မဲခေါင်၊ ဇူလိုင် ၆
ကရင်ပြည်နယ်၊ မြဝတီမြို့နယ်၊ စိမ်းလဲ့မြိုင်ကားဝင်း အနီးမှာရှိတဲ့ ပွင့်လင်းအေးမြိုင်ကျေးရွာ အနီးမှာ ၂ ရက်ဆက်တိုက် တိုက်ပွဲ ဖြစ်ပွားနေတယ်လို့ ဒေသခံတွေက ဒီကနေ့ ပြောပါတယ်။
မနေ့၊ ဇူလိုင် ၆ ရက်နေ့၊ မနက်ပိုင်းက စတင်ပြီး အခုချိန်ထိ ပွင့်လင်းအေးမြိုင်ရွာ၊ စမတောင် ဘုန်းကြီးကျောင်း ဘက်မှာ လက်နက်ငယ်သံတွေ ကြားနေရတယ်လို့ ဒေသခံတွေက မဲခေါင်သတင်းဌာနကို ပြောပါတယ်။
“သေနတ်သံက စမတောင်ဘုန်းကြီးကျောင်း အနောက်ဘက်နားလောက်မှာ၊ အသံက ဆက်တိုက်မဟုတ်တော့ သတိမထားမိလို့။ လက်နက်ကြီးသံကတော့ အကျယ်ကြီးပဲ ကြားတယ်။ နေ့ရောညရော ပစ်နေတာ” လို့ ဒေသခံ အမျိုးသမီး တစ်ဦးက ဆိုပါတယ်။
ပြီးခဲ့တဲ့ ဇွန်လ နောက်ဆုံးပတ်ကစပြီး မြဝတီမြို့အထွက်၊ အာရှလမ်းဘေးမှာရှိတဲ့ (၂၇၅) တပ်ရင်းကနေ ပွင့်လင်းအေးမြိုင်ရွာဘက်ကို လက်နက်ကြီးတွေနဲ့ ဆက်တိုက် ပစ်ခတ်နေတာကြောင့် ပွင့်လင်းအေးမြိုင်နဲ့ အနီးဝန်းကျင်နေ ကျေးရွာသားတွေ ထွက်ပြေး တိမ်းရှောင်ခဲ့ရတာပါ။
ဇွန်လအတွင်းမှာပဲ မြဝတီမြို့နယ်၊ ကျောက်တောင်ကျေးရွာဘက်က မိသားစု ၄ ယောက်နေတဲ့ အိမ်ကို လက်နက်ကြီးကျပြီး မိသားစုဝင်တွေ သေဆုံးသွားခဲ့သေးတယ်လို့ ဒေသခံ အမျိုးသမီးက ဆက်ပြောပါတယ်။
“ပြောင်းစရာနေရာ မရှိလို့ ပေတေပြီး နေနေတာတဲ့ သနားပါတယ်” လို့ သူကဆိုပါတယ်။
ဒါ့အပြင် ပွင့်လင်းအေးမြိုင်ရွာသား တစ်ဦး တောထဲမှာ ဟင်းစားထွက်ရှာရင်း မိုင်းနင်းမိပြီး သေဆုံးခဲ့ရတယ်လို့ ဒေသခံတွေက ပြောဆိုပါတယ်။
အဆိုပါ အရပ်သား သေဆုံးမှုတွေနဲ့ ပတ်သက်ပြီး မဲခေါင်သတင်းဌာန အနေနဲ့ သီးခြား အတည်ပြုနိုင်ဖို့ ကြိုးစားနေဆဲ ဖြစ်ပါတယ်။
ဧပြီလ ၁၁ ရက်နဲ့ ၁၂ ရက် တိုက်ပွဲတွေမှာ စစ်ကောင်စီနဲ့ နယ်ခြားစောင့်တပ် BGF ပူးပေါင်းစစ်ကြောင်းက မြဝတီမြို့နယ်၊ မဲကနယ်ကျေးရွာက နေအိမ်တွေကို မီးရှို့ဖျက်ဆီးခဲ့တဲ့အပြင် လက်နက်ကြီးနဲ့ ပစ်ခတ်တာ၊ လေယာဉ်နဲ့ ဗုံးကြဲတာတွေကြောင့် ဘုရားကျောင်း အပါအဝင် နေအိမ် ၃၀ ဝန်းကျင် ပျက်စီးခဲ့တယ်လို့ ဒေသတွင်း သတင်းရင်းမြစ်တွေထံက သိရပါတယ်။
MK-009
ဓာတ်ပုံ-ပုံဟောင်းဖြစ်ပါတယ်။
#MekongNews
#မြဝတီမြို့နယ်
#အာရှလမ်း
#(၂၇၅)တပ်ရင်း
