မဲခေါင် ၊ မေ ၉
ကရင်နီပြည်သူ့ကာကွယ်ရေးတပ် KPDF က ၎င်းတို့ရဲ့တပ်ဖွဲ့ကို ကရင်နီအမျိုးသားများကာကွယ်ရေးတပ် KNDF တပ်ရင်း ၉၊ တပ်ခွဲ ၆ အဖြစ် ရပ်တည်သွားမယ်လို့ ဒီကနေ့မှာ ထုတ်ပြန်ပါတယ်။
KPDF အနေနဲ့ အရင်ကတည်းက KNDF နဲ့ပူးပေါင်းပြီး တပ်ပေါင်းစုအသွင် စစ်ရေးလှုပ်ရှားတာ တိုက်ပွဲဝင်တာတွေ ပြုလုပ်ခဲ့ပြီး ဒီနေ့အချိန်မှ စပြီး တပ်ပေါင်းစုအသွင်မဟုတ်တော့ဘဲ KNDF ရဲ့ တပ်ခွဲတစ်ခုအဖြစ် အပြည့်အဝ ပြောင်းလဲရပ်တည်လိုက်တယ်လို့ ထုတ်ပြန်ချက်မှာဖော်ပြထားပါတယ်။
မူလတပ်ဖွဲ့ အမည် ဖြစ်တဲ့ KPDF အဖြစ် အဖွဲ့နာမည်အသုံးပြုမှုကို ရပ်ဆိုင်းပြီး KNDF တပ်ရင်း (၉) တပ်ခွဲ (၆) အဖြစ် ရာနှုန်းပြည့် ဆက်လက်ရပ်တည်သွားမည်လို့ တပ်ဖွဲ့ ၂ နှစ်ပြည့်မှာ ထုတ်ပြန်ပါတယ်။
တော်လှန်ရေးတပ်ဖွဲ့တွေ အခုလို ပေါင်းစည်းလာနိုင်တာဟာ ကောင်းမွန်တဲ့လက္ခဏာဖြစ်ပြီး စစ်ရေးဗျူဟာ ချမှတ်တာတွေကအစ ပိုအားကောင်းစေတယ်လို့ ယုံကြည်ကြောင်း တော်လှန်ရေးရဲဘော်တစ်ဦးကပြောပါတယ်။
“အခုလို သူတို့ထုတ်ပြန်ချက်ကိုမြင်ရတာ ဝမ်းသာတယ်ဗျ။ တစ်ဖွဲ့တည်း ပေါင်းစည်းလိုက်တော့ စစ်ရေးဗျူဟာ ချမှတ်တာတွေ တိုက်ပွဲဖော်တာတွေလည်း ပိုထိရောက်လာမယ်လို့မြင်တယ်” လို့ သူကပြောပါတယ်။
ကရင်နီအမျိုးသားများ ကာကွယ်ရေးတပ်- KNDF ရဲ့ ကွပ်ကဲမှုအောက်မှာရှိတဲ့ တပ်ရင်းအမှတ်(၉) ရဲ့ တပ်ခွဲတစ်ခွဲအနေနဲ့ တရားဝင် စတင်ဝင်ရောက်ချိန်မှစပြီး စစ်ရေးစစ်ရာ လှုပ်ရှားမှုများသာမက အခြားသောလုပ်ငန်းများကိုပါ KNDF အနေနဲ့ ဆက်လက်ထမ်းဆောင်သွားမယ်လို့ သိရပါတယ်။
အာဏာရှင်ဆန့်ကျင်တော်လှန်ရေး နဲ့ ဖက်ဒရယ်ဒီမိုကရေစီစနစ် ပေါ်ပေါက်ရေးရဲ့ အစဖြစ်တဲ့ နွေဦးတော်လှန်ရေးမှသည် အာဏာရှင်စနစ် ဆုံးခန်းတိုင်တဲ့အထိ ဆက်လက်တိုက်ပွဲဝင်သွားမယ်လို့လည်း ဆိုပါတယ်။
ဒါ့အပြင် ကရင်နီပြည်သူ့ကာကွယ်ရေးတပ်-KPDF အနေနဲ့ စဖွဲ့တဲ့ အချိန်ကနေ လက်ရှိအချိန်ထိ ၂ နှစ်တာကာလအတွင်း စစ်ကောင်စီနဲ့ တိုက်ပွဲပေါင်း ၁၅၀ ကျော်တိုက်ခိုက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
အဲ့ဒီတိုက်ပွဲတွေအတွင်း KPDF တပ်ဖွဲ့ဝင် ၅ ဦးကျဆုံးခဲ့ရပြီး ကျဆုံးခဲ့ရတဲ့ ရဲဘော်တွေကို နွေဦးတော်လှန်ရေးရဲ့ အာဇာနည်သူရဲကောင်းများအဖြစ် မှတ်းတမ်းတင် ဂုဏ်ပြုတယ်လို့လည်း KPDF ကဆိုပါတယ်။
တိုက်ပွဲအတွင်း ကျဆုံးခဲ့တဲ့ ရဲဘော်များမှာ “ရဲဘော်စိုင်းဘုန်းမင်းသန့်” ၊ “ရဲဘော်နေထူးနိုင်” ၊ “ရဲဘော်စိုင်းသက်ပိုင်ဟိန်း” ၊ “ရဲဘော်ရဲရင့်နိုင်” နဲ့ “ရဲဘော်လင်းအိမ်သစ်” တို့ဖြစ်တယ်လို့ အဲ့ဒီအဖွဲ့က ဆိုပါတယ်။
ကရင်နီပြည်သူ့ကာကွယ်ရေးတပ်-KPDF ကို ၂၀၂၁ ခုနှစ်၊ မေလ (၇)ရက်နေ့မှာ စတင်ဖွဲ့စည်းခဲ့တာဖြစ်ပါတယ်။
CJ – 002
#MeKongNews
#KPDFKNDF
#ကရင်နီတပ်ဖွဲ့
