မဲခေါင်၊ ဩဂုတ် ၁၁
ရှမ်းပြည်တိုးတက်ရေးပါတီ SSPP နဲ့ စစ်ရေးတင်းမာနေတဲ့ ရှမ်းပြည်နယ် တောင်ပိုင်း၊ လဲချားမြို့နယ်အတွင်း စစ်ကောင်စီက PNO ပအို၀်း ပြည်သူ့စစ် အပါအ၀င် ပြည်သူ့စစ်တွေ ခေါ်ယူ အင်အားဖြည့်နေတယ်လို့ စစ်ရေး သတင်းရင်းမြစ်တွေထံက စုံစမ်းသိရှိရပါတယ်။
ပြီးခဲ့တဲ့ ဩဂုတ်လ ၆ ရက်နေ့မှာ တိုက်ပွဲ ဖြစ်ပွားပြီးနောက် စစ်ကောင်စီဟာ သူတို့ရဲ့ လက်အောက်ခံ ပြည်သူ့စစ်တွေနဲ့ လဲချားမြို့နယ်ထဲကို ဆက်တိုက် အင်အားဖြည့်တင်းနေတာဖြစ်ပြီး လက်ရှိအချိန်ထိ ပြည်သူ့စစ် အင်အား ၂၀၀ နဲ့ ၃၀၀ ကြား ဖြည့်တင်းထားတယ်လို့ စစ်ရေးသတင်းရင်းမြစ် တစ်ဦးက ပြောပါတယ်။
“လဲချားမြို့အဝင် တိုက်ပွဲ ဖြစ်ခဲ့တဲ့ မက်လန်းကျေးရွာမှာက တိုက်ပွဲဖြစ်ပြီး နောက်ရက်မှာပဲ PNO ပြည်သူ့စစ်က vgo ကား ၂ စီးနဲ့ အင်အားဖြည့်တင်းထားတယ်လို့ သတင်းရတယ်။ သူတို့ကတော့ ၃၀ လောက်တော့ ရှိနိုင်တယ်လို့ ခန့်မှန်းထားတယ်” အဲ့ဒီ စစ်ရေးသတင်းရင်းမြစ်က ပြောပါတယ်။
အဲ့ဒါအပြင် စစ်ကောင်စီတပ်ဖွဲ့ဟာ လက်အောက်ခံ ပြည်သူ့စစ်တွေဖြစ်တဲ့ နားရိုင်းပြည်သူ့စစ်၊ မတ်ကျန်ပြည်သူ့စစ်၊ SSS ပြည်သူ့စစ်တွေဆီက တစ်ဖွဲ့ကို တပ်သား အင်အား ၁၀၀ ဖြည့်တင်းပေးဖို့ အမိန့်ပေးထားတယ်လို့ SSPP နဲ့ နီးစပ်တဲ့ သတင်းရင်းမြစ် တစ်ဦးက ပြောပါတယ်။
“PNO ပြည်သူ့စစ်က ကား ၂ စီးနဲ့ ရောက်လာတယ်။ မတ်ကျန်၊ နားရိုင်း၊ SSS ပြည်သူ့စစ်လည်းပါတယ်။ သူတို့ အင်အားကတော့ ဘယ်လောက်ပါလဲ မသိရသေးဘူး။ ၂၀၀ ကျော်နဲ့ ၃၀၀ အောက် ရှိမယ်လို့တော့ ခန့်မှန်းထားပါတယ်” လို့ အဲ့ဒီ သတင်းရင်းမြစ်က ပြောပါတယ်။
အခုလို လဲချားမြို့နယ်ထဲမှာ စစ်ကောင်စီတပ်က အဆက်မပြတ် အင်အားဖြည့်တင်းနေတာကြောင့် အချိန်မရွေး တိုက်ပွဲ ပြန်ဖြစ်နိုင်တယ်လို့ သူကသုံးသပ်ပါတယ်။
“လဲချားမှာ နမ့်တိန်းချောင်း အနောက်ဘက်မှာ စစ်ကောင်စီ အင်အားက ၂၀၀ ကနေ ၃၀၀ ကြားရှိတယ်။ နမ့်တိန်းချောင်း အရှေ့ဘက်မှာလည်း အဲ့လောက်ပဲ။ အခုထပ်ဖြည့်တဲ့ ပြည်သူ့စစ် အင်အားနဲ့ဆိုရင်တော့ စုစုပေါင်း စစ်ကောင်စီ အင်အားက ၆၀၀ ကျော်ကျော်လောက် ရှိနိုင်ပါတယ်” လို့ သူကဆိုပါတယ်။
စစ်ကောင်စီက လက်အောက်ခံ ပြည်သူ့စစ်တွေနဲ့ အင်အား ဆက်တိုက် ဖြည့်တင်းနေတယ်လို့ သတင်းရင်းမြစ်တွေက ပြောဆိုပေမယ့် မဲခေါင် သတင်းဌာန အနေနဲ့ သီးခြား အတည်မပြုနိုင်သေးပါဘူး။
လဲချားမြို့နယ်အတွင်း စစ်ရေးအခြေအနေတွေ မေးမြန်းဖို့ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန် ကို ဆက်သွယ် မေးမြန်းထားပေမယ့် လက်ရှိအချိန်ထိ ပြန်လည်ဖြေကြားတာ မရှိသေးပါဘူး။
သြဂုတ်လ ၉ ရက်နေ့ကလည်း စစ်ကောင်စီက ဂျက်တိုက်လေယာဉ် တစ်စင်းနဲ့ လဲချားမြို့နယ်ပေါ်မှာ ခြိမ်းခြောက် ပျံသန်းခဲ့ပြီး စစ်ရေးအခြေအနေ တင်းမာနေတယ်လို့ SSPP က ထုတ်ပြန်ထားပါတယ်။
ပြီးခဲ့တဲ့ ဩဂုတ်လ ၆ ရက်နေ့မှာ စစ်ကောင်စီနဲ့ SSPP တို့ တိုက်ပွဲဖြစ်ပွားခဲ့ရာ ၂ ဖက် တပ်ဖွဲ့ဝင်တွေ ထိခိုက် သေဆုံးမှုရှိခဲ့ပြီး ဒေသခံတွေ အခုထိ လဲချားမြို့ပေါ်မှာ တိမ်းရှောင်နေရဆဲ ဖြစ်ပါတယ်။
CJ-002
#MeKongNews
#လဲချားမြို့နယ်
#SSPP
#ပြည်သူ့စစ်
