်မှာ စစ်ကောင်စီရဲ့ ရိက္ခာတင်ကားတစ်စီးကို မိုင်းဆွဲတိုက်ခိုက်နိုင်ခဲ့ တယ်လို့ ကရင်နီတော်လှန်ရေးသတင်းအရင်းအမြစ်တွေက ပြောပါတယ်။
ဖားဆောင်းနဲ့ ဘောလခဲကြားမှာရှိတဲ့ စစ်တပ်အခြေစိုက် ထူးချောင်းစခန်းအနီး မေလ ၆ ရက်နေ့မှာ တော်လှန်ရေးအင်အားစုတွေ တပ်ဆင်ထားတဲ့မိုင်းကို နင်းမိခဲ့တာ ဖြစ်ပါတယ်။
ဘောလခဲ PDF ရဲ့ ပြန်ကြားရေးတာဝန်ခံတစ်ဦးက “လေယာဥ်ပျက်ကျပြီးမှ နောက်ထပ်ဖြစ်တာကျတော့ ရိက္ခာကားပေါ့၊ ရဟတ်ယာဉ် ပျက်ကျတဲ့နေရာလို့ ပြောကြတယ်ပေါ့၊ တကယ်က မဆိုင်ဘူး၊ ရဟတ်ယာဥ် ပျက်ကျတဲ့နေရာကို သွားရင်းနဲ့ မိုင်းဆွဲခံရတာမဟုတ်ဘူး၊ ရဟတ်ယာဥ်ပျက်ကျတဲ့နေရာက တစ်နေရာ၊ မိုင်းနင်း မိပြီး ကားတွေပေါက်ကွဲတဲ့ဥစ္စာက တစ်နေရာပေါ့နော်၊ ဘောလခဲ နယ်ထဲတော့ နယ်ထဲပဲ၊ လမ်းချင်းမတူဘူးပေါ့” လို့ ပြောပါတယ်။
လက်ရှိအချိန်မှာ နယ်မြေရှင်းလင်းရေးမလုပ်ရသေးတာကြောင့် ထိခိုက်သေဆုံးမှုစာရင်းကို မသိရသေးပေမဲ့ ဒရုန်းကနေတဆင့် ကိုယ်ခန္ဓာအစိတ်အပိုင်းတွေနဲ့အတူ ကားနဲ့ ရိက္ခာပစ္စည်းဆုံးရှုံးမှုတွေကို အတည်ပြုထားတယ်လို့ ဆိုပါတယ်။
“ကျနော်တို့ ရထားတဲ့ သတင်းအရဆိုရင် အဲဒီနေရာက စစ်ကောင်စီ ရိက္ခာပို့တဲ့ လမ်းကြောင်းပေါ့၊ ပြည်သူတွေလည်း အဲ့လမ်းကိုမသုံးကြဘူး၊ ဒါကြောင့်လည်း စစ်ဆင်ရေးဖော်ဆောင်တာ” လို့ ဘောလခဲ PDF ရဲ့ ပြန်ကြားရေးတာဝန်ခံတစ်ဦးက ဆက်ပြောပြပါတယ်။
အဲ့ဒီစစ်ဆင်ရေးကို ကရင်နီလူမျိုးပေါင်းစုံလွတ်မြောက်ရေးတပ်ဦး (ကလလတ-KNPLF)၊ ကရင်နီတပ်မတော် (KA)၊ ဘောလခဲ PDF တို့က ပူးပေါင်းဖော်ဆောင်ခဲ့တာဖြစ်ပြီး အရင်လတွေတုန်းကလည်း အဲ့ဒီနေရာမှာပဲ စစ်ကောင်စီရဲ့ ရိက္ခာတင်ကားတစ်စီးကို မိုင်းဆွဲတိုက်ခိုက်နိုင်ခဲ့တယ်လို့ သိရပါတယ်။
ဧပြီလ ၁၂ ရက်နေ့က ဖြစ်ပွားခဲ့တဲ့ ဖားဆောင်းမြို့ ပေါ်တိုက်ပွဲမှာ စစ်ကောင်စီဖက်က ၆၀ ကျော် သေဆုံးကာ ၅၆ ဦး ဖမ်းဆီးခံလိုက်ရပြီး ဘောလခဲ PDF ဖက်က ရဲဘော် ဖကေ (ခ) ကလဲ့ဒိုထူး ကျဆုံးခဲ့တယ်လို့ အဖွဲ့တာဝန်ရှိသူတွေဆီက သိရပါတယ်။
MK-015