မဲခေါင်၊ မတ် ၈
စစ်တပ် အာဏာသိမ်းပြီးနောက် ဒုတိယ အကြိမ် ပြုလုပ်တဲ့ ၂၀၂၂-၂၀၂၃ ပညာသင်နှစ် တက္ကသိုလ်ဝင်တန်း စာမေးပွဲ ဝင်ရောက်ဖြေဆိုသူ အရေအတွက် အာဏာမသိမ်းခင်ကထက် ၈၀ ရာခိုင်နှုန်းကျော် ကျဆင်းခဲ့တယ်လို့ ပညာရေး လေ့လာစောင့်ကြည့်သူတွေထံက သိရပါတယ်။
NLD အစိုးရ လက်ထက် ပညာရေးဝန်ကြီးဌာန စာရင်းတွေအရ ၂၀၂၀ ခုနှစ်က ကျင်းပခဲ့တဲ့ တက္ကသိုလ်ဝင် စာမေးပွဲ ဖြေဆိုခွင့် လျှောက်ထားသူ ၉ သိန်းကျော် ရှိခဲ့ပြီး စစ်တပ်အာဏာသိမ်းပြီးတဲ့ ၂၀၂၂ ခုနှစ်မှာ ၃ သိန်း ဝန်းကျင်ရှိကာ အခုနှစ်မှာတော့ တစ်သိန်းရှစ်သောင်း နီးပါးသာ ရှိတယ်လို့ သိရပါတယ်။
“အချို့ ကျေးရွာများတွင် စစ်တပ်က စစ်ကြောင်းထိုးမှုများကြောင့် ပညာသင်ကြားနိုင်ခြင်း မရှိဘဲ ထွက်ပြေး တိမ်းရှောင်နေရတယ်။ တစ်ချို့နေရာတွေမှာကြတော့ အခြေအနေက တော်တော်လေးကို ဆိုးတာ စာသင်ဖို့တောင်မှ မလွယ်ဘူး။ ကျောင်းတွေ ပိတ်ရတဲ့ အခြေအနေတွေ ဖြစ်နေတယ်” လို့ စစ်ကိုင်းတိုင်း အတွင်း စစ်ဘေးရှောင်တွေကို ကူညီပေးနေသူ တစ်ဦးက ပြောပါတယ်။
စစ်တပ် အာဏာသိမ်းပြီးနောက် ပညာရေးဝန်ထမ်း သိန်းနဲ့ချီ အာဏာဖီဆန်ရေး လှုပ်ရှားမှု CDM မှာ ပါဝင်တာကလည်း စစ်ကောင်စီ လက်အောက်မှာ ပညာရေးကဏ္ဍ ဆိုးဆိုးရွားရွား ထိခိုက်ပျက်စီးစေတဲ့ အကြောင်းရင်း တစ်ခု ဖြစ်တယ်လို့ ပညာရေးဆိုင်ရာ ကျွမ်းကျင်သူတွေက ပြောပါတယ်။
“ဒီလို အခြေအနေ အတွင်းမှာပဲ အမျိုးသား ညီညွတ်ရေး အစိုးရ (NUG) က ကြားကာလ ပညာရေးစနစ်ကို အကောင်အထည်ဖော်နေပြီး ၁၀ တန်း စာမေးပွဲ ဖြေဆိုသူ ဦးရေ ၉ သောင်း ဝန်းကျင်ရှိတယ်” လို့ NUG ရဲ့ ပညာရေးနဲ့ ကျန်းမာရေးဝန်ကြီး ဒေါက်တာဇော်ဝေစိုး က ပြောပါတယ်။
စစ်ကောင်စီရဲ့ စာရင်းအရ အခု ၂၀၂၂ – ၂၀၂၃ စာသင်နှစ်မှာ တက္ကသိုလ်ဝင် စာမေးပွဲ ဝင်ရောက် ဖြေဆိုသူ ၁၇၉, ၇၄၂ ဦးသာ ရှိပြီး အာဏာ မသိမ်းခင် ၂၀၁၉-၂၀၂၀ ပညာသင်နှစ် ၉ သိန်းကျော်နဲ့ နှိုင်းယှဉ်ကြည့်ရင် ဖြေဆိုသူ အရေအတွက် ၁၈ ရာခိုင်နှုန်းကျော်သာ ရှိတယ်လို့ ပညာရေး အသိုင်းအဝိုင်းမှ သိရပါတယ်။
MK-010
