လက်နက်ချသူတွေကို နှိပ်စက်ခြင်းမရှိဘဲ ပြုစုစောင့်ရှောက်ပေးထားတယ်လို့ KNU ထုတ်ပြန်
မဲခေါင်၊ မတ် ၂၀
ကရင်ပြည်နယ်၊ ကျိုဒုံမြို့နယ်အခြေစိုက် ကျိုက်ဒုံဗျူဟာကုန်းကို ကရင်အမျိုးသားလွတ်မြောက်ရေး တပ်မတော် (KNLA) နဲ့ တော်လှန်ရေးပူးပေါင်းအဖွဲ့တွေက မတ် ၁၄ ရက်မှာ အပြီးသတ်သိမ်းပိုက်ခဲ့ပြီး စစ်ကောင်စီဗျူဟာမှူးအပါ အရာရှိ ၁၂ ယောက်၊ စုစုပေါင်း ၆၆ ဦး လက်နက်ချအညံ့ခံခဲ့တယ်လို့ KNU က ဒီနေ့ မတ် ၂၀ မှာ ထုတ်ပြန်ပါတယ်။
မတ်လ ၁၃ ရက် မနက်မှာ စတင်တိုက်ခိုက်ခဲ့တဲ့ ကျိုက်ဒုံဗျူဟာစခန်းကုန်းကို မတ် ၁၄ ရက် ညနေပိုင်းမှာ တော်လှန်ရေးအဖွဲ့တွေက သိမ်းပိုက်ခဲ့ပြီးနောက် ဗျူဟာမှူး ဗိုလ်မှူးကြီး အောင်ကျော်စိုးနဲ့ အရာရှိ ၁၂ ယောက်အပါ ၆၆ ယောက် လက်နက်ချခဲ့တာဖြစ်ပါတယ်။
စစ်ကောင်စီဘက်က ၁၁ ဦးသေဆုံးပြီး ၄ ဦး ဒဏ်ရာရရှိခဲ့ကာ တော်လှန်ရေးပူးပေါင်းအဖွဲ့တွေဘက်က ၂ ဦးသေဆုံးပြီး ၁ ဦး ဒဏ်ရာရရှိခဲ့တယ်လို့ KNU ထုတ်ပြန်ချက်က ဆိုပါတယ်။
စခန်းကုန်းသိမ်းပွဲအတွင်း စစ်ကောင်စီဘက်က လေကြောင်းပစ်ကူ ၁၅ ကြိမ် လာရောက်ဗုံးကြဲခဲ့တယ်လို့ ဆိုပါတယ်။ အဲ့ဒီစခန်းကုန်းမှ လက်နက်အများအပြားကိုလည်း သိမ်းမိခဲ့တယ်လို့ သိရပါတယ်။
စခန်းသိမ်းတိုက်ပွဲအတွင်း လက်နက်ချ အညံ့ခံတဲ့ ဗျူဟာမှူးနဲ့ အရာရှိ ၁၂ ဦး အပါအဝင် ၆၆ ဦးကို လူသားခြင်း စာနာထောက်ထားမှု အနေဖြင့် ညှင်းပန်း နှိပ်စက်ခြင်း တစ်စုံတစ်ရာပြုခြင်းမရှိဘဲ ဘေးကင်းလုံခြုံစွာ ပြုစု စောင့်လျှောက်ပေးထားတယ်လို့ KNU ထုတ်ပြန်ချက်က ဆိုပါတယ်။