မဲခေါင်၊ ဧပြီ ၂၉
ဆိုင်ကယ်တွေ နေ့စဉ်ခိုးယူခံရပြီး ဖမ်းဆီးနိုင်ခြင်းမရှိတာကြောင့် တာချီလိတ်က တာဝန်ကျရဲတွေဟာ ဆိုင်ကယ်သူခိုးနဲ့ ပေါင်းစားနေတာလားလို့ တာချီလိတ်မြို့ဒေသခံတွေက မေးခွန်းထုတ်နေကြပါတယ်။
တာချီလိတ်မြို့မှာ တစ်နေ့ကို ဆိုင်ကယ်တစ်စီးနဲ့အထက် ခိုးယူခံနေရပြီး ခိုးခံရသမျှဆိုင်ကယ်တွေအားလုံးလည်း ရဲကဖမ်းဆီးရမိတာ မရှိဘူးလို့ တာချီလိတ်မြို့ခံတစ်ဦးကပြောပါတယ်။
“သူခိုးတွေ အရမ်းသောင်းကျန်းနေပြီ။ အစောင့်ရှိတဲ့ ဈေးတွေ၊ အိမ်ရာလိုင်းခန်းတွေထဲပါ ဝင်ခိုးတာ။ တစီးမှ ဖမ်းမမိဘူး။ ရဲကဖမ်းရင် မိကို မိတယ်။ အခုက ရဲကပါပေါင်းစားနေတာလားဆိုတာတောင် မေးခွန်းထုတ်ရတော့မယ်” လို့ သူက ပြောပါတယ်။
ဒါ့အပြင် နှစ်ဆန်းတစ်ရက်နေ့က စစ်ကောင်စီရဲ့လွတ်ငြိမ်းအမိန့်နဲ့ ပြန်လွတ်လာသူတွေထဲမှာ ခိုးမှုနဲ့ ထောင်ကျနေသူတွေပါလာတာကြောင့် ဆိုင်ကယ်ခိုးမှုတွေ ပိုဆိုးလာတယ်လို့ အဲဒီဒေသခံက ပြောပါတယ်။
ခိုးယူတဲ့ဆိုင်ကယ်တွေကို တာချီလိတ်မြို့တွင်းက နေရာတချို့မှာ ပုံစံဖျက်တာလုပ်ဆောင်နေသလို တချို့ဘီးတွေကိုလည်း တခြားမြို့တွေဆီပို့ဆောင်ပြီး ပြန်ရောင်းချတာမျိုးလည်းရှိတယ်လို့ သတင်းရင်းမြစ်တစ်ဦးက ပြောပါတယ်။
“ခိုးတဲ့လူတချို့ကို ရဲကသိတယ်။ အောက်ဘီးတွေဆို မယ်ခေါင်(ရပ်ကွက်)ဘက်မှာ လှုပ်ရှားတာများတယ်။ မမိဘူးဆိုလာကလည်း ပျောက်တဲ့ဘီးတွေက အပြင်ရောက်ကုန်တာများတယ်” လို့ သူက ပြောပါတယ်။
ဆိုင်ကယ်နေ့စဉ် ခိုးယူခံနေရတာအပြင် တာချီလိတ်မြို့နယ်ထဲကို ထိုင်းနိုင်ငံဘက်ကနေ တင်သွင်းတဲ့ မှောင်ခိုဆိုင်ကယ်တွေကို ထိုင်းနိုင်ငံဘက်က တင်းကြပ်နေတာကြောင့် ဈေးကွက်ထဲမှာ ဆိုင်ကယ်အသစ်တွေ တစ်စီးကို ဘတ် ၅ထောင်ကနေ တစ်သောင်းဝန်းကျင်အထိ ဈေးတက်နေတယ်လို့ ဆိုင်ကယ်အရောင်းအဝယ်လုပ်နေသူတွေထံက သိရပါတယ်။
တာချီလိတ်မြို့မှာ စစ်တပ်အာဏာသိမ်းပြီးနောက်ပိုင်း ခိုးမှု၊ လုယက်မှု၊ ပြန်ပေးဆွဲမှုတွေများပြားလာသလို ဖမ်းဆီးရမိမှုကလည်း မရှိသလောက်ဖြစ်တယ်လို့ ဒေသခံတွေထံကနေသိရပါတယ်။
ပုံအညွှန်း – NLD အစိုးရလက်ထက် တာချီလိတ်မြို့မရဲစခန်းတွင် ခိုးယူထားသည့် ဆိုင်ကယ်များ ဖမ်းမိပြီးနောက် ပိုင်ရှင်ထံပေးအပ်ရန် ပြင်ဆင်နေစဉ်
MK – 004
#MeKongNews
#တာချီလိတ်
#ဆိုင်ကယ်ခိုး
