မဲခေါင်၊ သြဂုတ် ၁၄

နွေဦးတော်လှန်ရေးကို လမ်းလွဲသွားစေနိုင်တဲ့ ဘယ်နိုင်ငံရေး အခင်းအကျင်းကိုမှ လက်ခံလို့ မရဘူးလို့ ပအိုဝ်း အမျိုးသား ဖက်ဒရယ် ကောင်စီ-PNFC ဥက္ကဌ ဦးခွန်မြင့်ထွန်း က ဒီနေ့ ဩဂုတ်လ ၁၄ ရက်နေ့မှာ ပြောဆိုလိုက်ပါတယ်။

လတ်တလော စစ်ကောင်စီ အဖွဲ့ဝင်တွေ အပြောင်းအလဲ လုပ်နေတဲ့အပေါ် စိတ်ဝင်စားနေလို့ မရဘဲ စနစ် တစ်ခုလုံး အပြောင်းအလဲ လုပ်သွားဖို့ လိုအပ်တယ်လို့ သူကဆိုပါတယ်။

ဦးခွန်မြင့်ထွန်း က “အုပ်ချုပ်မှု အပြောင်းအလဲ လုပ်ရုံလောက်နဲ့ပေါ့နော်။ ဒီအုပ်ချုပ်မှုပုံစံ အမျိုးမျိုးတွေကို လုပ်ပြီးတော့မှ ဒီစစ်အုပ်စုဘက်က သက်တမ်းတွေ ဆွဲဆန့်လာခဲ့တာ။ အဲတော့အခု ကျနော်တို့ လူထုတစ်ရပ်လုံး လိုလားတာက ဖက်ဒရယ် ပြည်ထောင်စု ထူထောင်ကြရမယ်။ အဲဒါသည် အုပ်ချုပ်မှု အပြောင်းအလဲ ပုံစံ မဟုတ်ဘူး။ Region Change မဟုတ်ပါဘူး။ အဲဒါသည် ဘာလဲဆိုတော့ ကျနော်တို့ စနစ်တစ်ခုလုံးကို ပြောင်းလဲမယ့် System Change ဖြစ်တယ်။ အဲဒါကို ပေါ်လွင်စေချင်လို့ ကျနော်တို့ ပြောတာ” လို့ ပြောပါတယ်။

စစ်ကောင်စီ အနေနဲ့ ရာနှုန်းပြည့် အုပ်ချုပ်နိုင်ဖို့အတွက် တွေ့ဆုံ ဆွေးနွေးရေး လမ်းစဉ်ကို ကျင့်သုံးလာနိုင်ပြီး မိမိတို့ဘက်က ဒီလမ်းစဉ်တွေ အပေါ် လက်ခံမသွားဖို့ လိုအပ်တယ်လို့ သူက သတိပေးပါတယ်။

“ကျနော်တို့ကတော့ ဒီတိုင်းပြည်ရဲ့ ပြဿနာ တစ်ခုကို ဖြေရှင်းတဲ့ အခါမှာ နိုင်ငံရေး နည်းနဲ့ကတော့ ဆွေးနွေးမှု တွေနဲ့ အဆုံးသတ်ကြရတာ ဖြစ်ပါတယ်။ သို့သော် ဒီနေ့ ဒီအချိန်အခါသည် ဒီလိုဆွေးနွေးမှုကို လုပ်ရတဲ့အချိန် မဟုတ်ဘူးလို့ ကျနော်တို့ သတ်မှတ်ထားပါတယ်။ ဒါကြောင့်မို့လို့ ဒီစစ်ကောင်စီနဲ့ ဒီကောင်စီနဲ့ တွေ့ဆုံ ဆွေးနွေးရေး လုပ်ကြဖို့ ဆိုတဲ့ဟာက ကျနော်တို့ ဒီအချိန်မှာ စိတ်မဝင်စားဘူး။ ဒီအချိန်ဟာ ကျနော်တို့ တွေ့ဆုံ ဆွေးနွေးရေးကို ဖိတ်ခေါ်နေရမယ့်အချိန်၊ ကမ်းလှမ်းနေရမယ့် အချိန်၊ ဆွေးနွေးနေရမယ့် အချိန် မဟုတ်ဘူးလို့ ကျနော်တို့ သတ်မှတ်ထားပါတယ်” လို့ သူက ရှင်းပြပါတယ်။

PNFC ကို ၂၀၂၁ ခုနှစ်၊ ဒီဇင်ဘာလမှာ ကျင်းပတဲ့ ပအိုဝ်းအမျိုးသား ဖက်ဒရယ် ညီလာခံ အပြီးမှာ အာဏာရှင်စနစ် အမျိုးမျိုးကို တော်လှန်ဖို့ ရည်ရွယ် ဖွဲ့စည်းခဲ့ပြီး လက်ရှိ အမျိုးသား ညီညွတ်ရေး အတိုင်ပင်ခံ ကောင်စီ-NUCC မှာ ပါဝင် လှုပ်ရှားနေတယ်လို့ သိရပါတယ်။

ဒါ့အပြင် အမျိုးသား ညီညွတ်ရေး အစိုးရ-NUG နဲ့လည်း တော်လှန်ရေးကိစ္စ အဝဝကို ညှိနှိုင်း ဆောင်ရွက်နေပြီး ကြားကာလ အခြေခံပညာ အခမဲ့အွန်လိုင်း စာသင်ကျောင်းကိုလည်း ဖွင့်လှစ်ထားပါတယ်။

ဦးခွန်မြင့်ထွန်း ဟာ လက်ရှိ PNFC ရဲ့ ဥက္ကဌ ဖြစ်တဲ့အပြင် ပအိုဝ်းအမျိုးသား လွတ်မြောက်ရေး အဖွဲ့ချုပ်-PNLO ရဲ့ ဒုဥက္ကဌ အဖြစ် တာဝန် ထမ်းဆောင်နေဆဲ ဖြစ်တယ်လို့ သိရပါတယ်။

CJ-007

#MeKongNews

#PNFC

#ပအိုဝ်းအမျိုးသားလွတ်မြောက်ရေးအဖွဲ့ချုပ်

#နွေဦးတော်လှန်ရေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)