မဲခေါင်၊ ဇွန် ၂

ရှမ်းပြည်မြောက်ပိုင်း၊ နမ့်ခမ်းမြို့နယ်၊ ကောင်းတပ်ကျေးရွာတွင် သိုလှောင်ထားသည့် ယမ်းပျော့များပေါက်ကွဲမှုကြောင့် သေဆုံးသူ ၄၃ ဦးနှင့် ထိခိုက်ဒဏ်ရာရရှိသူ ၁၁၂ ဦးရှိသည်ဟု တအာင်းတပ်ဖွဲ့-TNLAက ယမန်နေ့ညတွင် သတင်းထုတ်ပြန်သည်။

ယခုထုတ်ပြန်သည့်စာရင်းများသည် ဇွန်လ ၁ ရက်နေ့ ညနေ ၇နာရီထိ ရရှိထားသော စာရင်းများဖြစ်ပြီး လက်ရှိအချိန်အထိ ကယ်ဆယ်ရေးနှင့် စာရင်းကောက်ယူရေးလုပ်ငန်းများ ဆက်လက်ဆောင်ရွက်နေဆဲ ဖြစ်သည်ဟုလည်း TNLAကဆိုသည်။

TNLAက ကောက်ယူရရှိထားသည့် သေဆုံးသူ ၄၃ ဦးစာရင်းတွင် အသက်၁နှစ်မှ ၁၁နှစ်အထိ ကလေး ၇ ဦး၊ အသက် ၁၁နှစ်အထက် အမျိုးသား ၂၃ ဦး၊ အမျိုးသမီး ၁၃ ဦးပါဝင်သည်။ ထိုသေဆုံးသူများအနက် ၇ ဦးသည် ဆေးကုသမှု ခံယူရင်း သေဆုံးခဲ့ခြင်းဖြစ်သည်ဟုလည်း TNLAက ပြောသည်။

ထိခိုက်ဒဏ်ရာရရှိသူ ၁၁၂ ဦးတွင်မူ ၇၅ ဦးသည် အနည်းငယ်ထိခိုက်ဒဏ်ရာရရှိခြင်းဖြစ်ပြီး ၃၇ ဦးသည် ပြင်းထန်ဒဏ်ရာရရှိသူများဖြစ်သည်ဟု ဖော်ပြထားသည်။ ထိုထိခိုက်ဒဏ်ရာရရှိသူများတွင်လည်း အသက် ၁၁နှစ်အောက် ကလေးငယ် ၂၅ ဦးပါဝင်သည်ဟု တအာင်းတပ်ဖွဲ့ထုတ်ပြန်ချက်တွင်ဖော်ပြသည်။

ယခုထုတ်ပြန်သည့် လူနာစာရင်းများသည် နမ့်ခမ်းဆေးရုံသို့ ရောက်ရှိလာသည့် လူနာစာရင်းများသာဖြစ်သည်ဟုလည်း တအာင်းတပ်ဖွဲ့ကဆိုသည်။

မြေပြင်တွင် ကယ်ဆယ်ရေးလုပ်ဆောင်နေသည့်သူများကမူ သေဆုံးသူ ၄၆ ဦးကို မီးသင်္ဂြိုလ်ပေးခဲ့ရသည်ဟု ပြောဆိုထားသည်။

TNLAအနေဖြင့် ထိခိုက်ဒဏ်ရာရရှိသူများအတွက် လိုအပ်သည့် ဆေးဝါးများကို ပြည့်စုံလုံလောက်စွာ စီစဉ်ပံ့ပိုးပေးထားပြီး ဆရာဝန်၊ ဆရာမများနှင့် ကျန်းမာရေးဝန်ထမ်းများကလည်း အချိန်နှင့်တပြေးညီ ကုသစောင့်ရှောက်မှုများ ဆောင်ရွက်ပေးလျက်ရှိကာ ဘေးသင့်ပြည်သူများအား အခမဲ့ကျန်းမာရေးဝန်ဆောင်မှုများ၊ အစားအသောက်နှင့် အဝတ်အထည်များကိုလည်း ဆက်လက်ဖြည့်ဆည်းပေးလျက်ရှိသည်ဟုဆိုသည်။

ထို့ပြင် ဘေးသင့်ပြည်သူများအား လိုအပ်သော အကူအညီများ ပိုမိုရရှိနိုင်ရေးအတွက် ဒေသတွင်း လူမှုကူညီရေးအသင်းအဖွဲ့များ၊ စေတနာ့ဝန်ထမ်းအဖွဲ့များနှင့် ပူးပေါင်းဆောင်ရွက်လျက်ရှိသကဲ့သို့ လူသားချင်းစာနာထောက်ထားမှုဆိုင်ရာ အကူအညီများ ရရှိနိုင်ရေးအတွက်လည်း ဆက်လက်ကြိုးပမ်းဆောင်ရွက်လျက်ရှိသည်ဟု TNLAက ထုတ်ပြန်ချက်တွင် အသိပေးသည်။

နမ့်ခမ်းမြို့ကပ်လျက်တွင် တည်ရှိသည့် ကောင်းတပ်ကျေးရွာတွင် မိုင်းတွင်းကျောက်ထုတ်လုပ်ရေးလုပ်ငန်း၌ အသုံးပြုရန် သိုလှောင်ထားသည့် တအာင်းတပ်ဖွဲ့-TNLA စီးပွးရေးဌာနပိုင် ယမ်းပျော့များ မေလ၃၁ရက်နေ့တွင် ပေါက်ကွဲမှုဖြစ်ပွားရာ ထိခိုက် သေဆုံးမှု အများအပြားရှိနေခြင်းဖြစ်သည်။

ယင်းအလွန်ပြင်းထန်သည့် ယမ်းပျော့များ ပေါက်ကွဲမှုကြောင့် ကောင်းတပ်ကျေးရွာတစ်ခုလုံးနီးပါး ပျက်စီးသွားပြီဖြစ်ပြီး ပြန်လည်ထူထောင်ရေးအတွက် အကူအညီများစွာ လိုအပ်နေသည်ဟုလည်း မြေပြင်တွင် ကူညီရေးလုပ်ငန်း ဆောင်ရွက်နေသူများကပြောသည်။

#MeKongNews
#နမ့်ခမ်းပေါက်ကွဲမှု
#ယမ်းသိုလှောင်ရုံ
#TNLA
#ရှမ်းမြောက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)