မန္တလေး၊ ဇူလိုင် ၁၂
နိုင်ငံအနှံ့ လက်နက်ကိုင် တော်လှန်မှုကို ရင်ဆိုင်နေရတဲ့ စစ်ကောင်စီ အနေနဲ့ လက်နက် ထုတ်လုပ်ရေး စက်ရုံတွေ အချိန်ပြည့် လည်ပတ်နိုင်ရေး လျှပ်စစ်မီး အပြည့်အဝပေးဖို့ ညွှန်ကြားထားတဲ့ အတွက် အခုရက်ပိုင်း အတွင်း ရန်ကုန်၊ မန္တလေး အပါအဝင် နိုင်ငံအနှံ့က မြို့ကြီးတွေမှာ မီးပျက်နေတာလို့ အမည်မဖော်လိုသူ လျှပ်စစ်ဌာန အရာရှိ တစ်ဦးက မဲခေါင်သတင်းဌာနကို ဒီကနေ့ ပြောပါတယ်။
အရင်က စစ်လက်နက် ပစ္စည်း စက်ရုံတွေ စွမ်းအားပြည့် မလည်ပတ်ပေမယ့် အခုရက်ပိုင်းက စပြီး စွမ်းအားပြည့် လည်ပတ် ထုတ်လုပ်ဖို့ လိုအပ်တဲ့ လျှပ်စစ် ပြတ်တောက်မှု မရှိစေဘဲ အပြည့်အဝပေးဖို့ ညွှန်ကြားထားတယ်လို့ သူကဆိုပါတယ်။
“ကာကွယ်ရေး ပစ္စည်း ထုတ်လုပ်ရေး စက်ရုံတွေကို အရေးပေါ် လိုအပ်ချက်အရ လျှပ်စစ်ဓာတ်အား ၂၄ နာရီ ပြတ်တောက်မှု မရှိဖို့၊ ဝန်အား အပြည့်ပေးဖို့ ညွှန်ကြားထားတာ ရှိပါတယ်။ အနည်းဆုံး တစ်လကနေ ၃ လအထိ ကြာမြင့်နိုင်ပါတယ်” လို့ သူဆိုပါတယ်။
စစ်တပ် လက်နက်စက်ရုံ အများစုဟာ မန္တလေးတိုင်းနဲ့ မကွေးတိုင်းမှာ တည်ရှိနေတာဖြစ်ပြီး အဲဒီဒေသတွေမှာ မီးပြတ်တောက်မှု ပိုဖြစ်မယ်လို့ သူက ဆိုပါတယ်။
ဇူလိုင်လဆန်းပိုင်းက စပြီး မန္တလေးမြို့ နေရာ အတော်များများမှာ လျှပ်စစ် တစ်ရက်ကို ၆ နာရီဝန်းကျင်သာ ရရှိတော့တယ်လို့ မန္တလေး မြို့ခံတွေက ဆိုပါတယ်။
လက်ရှိ လျှပ်စစ်ဓာတ်အား ရရှိချိန် နည်းပါးလွန်းတဲ့ အတွက် မန္တလေးမြို့က အသေးစား စက်မှုလက်မှု လုပ်ငန်း အများအပြား လုပ်ငန်း ရပ်ဆိုင်းလုနီးပါး ဖြစ်နေတယ်လို့ ဒေသခံ စီးပွားရေး လုပ်ငန်းရှင်တွေက ပြောပါတယ်။
“တစ်နေကုန် မီးမရဘူး။ လာတဲ့အချိန်ကျလည်း ညပိုင်းဆိုတော့ ပတ်ဝန်းကျင်နဲ့ အဆင်မပြေဘူး။ အပ်ထည်တွေ အချိန်မီ မရတော့ အလုပ်အပ်တဲ့သူတွေက အလုပ်မအပ်ကြတော့ဘူး။ ဒီဇယ်ဆီ ဈေးက ကြီးပေမဲ့လည်း အလုပ်ဖြစ်ဖို့ အတွက် တစ်ခါတစ်ခါ အရှုံးခံ လုပ်ပေးရတာတွေ ရှိလာတယ်ဗျ။ ဒီအတိုင်းပဲ ဆက်သွားရင်တော့ လုပ်ငန်း တော်တော်များများ ရပ်ရတော့မှာပေါ့” လို့ အောင်မြေသာစံမြို့နယ်က တွင်ခုံ လုပ်ငန်းရှင် တစ်ဦးက ပြောပါတယ်။
အခုလို လျှပ်စစ်ဓာတ်အား ရရှိချိန် နည်းပါးမှုဟာ မန္တလေးမြို့အပြင် ရန်ကုန်တိုင်း စစ်ကိုင်းနဲ့ ပဲခူးတိုင်း တွေမှာလည်း ကြုံတွေ့နေရတယ်လို့ ဒေသခံတွေက ပြောပါတယ်။
“အခုရက်ပိုင်း ခဏခဏ မီးပျက်တယ်။ ပျက်တဲ့အချိန် ပိုပိုများလာတယ်” လို့ ရန်ကုန်မြို့ခံ တစ်ဦးက ပြောပါတယ်။
ပြီးခဲ့တဲ့ နွေရာသီမှာ တစ်နိုင်ငံလုံး အတိုင်းအတာနဲ့ လျှပ်စစ်မီး ဆိုးဆိုးရွားရွား ပြတ်တောက်ခဲ့ပြီးနောက် မိုးတွင်းကာလမှာပါ အခုလို ပြတ်တောက်လာတဲ့ အတွက် ပြည်သူတွေ အနေနဲ့ အလင်းရောင်ရဖို့ အပိုကုန်ကျစရိတ်တွေ များပြားလာတယ်လို့ သူက ပြောပါတယ်။
CJ-009
#MekongNews
#မန္တလေး
#လျှပ်စစ်
#လက်နက်စက်ရုံ
