မဲခေါင်၊ မေ ၂၅
ရှမ်းပြည်နယ်အရှေ့ပိုင်း၊ ကျိုင်းတုံမြို့၊ ရပ်ကွက် (၁) တွင် အုပ်ချုပ်ရေးမှူးနေရာအတွက် ယှဉ်ပြိုင်ရာ၌ ရပ်ကျေးစာရေးဖြစ်သူ ရတနာထွန်းဦးက ၎င်းလိုချင်သည့် အုပ်ချုပ်ရေးမှူး အရွေးခံရရင်အတွက် မဲလာပေးသူများကို တစ်ဦးလျှင် ကျပ် ၅ထောင်ပေးကာ မဲပေးခိုင်းကြောင်း ဒေသခံများထံမှ သိရသည်။
ရပ်ကျေးစာရေး ရတနာထွန်းဦးနှင့် ယခင်အုပ်ချုပ်ရေးမှူး ဦးစိုင်လုံတို့၏ ယခင်ငွေကြေးအရှုပ်အရှင်းများကြောင့် ၎င်းတို့နှင့် အဆင်ပြေမည့် ရပ်ကွက်အုပ်ချုပ်ရေးမှူး ရရန် ကြိုးပန်းခြင်းဖြစ်ကြောင်း ဒေသခံများက ပြောသည်။
အုပ်ချုပ်ရေးမှူး ဝင်ရောက်ယှဉ်ပြိုင်သည့်အထဲတွင် ရပ်ကျေးစာရေး၏ ကြိုးဆွဲရာကမည့် ဦးလွီးဂျီဆိုသူအား မဲပေးရန် ရွာသားများအား နေ့စားခပုံစံဖြင့် ငွေပေးကာ မဲထည့်ခိုင်းခြင်းဖြစ်ကြောင်း ဒေသခံတစ်ဦးက ပြောသည်။
“ရတနာထွန်းဦးနဲ့ ဦးစိုင်လုံက ရွာဘက်သွားပြီး စည်းရုံးရေးလုပ်တယ်။ မဲလာထည့်ရင် ၅ထောင်ပေးမယ်ဆိုပြီး ခေါ်တာ။ တချို့ကို အုပ်စုလိုက်ခေါ်လာပြီး မဲထည့်ခိုင်းတာတွေလည်း ရှိတယ်။ ဒါပေမယ့် ရပ်ကွက်က ပြည်သူအများစုကတော့ လက်ရှိအုပ်ချုပ်ရေးမှူး ကိုမျိုးကိုပဲ သဘောကျကြတယ်” ဟု ဒေသခံတစ်ဦးက ပြောသည်။
ဒေသခံများက ရတနာထွန်းဦးနှင့် ဦးစိုင်လုံတို့သည် ယခင်က ဘိုးဘွားရန်ပုံငွေ၊ အိမ်ခွန်၊ ငွေခွန်စသည့် ရုံးဆိုင်ရာငွေကြေးများကို သက်ဆိုင်ရာသို့ မသွင်းဘဲ ကိုယ်ကျိုးအတွက် အသုံးပြုခဲ့ကြောင်း ပြောဆိုသည်။
ထို့ပြင် ရတနာထွန်းဦးမှာ လက်ရှိတွင် သိန်း ၄ထောင်တန် နေအိမ်နှင့် ကားများ ဝယ်ယူထားကြောင်း၊ သာမန်အစိုးရဝန်ထမ်းလစာဖြင့် ယင်းကဲ့သို့ ပိုင်ဆိုင်နိုင်ရန် မဖြစ်နိုင်ကြောင်း ဒေသခံများက သံသယရှိနေကြသည်။
“အစိုးရဝန်ထမ်းလစာနဲ့ ဒီလောက်အိမ်တွေ၊ ကားတွေ ဝယ်နိုင်တာ မဖြစ်နိုင်ဘူး။ ရပ်ကွက်ထဲမှာလည်း လူတိုင်းသိနေကြတယ်။ သူတို့နှစ်ယောက် ရှုပ်ထားတဲ့ငွေတွေ ပြန်ပေါ်လာမှာစိုးလို့ သူတို့နိုင်တဲ့လူထည့်ဖို့ လုပ်နေတာ” ဟု ဒေသခံတစ်ဦးက ဆိုသည်။
လက်ရှိတွင် အဆိုပါဖြစ်စဉ်များနှင့်ပတ်သက်၍ ဒေသခံများအကြား ဝေဖန်မှုများ မြင့်တက်နေပြီး သက်ဆိုင်ရာ ထွေအုပ်နှင့် ငှာနဆိုင်ရာ လူကြီးများ စုံစမ်းစစ်ဆေးပေးရန် ဒေသခံများက တောင်းဆိုထားသည်။
#MeKongNews
#ကျိုင်းတုံ
#ရပ်ကွက်အုပ်ချုပ်ရေးမှူး
#ရပ်ကျေးစာရေး
#မဲဆွယ်စည်းရုံး
