မဲခေါင်၊ ဇန်နဝါရီ ၁၉
စစ်ကိုင်းတိုင်း၊ စစ်ကိုင်းမြို့နယ်၊ မင်းကွန်းတိုက်နယ်၊ ထုံးဘိုရွာ အနီးရှိ နဂါးနီ ပြောက်ကျားတပ်ဖွဲ့ နယ်မြေ စခန်း စီးနင်း တိုက်ခိုက်ခံရပြီး PDF ရဲဘော် တစ်ဦးနဲ့ ပြည်သူတစ်ဦး သတ်ဖြတ် ခံခဲ့ရတယ်လို့ သိရပါတယ်။
ဇန်နဝါရီ ၁၇ ရက် မနက် ၉ နာရီခန့်က ထုံးဘိုကျေးရွာသို့ စစ်ကောင်စီတပ်က ပစ်ခတ် ဝင်ရောက်ခဲ့ရာ နဂါးနီ ပြောက်ကျားတပ်ဖွဲ့ စခန်း စီးနင်း တိုက်ခိုက်ခံရပြီး ရဲဘော်ရဲဇင်ထွန်း ကျဆုံးခဲ့တယ်လို့ မတ္တရာမြို့နယ် အခြေစိုက် နဂါးနီ ပြောက်ကျားတပ်ဖွဲ့က မနေ့က ထုတ်ပြန်ပါတယ်။
ဒါ့အပြင် ရဲဘော် ၂ ဦး မစိုးရိမ်ရတဲ့ ဒဏ်ရာတွေ ရရှိခဲ့ပြီး စစ်ကောင်စီတပ်ကို မတ္တရာမြို့နယ် ကောင်းကင် တော်လှန်ရေး အင်အားစုနဲ့ စစ်ကိုင်းမြို့နယ် ပ.က.ဖ၊ ဝက်လက်မြို့နယ် မဟာမိတ်တပ်ဖွဲ့တွေ ပူးပေါင်းပြီး ပြန်လည် တိုက်ခိုက်ခဲ့ရာ စစ်ကောင်စီတပ် ပြန်လည် ဆုတ်ခွာသွားတယ်လို့ ကောင်းကင် တော်လှန်ရေး အင်အားစုက ဆိုပါတယ်။
လက်နက်ကြီး လက်နက်ငယ်တွေနဲ့ ပြန်လည်ပစ်ခတ် တိုက်ခိုက်ခဲ့လို့ စစ်တပ် ပြန်လည် ဆုတ်ခွာသွားပြီးနောက် ကာကွယ်ရေးတပ်ဖွဲ့တွေ နယ်မြေ ရှင်းလင်း ဝင်ရောက်စဉ် နေအိမ် အလုံး ၂၀ ခန့် မီးလောင် ပျက်စီးနေပြီး အသက် ၄၀ နှစ် အရွယ် အမျိုးသား တစ်ဦးကို ရက်စက်စွာ မီးရှို့သတ်ဖြတ်ထားတဲ့ ရုပ်အလောင်း တွေ့ရှိရတယ်လို့ ကောင်းကင် တော်လှန်ရေး အင်အားစုက ဆိုပါတယ်။
လက်ရှိမှာတော့ ထုံးဘိုရွာ အပါအဝင် အနီးနားက ရွာတွေမှာ နေထိုင်တဲ့ ဒေသခံတွေ ထွက်ပြေးတိမ်းရှောင် နေတယ်လို့ သိရပါတယ်။
စစ်ကိုင်း အခြေစိုက် တပ်မ (၃၃) ဟာ ဇန်နဝါရီ ၁၆ ရက် ညပိုင်းက စတင်ကာ မင်းကွန်းဒေသမှာ စစ်ကြောင်းထိုး နေတယ်လို့ သိရပါတယ်။
ဓာတ်ပုံ-နဂါးနီးပြောက်ကျားတပ်ဖွဲ့။
MK-003
