မဲခေါင်၊ မေ ၉
ဗန်းမော် – မြစ်ကြီးနား လမ်းပေါ်ရှိ ဝိုင်းမော်မြို့နယ်၊ ကဇူးရွာ အနီးက ဒဘတ်ချောင်းကူးတံတားကို မေလ ၈ ရက်နေ့ ည ၈ နာရီ ဝန်းကျင်ခန့်က စစ်ကောင်စီတပ်ဖွဲ့က ကား ၂ စီးနဲ့ လာရောက် မိုင်းခွဲ ဖျက်ဆီးသွားတယ်လို့ ဒေသခံတွေဆီက သိရပါတယ်။
“ ဟုတ်တယ်။ ဒဘတ်တံတား မနေ့ည ၈ နာရီလောက်က ရွှေညောင်ပင်ဘက် စစ်ကောင်စီတွေ ကား ၂ စီး နဲ့ တက်လာပြီးေတာ့ မိုင်း လာခွဲသွားပြီး ပြန် လှည့်ပြန်သွားတယ်” လို့ ဒေသခံ တစ်ဦးက ပြောပါတယ်။
KIA နဲ့ ပူးပေါင်းတပ်ဖွဲ့တွေက စစ်ကောင်စီတပ်နောက်ကို လိုက်လံတိုက်ခိုက်တာကြောင့် လမ်းကြောင်း ဖြတ်တောက်ဖို့ တံတားတွေပါ မိုင်းခွဲလာနေတယ်လို့ ဒေသခံ အမျိုးသမီး တစ်ဦးက ပြောပါတယ်။
“ တံတားက အလယ်မှာ ပေါက်သွားတယ်။ ဘေးဘောင်နှစ်ဖက်လည်း ထိသွားတယ်။ ဒီတိုင်းတော့ ကားရော ဆိုင်ကယ်ရော ဖြတ်မရတော့ဘူး။ သစ်သားပြားတွေခံပြီး သွားရင်တော့ ရမှာပေါ့” လို့ ဒေသခံ အမျိုးသား တစ်ဦးက ပြောပါတယ်။
စစ်ကောင်စီဟာ ဒီရက်ပိုင်းအတွင်း ဝိုင်းမော်မြို့နယ်ထဲက တပ်စခန်းအများအပြား ဆုံးရှုံးထားတာကြောင့် တံတားကိုဖောက်ခွဲသွားတာလို့ သူက ဆက်ပြောပါတယ်။
အဲ့ဒီ့တံတားအနီးမှာ တံတားစောင့် စစ်ကောင်စီတပ်ရှိပေမယ့် အခုမိုင်းလာခွဲသွားတာက ဝိုင်းမော် ရွှေညောင်ပင်ဘက်က စစ်ကောင်စီတွေ ကား ၂ စီး ဟုတ်တယ်လို့ နောက်ထပ် ဒေသခံ အမျိုးသား နစ်ဦးက ပြောပါတယ်။
စစ်ကောင်စီဝါဒဖြန့် တယ်လီဂရမ်တွေမှာတော့ တံတားကို တော်လှန်ရေးအဖွဲ့တွေက မိုင်းထောင်ဖောက်ခွဲတဲ့အကြောင်း ပြောင်းပြန်ရေးသားပြီး ဝါဒ ဖြန့်နေကြတယ်လို့ သူကပြောပါတယ်။
မေလ ၅ ရက်နေ့ အဲဒီ့ ကဇူးရွာ အနီးဘက်က စစ်ကောင်စီရဲ့ ငကျန် တပ်စခန်းနဲ့ ကာကင်းစခန်း တချို့ရော မေလ ရ ရက်နေ့က ဝိုင်းမော် အနီးဘက်က ပြည်သူ့စစ် ကာကင်းစခန်း တချို့ကိုရော KIA နဲ့ ပူးပေါင်း တပ်ဖွဲ့ တွေက သိမ်းပိုက်လိုက်တာ ဖြစ်ပါတယ်။
CJ-008
