မဲခေါင်၊ ဇူလိုင် ၇
ပအိုဝ်းဒေသထွက် ဘိန်းများကို ပိုက်ဆံတစ်ဝက် ယာမဆေးပြားတစ်ဝက် ပေးချေပြီး အရောင်းအဝယ်ပြုလုပ်ကြသည်ဟု စစ်ကောင်စီလက်အောက်ခံ PNO ပြည်သူ့စစ်က ပြောသည်။
PNO ပြည်သူ့စစ်က ပြုလုပ်သည့် လူထုတွေ့ဆုံပွဲတစ်ခုအတွင်း PNO ဒုတိယစစ်ဦးစီးချုပ် ဦးနေဝင်းထွန်းက ယင်းကဲ့သို့ ဝန်ခံထည့်သွင်း ပြောဆိုထားခြင်း ဖြစ်သည်။
ယမန်နေ့ ဇူလိုင် ၆ ရက်တွင် PNO က ထုတ်ပြန်သည့် ဗီဒီယိုအတွင်း ဦးနေဝင်းထွန်းက “ပွဲစားပဲများတာ ဝယ်တဲ့သူက တစ်ဦးနှစ်ဦးပဲ ရှိတယ်။ ငွေတွေချည်း ပေးနေရင် ဒီလူတွေကို ငါတို့စိုးမိုးလို့ မရတော့ဘူးဆိုပြီး ယာမထိုးထည့်တယ်။ ဒီမူးယစ်ဆေးဝါး ဘိန်းကို သူတိုယူတဲ့ အချိန်မှာ ယာမ တစ်ဝက်ပေးတယ်။ ယာမကို စျေးတင်လိုက်တဲ့အတွက် ဘိန်း အလကားယူသွားတယ်။ အဲ့ဒီယာမက ကျနော်တို့ဒေသအတွင်းမှာ အကုန်ပျံ့နှံ့နေတော့ ရွာတိုင်းရွာတိုင်းမှာ ကလေးတွေမက လူကြီးလူငယ်ပါ သုံးတယ်။ ဒီမူးယစ်ဆေးဝါး မကောင်းဆိုးဝါးတွေ ကျနော်တို့ အသွေးအသားထဲမှာ စီးဝင်ပြီးတော့ စိတ်တွေပါ အမျိုးမျိုးပျက်လာပြီ။ ” ဟု ပြောသည်။
ပအိုဝ်းဒေသအတွင်း ထွက်ရှိသည့် ဘိန်းများကို လာရောက်ဝယ်ယူသူများသည် ငွေအပြည့်ပေးချေခြင်း မရှိဘဲ ယာမစိတ်ကြွဆေးပြားများဖြင့် လဲလှယ်ကာ ဝယ်ယူနေခြင်းသည် ပအိုဝ်းဒေသကို မူးယစ်ဆေးဝါးဖြင့် တိုက်ခိုက်နေခြင်းဖြစ်သည် ဦးနေဝင်းထွန်းက ဆိုသည်။
ဦးနေဝင်းထွန်းက ထိုသို့ ပြောဆိုနေသော်လည်း ၎င်းဦးဆောင်သည့် PNO ပြည်သူ့စစ်ကိုယ်တိုင် ပင်လောင်းမြို့နယ် လုံးနဂါးပတ်ကျေးရွာ အနောက်ဘက်ရှိ တောထဲတွင် မူးယစ်ဆေးဝါး ချက်လုပ်နေသည်ကို မဲခေါင်သတင်းဌာနက စုံစမ်းဖော်ထုတ်ထားပြီး ဖြစ်သည်။
လက်ရှိတွင်လည်း ၎င်းတို့ မူးယစ်ဆေးဝါး ချက်လုပ်သည်ကို သတင်းပေးသည်ဟုဆိုကာ လုံးနဂါးပတ်ကျေးရွာကို တာဝါတိုင်များ လည်ပတ်ခွင့် မပြုတော့ဘဲ PNO ပြည်သူ့စစ်က ဖုန်းလိုင်း အင်တာနက်လိုင်း ပိတ်ပင်ထားလျက်ရှိသည်။
လက်ရှိမြေပြင်တွင်လည်း ဘိန်းများကို ဝယ်ရောင်းခြင်း၊ သယ်ယူခြင်းများတွင် ပြည်သူများ လုပ်ကိုင်၍မရပဲ PNO ပြည်သူ့စစ်များကို ပွဲစားများက ငှားရမ်းကာ သယ်ဆောင်ခိုင်းခြင်း၊ PNO အရာရှိများကိုယ်တိုင် ရောင်းဝယ်ခြင်းများသာ လုပ်ကိုင်ခွင့်ရှိသည်ဟု ဘိန်းစိုက်သူတစ်ဦးဖြစ်သည့် ခွန်အောင်ဒိက ပြောသည်။
“ရောင်းဝယ်တာ သယ်တာက PNO မပါရင် ဘာမှလုပ်လို့မရဘူး။ ပင်လောင်းကနေ ဆိုက်ခေါင်ကို ဘိန်းစိမ်းသယ်တာ PNO ကို ငှားရတာ တပိဿာကို သယ်ခ တစ်သိန်းပေးရတယ်။ စိုက်တဲ့သူက ဘာမှမစားရဘူး PNO က အခွန်လည်းစားရတယ်။ သယ်ယူခလည်း စားရတယ်။ အခုမှ ပြည်သူကို အပြစ်ပုံချနေတာ မယုံရင် ဗိုလ်မှူးကောင်းတို့ ဗိုလ်ကြီးတားတို့ကို မေးကြည့်လို့ရတယ်”ဟု ၎င်းသတင်းရင်းမြစ်က ပြောသည်။
ကုလသမဂ္ဂ၏ စာရင်းအရ မြန်မာနိုင်ငံသည့် ဘိန်းစိုက်ပျိုးမှုအများဆုံး နိုင်ငံဖြစ်ပြီး မြန်မာနိုင်ငံထဲတွင် ရှမ်းပြည်သည် ဘိန်းစိုက်ပျိုးမှု အများဆုံးဖြစ်သည်။
#MeKongNews
#ပအိုဝ်းဒေသ
#ဘိန်းများ
#ပိုက်ဆံတစ်ဝက်
#ယာမဆေးပြားတစ်ဝက်
#PNO
