မဲခေါင်၊ အောက်တိုဘာ ၂၇
ရှမ်းပြည်နယ် မြောက်ပိုင်း၊ ဒေသတစ်လျှောက် ဒီကနေ့ အောက်တိုဘာ ၂၇ ရက်နေ့၊ မနက်ပိုင်းမှာ စတင်ခဲ့တဲ့ တအောင်းအမျိုးသား တပ်မတော် TNLA၊ ကိုးကန့် MNDAA နဲ့ ရက္ခိုင့်တပ်တော် AA တို့ရဲ့ ၁၀၂၇ စစ်ဆင်ရေးကို ကြိုဆိုတယ်လို့ NUG သမ္မတရုံးပြောခွင့်ရ ဦးကျော်ဇောက မဲခေါင်သတင်းဌာနကို ပြောဆိုလိုက်ပါတယ်။
ကိုးကန့် (MNTJP/MNDAA)၊ တအာင်း (PSLF/TNLA) နဲ့ ရက္ခိုင် (ULA/AA) တို့ပါဝင်တဲ့ ညီနောင် မဟာမိတ်တပ် တွေဟာ ဒီနေ့မနက်ပိုင်းကစပြီး Operation 1027 (၁၀၂၇ စစ်ဆင်ရေး) ကိုစတင်တယ်လို့ ကြေညာခဲ့ပြီး စစ်ကောင်စီ တပ်တွေကို နေရာအနှံ့ ပြင်းပြင်းထန်ထန် တိုက်ခိုက်နေတာပါ။
“တော်လှန်ရေး အင်အားစုတွေ အကုန်လုံး NUG-PDF တွေရော အားလုံးက အတူတကွ တိုက်ပွဲဝင်နေကြတာ။ အတူတကွ တိုက်ပွဲဝင်ဖို့ ကျွန်တော်တို့ အမြဲတမ်းလည်း ထုတ်ဖော်ပြောကြားတယ်။ ကျွန်တော်တို့ ကိုယ်တိုင်လည်း တော်လှန်ရေး အင်အားစုတွေနဲ့ တိုက်ပွဲတွေ ဆင်နွှဲနေကြတာ ဖြစ်တယ်။ ဒါကြောင့်လည်း အခုလို အောင်ပွဲတွေ ဆင်နေတာ အတွက်လည်း အင်မတန်မှ ဝမ်းသာပါတယ်။ ဒီထက်ပိုကြီးမားတဲ့ အောင်ပွဲတွေရဖို့ အတွက်လည်း အတူတကွ လက်တွဲပြီး ပြိုင်တူ တိုက်ပွဲဝင်သွားဖို့ အရေးကြီးတယ်” လို့ ဦးကျော်ဇောက ပြောပါတယ်။
ဒီကနေ့ စတင်တဲ့ ၁၀၂၇ စစ်ဆင်ရေးအတွင်း ရှမ်းမြောက် တရုတ်-မြန်မာနယ်စပ်မြို့ဖြစ်တဲ့ ချင်းရွှေဟော်မြို့ကို ကိုးကန့်တပ်-MNDAA က ဝင်ရောက်တိုက်ခိုက်ပြီး တမြို့လုံးနီးပါး ထိန်းချုပ်နိုင်ပြီလို့ ဒေသတွင်း သတင်းရင်းမြစ်တွေ ထံက သိရပါတယ်။
ဒီနေ့မနက်ပိုင်းက စပြီး ရှမ်းပြည်နယ် မြောက်ပိုင်း မုံကိုး၊ ဖောင်းဆိုင်၊ မန်းယန်၊ နမ့်ခမ်း၊ စခန်းသစ်ကုန်း၊ နမ့်ဖက်ကာ၊ ကွတ်ခိုင်၊ မုံးစီး၊ သန္နီ ရေပူ၊ လားရှိုး ခမရ (၆၈) နဲ့ (၄၁)၊ လောက်ကိုင်၊ ချင်းရွှေဟော် စတဲ့ ဒေသတွေက စစ်ကောင်စီစခန်းတွေကို မြောက်ပိုင်း ညီနောင်မဟာမိတ်အဖွဲ့တွေနဲ့ PDF ပူးပေါင်းတပ်တွေက တပြိုင်တည်း ထိုးစစ်ဆင် တိုက်ခိုက်နေတာပါ။
ရှမ်းမြောက် တိုက်ပွဲတွေ အတွင်း ပြည်သူ့ကာကွယ်ရေး တပ်မတော် (မန္တလေး)–MDY PDF နဲ့ ဗမာပြည်သူ့လွတ်မြောက်ရေး တပ်မတော် BPLA တို့လည်း ပါဝင်တိုက်ခိုက်နေတယ်လို့ သိရပါတယ်။
NUG အနေနဲ့ MOD လက်အောက်ခံ PDF တပ်ဖွဲ့တွေ အပါအဝင် အခြား တော်လှန်ရေးတပ်ဖွဲ့တွေနဲ့လက်တွဲပြီး စစ်အာဏာရှင်ကို ဆက်လက် တိုက်ပွဲဝင်မယ်လို့ ဦးကျော်ဇောက ပြောပါတယ်။
MK-009
#MekongNews
#မြောက်ပိုင်းမဟာမိတ်အဖွဲ့
#NUG
#MNDAA
