မဲခေါင်၊ မေ ၂၁

ရှမ်းပြည်တောင်ပိုင်း၊ ရွာငံမြို့နယ်တွင် စစ်ကောင်စီသတင်းပေးဟု နာမည်ထွက်သူတစ်ဦး သတ်ဖြတ်ခံရကြောင်း ဒေသခံများထံမှ သိရသည်။

ပြီးခဲ့သည့် မေ ၁၈ ရက် ညပိုင်းတွင် အမည်မသိ လက်နက်ကိုင်အဖွဲ့တစ်ဖွဲ့က ရွာငံမြို့နယ် မြိုင်ဘုန်းကြီးကျောင်းအနီး၌ နေထိုင်သူ အောင်ကြီးကို လာရောက် ခေါ်ဆောင်သွားခဲ့ပြီး နောက်တစ်နေ့ နံနက်ပိုင်းတွင် ဘုန်းကြီးကျောင်းရှေ့အနီး၌ သေဆုံးလျက် ပြန်လည် တွေ့ရှိခဲ့ကြောင်း ဒေသခံများက ပြောသည်။

ဒေသခံများ၏ ပြောကြားချက်အရ သေဆုံးသူ အောင်ကြီးသည် မြိုင်ကျေးရွာသားတစ်ဦးဖြစ်ပြီး ဘုန်းကြီးကျောင်းတွင် ညစဉ် စောင့်ကြပ်နေထိုင်ပေးသူတစ်ဦးဖြစ်ကာ စစ်ကောင်စီဘက်သို့ လုံခြုံရေးဆိုင်ရာ သတင်းပေးနေသူတစ်ဦးဟု ဒေသအတွင်း လူသိများကြောင်း သိရသည်။

“ညပိုင်းမှာ လူ ၅ ယောက်လောက် ရောက်လာပြီး ခေါ်သွားတာပါ။ နောက်မနက်ကျတော့ ဘုန်းကြီးကျောင်းရှေ့မှာ သေဆုံးလျက် ပြန်တွေ့ရတယ်”ဟု ဒေသခံတစ်ဦးက မဲခေါင်သို့ ပြောသည်။

သေဆုံးသူ၏ ရုပ်အလောင်းကို ဘုန်းကြီးကျောင်းအရှေ့တွင် မှောက်လျက်အနေအထားဖြင့် တွေ့ရှိခဲ့ရပြီး ခန္ဓာကိုယ်တွင် ဒဏ်ရာများလည်း တွေ့ရှိခဲ့ကြောင်း ဒေသခံများထံမှ သိရသည်။

ယင်းဖြစ်စဉ်ကို မည်သည့်အဖွဲ့က လုပ်ဆောင်ခဲ့သည်ကို မသိရသေးသော်လည်း လက်ရှိတွင် စစ်ကောင်စီဘက်က ကျေးရွာအတွင်း စုံစမ်းစစ်ဆေးမှုများ ပြုလုပ်နေကြောင်း သိရသည်။

ထို့ပြင် ပြီးခဲ့သည့် မေ ၁၃ ရက်တွင်လည်း ရွာငံမြို့ ဈေးတန်းရပ်ကွက်၊ မြနန္ဒာလမ်း၌ နေထိုင်သည့် ဦးဆန်းလွင်ထူးနှင့် ဇနီးဖြစ်သူ ဒေါ်ဆွေအိမ်သီ (ခ) မစန်းထူးတို့ကို အမည်မသိ လူ ၄ ဦးက ဆိုင်ကယ် ၂ စီးဖြင့် ရောက်ရှိလာကာ သေနတ်ဖြင့် ပစ်ခတ်သတ်ဖြတ်ခဲ့သည့် ဖြစ်စဉ် ဖြစ်ပွားခဲ့သေးကြောင်း သိရသည်။

ရွာငံမြို့နယ်အတွင်း စစ်ကောင်စီသတင်းပေးဟု ယူဆခံရသူများကို ရှင်းလင်းသည့် ဖြစ်စဉ်များ မကြာခဏ ဖြစ်ပွားနေပြီး နောက်ပိုင်းတွင် ပုဂ္ဂိုလ်ရေး မကျေနပ်မှုများနှင့် အငြိုးအတေးများကြောင့် သာမန် အရပ်သားများကိုပါ ပစ်မှတ်ထား သတ်ဖြတ်မှုများ ရှိလာနေသဖြင့် ဒေသခံများက စိုးရိမ်နေကြကြောင်း သိရသည်။

#MeKongNews
#ရွာငံ
#စစ်ကောင်စီသတင်းပေး
#နာမည်ထွက်
#သတ်ဖြတ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)