မဲခေါင်၊ ဩဂုတ် ၃၁
ကရင်နီပြည်နယ်၊ မယ်စဲ့မြို့နယ်နဲ့ ဖားဆောင်းမြို့နယ်ကြားက ကျောက်စုဒေသကို စစ်ကောင်စီ အင်အား အမြောက်အများနဲ့ ထိန်းချုပ်တပ်စွဲထားလို့ စစ်ရေးအခြေအနေတွေ တင်းမာနေတယ်လို့ ဖားဆောင်း PDF တာ၀န်ရှိသူ တစ်ဦးက မဲခေါင်သတင်းဌာနကို ပြောပါတယ်။
ပြီးခဲ့တဲ့ ဇူလိုင်လ ၂၂ ရက်က မယ်စဲ့၊ ဖားဆောင်းနဲ့ သံလွင်မြစ်ကမ်း ကာကွယ်ရေးအတွက် ကရင်နီတော်လှန်ရေး အင်အားစုတွေရဲ့ ကာကင်းဖြစ်တဲ့ ကျောက်ပန်းညို နဲ့ ၀မ်အောင်း(ရှမ်း) ကျေးရွာက တပ်စခန်း ၃ ခုကို စစ်ကောင်စီ အင်အား ၃၀၀ ခန့်အသုံးပြု သိမ်းပိုက်ပြီးနောက် နယ်မြေချဲ့ထွင်လာတာ ဖြစ်တယ်လို့ ဆိုပါတယ်။
“ကျောက်စု၊ နန့်ပလိန်တို့၊ ပန်တိန်း တို့လောက်ထိ သူတို့ (စစ်ကောင်စီ) က ပြန်သိမ်းထားတယ်။ ကျွန်တော်တို့ ဘက်က ဆုတ်ပေးထားရတဲ့ အခြေအနေတော့ ရှိပါတယ်” လို့ သူကရှင်းပြပါတယ်။
လက်ရှိ ကျောက်စုကျေးရွာ တစ်၀ိုက်မှာ စစ်ကောင်စီ တပ်ဖြန့် အထိုင်ချထားပြီး စစ်ရေးလှုပ်ရှားမှုတွေ ရှိပေမဲ့ တိုက်ပွဲ မဖြစ်သေးဘူးလို့ ဆိုပါတယ်။
အခုလို စစ်ကောင်စီဘက်က နယ်မြေ ချဲ့ထွင်လာလို့ တော်လှန်ရေး အင်အားစုတွေဘက်က တန်ပြန် တိုက်ခိုက်ဖို့ ပြင်ဆင်နေတာကြောင့် တိုက်ပွဲတွေ ထပ်ဖြစ်လာမယ်လို့ ဖားဆောင်း PDF ရဲဘော် တစ်ဦးက ပြောပါတယ်။
“ပြန်ပြီး ဒီနယ်မြေတွေကို ထိန်းချုပ်နိုင်ဖို့ အတွက် ပြင်ဆင်နေတာမျိုးတော့ ရှိပါတယ်။ ဒါပေမဲ့ စစ်ရေးသဘောအရ မဖြစ်လာသေးတဲ့ အခြေအနေတွေကိုတော့ ပြောပြဖို့ စောပါသေးတယ်” လို့ သူကဆိုပါတယ်။
လက်ရှိ စစ်ကောင်စီက မယ်စဲ့၊ ဖားဆောင်းမြို့နယ်တွေကို ပြန်လည် ထိန်းချုပ်နိုင်ဖို့ ရခိုင်နဲ့ စစ်ကိုင်းက တပ်မတွေ၊ ရှမ်းအခြေစိုက် တပ်ရင်းတွေကိုပါ အသုံးပြုနေပြီး ကရင်နီပြည်နယ် ဒေသအများစုမှာ ဆက်သွယ်ရေး ဖြတ်တောက်ထားတယ်လို့ စစ်ရေးသတင်းရင်းမြစ် တစ်ဦးက ပြောပါတယ်။
MK-007
#MeKongNews
#မယ်စဲ့မြို့နယ်
#ကျောက်စု
#ဖားဆောင်း_PDF
