မဲခေါင်၊ စက်တာဘာ ၁၅
ရှမ်းပြည်နယ် တောင်ပိုင်း၊ ဓနု ကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ်၊ နွားဘန်းကြီးကျေးရွာ ပတ်လည်မှာ စစ်ကောင်စီတပ်က မိုင်းအလုံး ၅၀ ခန့် ထောင်ထားပြီး ရွာသူ ရွာသားတွေ ရွာပြင်ထွက်ခွင့် ပိတ်ပင်ထားတယ်လို့ ဒေသအခြေစိုက် မှော်ဘုရင်စစ်ကြောင်း တာ၀န်ရှိသူက ဒီကနေ့ ပြောပါတယ်။
ပြည်သူ့ကာကွယ်ရေးတပ်ဖွဲ့ PDF စခန်း နေရာကို သတင်းမပေးလို့ စစ်ကောင်စီက စက်တင်ဘာလ ၅ ရက်နေ့က စပြီး မိုင်းထောင်ကာ ရွာသူ ရွာသားတွေ ခြံထဲ၊ တောထဲ သွားခွင့် ရက်အကန့်အသတ်မရှိ ပိတ်ပင်လိုက်တာ ဖြစ်တယ်လို့ သူက ဆိုပါတယ်။
“သူတို့ (စကစတပ်) က သူတို့ အတွေးအခေါ်လောက်နဲ့ ကျွန်တော်တို့ရှိတဲ့ နေရာကို ထင်နေတာက တစ်နေရာ၊ အဲ့နား အနီးတဝိုက်က ရွာတွေကို ဒုက္ခပေးနေတာ။ ငတ်ပြတ်အောင် လုပ်နေတာ။ သူတို့ရှာနေတဲ့ နေရာနဲ့ PDF ရှိတဲ့နေရာနဲ့ တခြားစီပဲ” လို့ မှော်ဘုရင်စစ်ကြောင်း တာဝန်ရှိသူက ရှင်းပြပါတယ်။
အခုလို မိုးတွင်းကာလ စိုက်ပျိုးရာသီမှာ စိုက်ခင်းထဲ မသွားဖို့ ပိတ်ပင်ခံထားရလို့ ရွာသူ၊ ရွာသားတွေ အခက်ကြုံနေရတယ်လို့ ဒေသခံတွေက ဆိုပါတယ်။
“ခုချိန်က နှစ်တိုသီးနှံစိုက်ချိန်၊ ရာသီဥတုဒဏ်ကြောင့် နေ့စဉ် ဆေးဖြန်းပေးရတာ ရှိတယ်။ ခရမ်းချဉ်တို့လို ရာသီပေါ် အသီးအနှံမျိုးကို သိန်းဆယ်ချီ၊ ရာချီ မရှိမဲ့ရှိမဲ့နဲ့ ရင်းနှီးထားရတာ။ အခုသွားခွင့် ပိတ်ပင်ထားတဲ့ အတွက် ပျက်စီးရပြီ။ ဒီတခါ ဆုံးရှုံးသွားရင် တခါပြန်စုဖို့ စုတာ လချီပြန်ရှာမှ ဒီအရင်းအနှီးရတာ။ တော်တော်လေးကို ဒုက္ခရောက်ရပါတယ်” လို့ ရွာငံမြို့နယ် ဒေသခံ တစ်ဦးက ပြောပါတယ်။
ဒါ့အပြင် စစ်ကောင်စီက ရွာသားတွေကို ၁၀ ရက်အတွင်း PDF တွေရှိတဲ့ နေရာ သတင်းမပေးပါက အိမ်တွေ မီးရှို့မယ်လို့ ခြိမ်းခြောက်ထားတယ်လို့ သိရပါတယ်။
ဓနုဒေသ ရွာငံနဲ့ ပင်းတယမြို့နယ် အတွင်း ရွာ ၈ ရွာမှာ အခုနှစ် ဩဂုတ်လ ၁၇ ရက်နေ့အထိ စစ်ကောင်စီတပ် မီးရှို့လို့ ပြည်သူနေအိမ် ၅၆ လုံး ပြာကျခဲ့တယ်လို့ မှော်ဘုရင်စစ်ကြောင်းရဲ့ စာရင်းတွေအရ သိရပါတယ်။
CJ-012
#MekongNews
#နွားဘန်းကြီးကျေးရွာ
#မိုင်းထောင်
#မှော်ဘုရင်စစ်ကြောင်း
