မဲခေါင်၊ စက်တင်ဘာ ၂၆
ရှမ်းပြည်တော်လှန်ရေး တပ်ပေါင်းစု-S.S.L.R.U ရဲ့ တပ်ခွဲ (၃) ဖြစ်တဲ့ ချိုးဖြူတော်လှန်ရေးတပ်ဖွဲ့-JPRF က စက်တင်ဘာလ ၂၅ ရက်နေ့ကစပြီး “Who Got The Large Prize” ကမ်ပိန်း ပြုလုပ်နေတယ်လို့ တပ်ဖွဲ့ တာဝန်ရှိသူ တစ်ဦးက ပြောပါတယ်။
“ကမ်ပိန်းက အဖွဲ့တိုင်း လုပ်နေတော့ ရိုးနေပြီ၊ ထပ်နေပြီပေါ့။ ပစ္စည်းတခုကို မဲဖောက်ပေးတာက ရိုးနေပြီမို့လို့ ကျွန်တော်က ဒီ Character (ဇာတ်ကောင်) ၅ ခုကို vote (မဲပေး) ပေးတဲ့ အစီအစဥ်လေး လုပ်ဖြစ်တာပါ။ မျှော်မှန်းတာကတော့ သိန်း ၁၂၀ ကျော် မျှော်မှန်းထားတယ်ပေါ့။ ရလာတဲ့ငွေ တွေကို ရှေ့တန်းအတွက် ကျည်တွေ ဝယ်ဖြည့်မှာပါ” လို့ သူကပြောပါတယ်။
ကမ်ပိန်းမှာ ဇာတ်ကောင် ၅ ကောင် ပါဝင်ပြီး ကိုယ်ကြိုက်နှစ်သက်တဲ့ ဇာတ်ကောင်ကို မဲတစ်မဲ ၅,၀၀၀ ကျပ်နှုန်းနဲ့ ဝယ်ယူရမှာဖြစ်ကာ မဲဝယ်ယူမှု အများဆုံး ဇာတ်ကောင်က ပထမ ဖြစ်မှာလို့ သိရပါတယ်။
ပထမရတဲ့ ဇာတ်ကောင်ကို ဝယ်ယူသူတွေ အတွက် ပထမဆု အနေနဲ့ ရဲဘော်ကိုငှက်ရဲ့ တော်လှန် အနုပညာ ပန်းချီကား တစ်ချပ် ပေးအပ်မှာ ဖြစ်တယ်လို့ ဆိုပါတယ်။
ဆုတွေအနေနဲ့ ပထမဆု၊ ဒုတိယဆု၊ တတိယဆု၊ စတုတ္ထဆု၊ ပဥ္စမဆုနဲ့ နှစ်သိမ့်ဆုတွေ ပေးအပ်မှာဖြစ်ပြီး ကမ်ပိန်း ကာလကိုတော့ စက်တင်ဘာလ ၂၅ ရက်ကနေ အောက်တိုဘာလ ၁၀ ရက်အထိ ၁၅ ရက်ကြာ ပြုလုပ်မှာဖြစ်လို့ ပါဝင်ကံစမ်းကြဖို့ မေတ္တာရပ်ခံ တောင်းဆိုထားပါတယ်။
ချိုးဖြူတော်လှန်ရေးတပ်ဖွဲ့-JPRF ဟာ တော်လှန်ရေး စတင်ကတည်းက စစ်ကောင်စီတပ်သား၊ အရာရှိနဲ့ စစ်ကောင်စီသတင်းပေး ဒလန် စုစုပေါင်း ၁၀၀ ကျော်ကို သုတ်သင်ရှင်းလင်းခဲ့တဲ့အပြင် စစ်ဘေးရှောင် ပြည်သူတွေကို ကူညီထောက်ပံ့ ပေးနေတဲ့အဖွဲ့ ဖြစ်ပါတယ်။
CJ-004
#MekongNews
#ရှမ်းပြည်တော်လှန်ရေးတပ်ပေါင်းစု
#ချိုးဖြူတော်လှန်ရေးတပ်ဖွဲ့
#”Who_Got_The_Large_Prize”
