မဲခေါင်၊ ဖေဖော်ဝါရီ ၂
နိုင်ငံတော် အေးချမ်းသာယာရေးနဲ့ ဖွံ့ဖြိုးရေးကောင်စီ-နအဖ ခေတ်က ဗိုလ်ချုပ်သာအေး တည်ထောင်ခဲ့တဲ့ ဟုမ္မလင်းမြို့နယ်၊ ရွှေပြည်အေးမြို့ကို ဒေသခံ ကာကွယ်ရေးတပ်တွေ သိမ်းပိုက်ထားပြီ ဖြစ်တယ်လို့ ခန္တီးခရိုင် အမှတ် (၁) တပ်ရင်း၊ ဟုမ္မလင်းက ဒီကနေ့ ထုတ်ပြန်ပါတယ်။
ဟုမ္မလင်းမြို့နဲ့ ဖောင်းပြင်မြို့ကြားမှာ တည်ရှိတဲ့ ရွှေပြည်အေးမြို့ကို ခန္တီးခရိုင်အမှတ် (၁) တပ်ရင်း-ဟုမ္မလင်း၊ HPDF၊ HPDF-124၊ HPDF မိုးကြိုး စတဲ့ မဟာမိတ်တပ်ပေါင်းစုတွေ မနေ့က စီးနင်း သိမ်းပိုက်ခဲ့တာလို့ သိရပါတယ်။
စစ်ကောင်စီမှ ရဟတ်ယာဉ်နဲ့ ၃ ကြိမ လာရောက်ပစ်ခတ်ခဲ့သော်လည်း မဟာမိတ်တပ်ပေါင်းစုမှ အထိအခိုက် အကျအရှူံးမရှိဘဲ အခုအချိန်အထိ ရွှေပြည်အေးမြို့ကို သိမ်းပိုက်ထားဆဲဖြစ်တယ်လို့ ခန္တီးခရိုင် အမှတ် (၁) တပ်ရင်း၊ ဟုမ္မလင်းက အသိပေးတင်ပြထားတာပါ။
ပြီးခဲ့တဲ့ ဇန်နဝါရီ ၂၇ ရက်ကလည်း ခန္တီးခရိုင် အမှတ် (၁) တပ်ရင်းနဲ့ မဟာမိတ် တပ်ဖွဲ့တွေ ဖြစ်ကြတဲ့ HPDF 124 ၊ HPDF ၊ HPDF မိုးကြိုး ပူးပေါင်း စစ်ကြောင်းမှ စစ်ကောင်စီ လက်အောက်ခံ SNA တော်စီပွိုင့်ကုန်းနဲ့ ဂိတ်စခန်းတွေအားလုံးကို တိုက်ခိုက်သိမ်းပိုက်ပြီး အောင်မြင်စွာ ဆုတ်ခွာနိုင်ခဲ့တယ်လို့ သိရပါတယ်။
လက်ရှိ စစ်ရေးတင်းမာနေလို့ ပြည်သူတွေ အနေနဲ့ ဟုမ္မလင်း-ရွှေပြည်အေး၊ ရွှေပြည်အေး-ဖောင်းပြင် ရေလမ်းခရီးတွေ အသုံးပြု သွားလာတာ လုံးဝ မပြုကြဖို့ ဒေသကာကွယ်ရေးတပ်ဖွဲ့က သတိပေး ထုတ်ပြန်ထားပါတယ်။
သိမ်းပိုက်ထားနိုင်တဲ့ မြို့နဲ့ ပြည်သူတွေရဲ့ အခြေအနေ၊ ဒေသခံကာကွယ်ရေးတပ်တွေရဲ့ အခြေအနေ အသေးစိတ် အချက်အလက်တွေကို မဲခေါင်သတင်း အနေနဲ့ စုံစမ်းမေးမြန်းနေဆဲ ဖြစ်ပါတယ်။
MK-003
#MeKongNews
#ဟုမ္မလင်းမြို့နယ်
#ရွှေပြည်အေးမြို့
#HPDF
