မဲခေါင်၊ ဇွန် ၁၈
ရှမ်းပြည်အရှေ့ပိုင်း၊ မိုင်းလား အထူးဒေသ (၄) သို့ ယမန်နေ့ ဇွန်လ ၁၇ ရက်တွင် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ – NSPNC ဥက္ကဌ ဒုတိယဗိုလ်ချုပ်ကြီး ရာပြည့်နှင့် ကိုယ်စားလှယ်အဖွဲ့ အလည်အပတ်ရောက်လာကြောင်း NDAA မိုင်းလားအဖွဲ့က ယနေ့ ဇွန် ၁၈ ရက်တွင် ထုတ်ပြန်သည်။
၎င်းတို့အဖွဲ့ကို အထူးဒေသ(၄) ငြိမ်းချမ်းရေးနှင့် စည်းလုံးရေးကော်မတီ ဥက္ကဌ ဦးထိန်လင်း ဦးဆောင်သည့် ခေါင်းဆောင်အစုအဖွဲ့က ကြိုဆိုခဲ့ကြသည်ဟု ဆိုသည်။
၂ ဦး အလွတ်သဘော တွေ့ဆုံဆွေးနွေးမှုများ ပြုလုပ်ရာတွင် အပြန်အလှန် နားလည်ယုံကြည်မှု တိုးမြှင့်ရေးနှင့် ငြိမ်းချမ်းရေးလုပ်ငန်းစဥ် မြှင့်တင်ရေးတို့အပြင်၊ ပြည်သူများ၏ လူမှုစီးပွားဘဝ မြင့်တက်ရေး၊ မူးယစ်ဆေးဝါး တိုက်ဖျက်ရေး၊ အစားထိုးသီးနှံ စိုက်ပျိုးရေး၊ ယဥ်ကျေးမှုနှင့် ပညာရေးကဏ္ဍ၊ ကျန်းမာရေးနှင့် ဆေးဝါးကုသရေးကဏ္ဍ စသည့် အကြောင်းအရာများအား ပွင့်လင်းမြင်သာစွာ အပြုသဘောဆောင်၍ အမြင်ချင်းဖလှယ် ဆွေးနွေးခဲ့ကြသည်ဟု ဆိုသည်။
အထူးဒေသ (၄) အနေဖြင့် တိုင်းရင်းသား အဆင့်မြင့် ကိုယ်ပိုင်အုပ်ချုပ်ခွင့်ရရှိရေး နိုင်ငံရေးရည်မှန်းချက်ကို စွဲမြဲစွာ ဆုပ်ကိုင်သွားမည်ဟု ထုတ်ပြန်ချက်တွင် ပါရှိသည်။
#MeKongNews
#ဒုတိယဗိုလ်ချုပ်ကြီး
#ရာပြည့်
#မိုင်းလား
#အလည်အပတ်
