မဲခေါင်၊ ဇူလိုင် ၁၄

ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ ရေတွင်းကြီးကျေးရွာမှာ နေထိုင်တဲ့ ကျောင်းဆရာ မိသားစု ဇူလိုင်လ ၁၂ ရက်၊ ညပိုင်းက ဓားပြတိုက် သတ်ဖြတ်ခံရပြီး မိခင်ဖြစ်သူ အသက်ပေး ကာကွယ်လို့ ကလေးငယ် တစ်ဦးသာ လွတ်မြောက်သွားတယ်လို့ ဒေသခံ တစ်ဦးက မဲခေါင်သတင်းဌာနကို ပြောပါတယ်။

ရေတွင်းကြီးကျေးရွာမှာ နေထိုင်တဲ့ ကျောင်းဆရာရဲ့ နေအိမ်ကို လူတစ်စုက ကြယ်ဝယ်ဖို့ဆိုပြီး လာရောက် မေးမြန်းကာ ဓားပြဝင်တိုက်ပြီး သတ်ဖြတ်သွားတာ ဖြစ်တယ်လို့ သူကပြောပါတယ်။

“ဖြစ်တာက ဇူလိုင်လ ၁၂ ရက် ည ၇ နာရီလောက်ကပဲ။ ဓားပြတိုက် သတ်ဖြတ်ခံရတာ ကျောင်းဆရာပါ။ သူ့မိန်းမက အိမ်မှာ အိမ်ဆိုင်လေး ဖွင့်ထားတယ်။ အဲ့အချိန် သူ့အိမ်မှာက သူ့မိန်းမရယ်၊ သူ့သမီးငယ် ရယ်ရှိတယ်။ ကြက်ဝယ်ဖို့ဆိုပြီး ရောက်လာတာ။ နဂိုကတည်းက အကြံအစည် ရှိတာလား မသိဘူး။ ကျောင်းဆရာနဲ့ သူ့မိန်းမကိုပါ သတ်သွားတယ်။ ကလေးကိုပါ အစဖျောက်ဖို့ လုပ်ပေမဲ့ မိန်းမဖြစ်သူက ကာပြီး ပြေးခိုင်းလို့ လွတ်သွားတာ” လို့ သူကရှင်းပြပါတယ်။

လွတ်မြောက်လာတဲ့ သမီးငယ်ဟာ ဒုတိယတန်းမှာ ပညာသင်ကြားနေတဲ့ ကျောင်းသူဖြစ်ပြီး မိခင်ဖြစ်သူ အသက်ပေး ကာကွယ်မှုကြောင့် ထွက်ပြေး လွတ်မြောက်သွားကာ ရွာတောင်ပိုင်းမှာရှိတဲ့ ဦးလေးဖြစ်သူထံ ဘေးကင်းစွာ ရောက်ရှိသွားတယ်လို့ ဆိုပါတယ်။

လွတ်မြောက်လာတဲ့ ကလေးငယ်ရဲ့ ပြောပြချက်အရ ဦးလေးဖြစ်သူနဲ့ ရွာသားတစ်ချို့ ချက်ချင်း သွားရောက် ပေမဲ့ ရောက်ရှိချိန်မှာ ကျောင်းဆရာ လင်မယားရဲ့ အလောင်းသာ တွေ့ရပြီး ငွေကျပ်သိန်း ၅၀ ခန့်ကို ဓားပြတွေ ယူဆောင်သွားတယ်လို့ မိသားစုနဲ့ နီးစပ်သူ တစ်ဦးက ပြောပါတယ်။

ဓားပြတိုက် သတ်ဖြတ်ခံရတဲ့ ကျောင်းဆရာ နေအိမ်ဟာ ရေတွင်းကြီးကျေးရွာရဲ့ တောင်ပိုင်းနဲ့ မြောက်ပိုင်းကြား အလယ်မှာ ရှိပေမဲ့ ဓားပြတွေ ထွက်ပြေး လွတ်မြောက်သွားတယ်လို့ ဆိုပါတယ်။

လက်ရှိအချိန်မှာတော့ ကလေးငယ်ကို ဦးလေးဖြစ်သူ မိသားစုက စောင့်ရှောက်ထားပြီး ဓားပြတွေကိုတော့ ဖမ်းမမိသေးဘူးလို့ ဒေသခံ တစ်ဦးက ပြောပါတယ်။

MK-007

#MekongNews

#ညောင်ရွှေမြို့နယ်

#ဓားပြတိုက်

#ရေတွင်းကြီးကျေးရွာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)