မဲခေါင်၊ မေ ၁၅
ကွတ်ခိုင်မြို့နယ်၊ မုံးစီး၊ မုံးဟွမ်ဒေသတွင် တအာင်းတပ်ဖွဲ့ – TNLA ထံ စစ်မှုထမ်းသူများကို ကိုးကန့်တပ်ဖွဲ့ – MNDAA သို့ ဘက်ပြောင်းစစ်မှုထမ်းရန် ကိုးကန့်တပ်က ဖိအားပေးလုပ်ဆောင်နေသည်ဟု ဒေသခံသတင်းရင်းမြစ်များထံမှ သိရသည်။
ထို့သို့ ဘက်မပြောင်းပါက မုံးစီးဒေသမှ မိသားစုလိုက် ထွက်ခွာသွားရန်လည်း MNDAA က မေ ၉ ရက်တွင် လာရောက်ပြောဆိုခဲ့သည်ဟု ဒေသခံ သတင်းရင်းမြစ်တစ်ဦးက ပြောသည်။
ယင်းကဲ့သို့ ဖိအားပေးမှုကြောင့် လက်ရှိတွင် TNLA မှ MNDAA သို့ ဘက်ပြောင်းစစ်မှုထမ်းလာသူ ၃၀ ကျော် ရှိပြီဖြစ်ကြောင်းလည်း ၎င်းကပြောသည်။
“ပြီးခဲ့တဲ့ ၉ ရက်နေ့က TNLA ဆီ စစ်မှုထမ်းနေတဲ့ လူတွေကို ကိုးကန့်တပ်ဆီ ပြောင်းပြီး စစ်မှုထမ်းဖို့ ဖိအားပေးတယ်၊ အယောက် ၃၀ ကျော်လောက်ကတော့ သွားနေပြီ။ TNLA ဆီ ကျန်နေတဲ့ လူတွေလည်း ရှိတယ်။ ကျန်တဲ့လူတွေကိုလည်း ကိုးကန့်က ထပ်ပြီး ဘက်ပြောင်းလာဖို့ ဖိအားပေးနေတယ်။ ဘက်ပြောင်းမလာဘူးဆိုရင် ကိုးကန့်တပ် ထိန်းချုပ်နယ်မြေကနေ တမိသားစုလုံး TNLA ထိန်းချုပ်နယ်မြေဘက်ကို ထွက်သွားပါလို့ ခြိမ်းခြောက်ဖိအားပေးနေတာ ရှိတယ်” ဟု ဒေသခံ သတင်းရင်းမြစ်တစ်ဦးက ပြောသည်။
ဖိအားပေးမှုများကြောင့် ဘက်ပြောင်းလာသည့်TNLA တပ်ဖွဲ့ဝင်များကို MNDAA က သင်တန်းကွင်းသို့ ပို့ဆောင်ပြီး သင်တန်းပေးရန် လုပ်ဆောင်နေသည်ဟုလည်း ဒေသခံများထံမှ သိရသည်။
“တချို့က မိသားစုနဲ့ ခြိမ်းခြောက်ထားတော့ ဘက်ပြောင်းသွားကြတာပေါ့၊ မသွားရင် မိသားစုလိုက် ကိုးကန့်ထိန်းချုပ်နယ်မြေမှာ မနေနဲ့ဆိုတော့ သွားကြတာမျိုးပေါ့၊ သူတို့တွေကို အခု ကိုးကန့်က သင်တန်းကွင်းကို ပို့ထားတယ်။ တချို့ကတော့ တောင်ယာပြီးချိန်မှ သွားမယ်ဆိုပြီး တောင်းပန်တာလဲ ရှိတယ်” ဟု ဒေသခံအမျိုးသားတစ်ဦးက ပြောသည်။
ထို့ပြင် MNDAA သည် ကွတ်ခိုင်မြို့နယ်၊ ဟိုဖျက်ကျေးရွာအုပ်စုတွင်လည်း တစ်ရွာ ၁၀ ယောက် လကုန်နောက်ဆုံးထားပြီး စစ်မှုထမ်းလာရမည်ဟု ကျေးရွာအုပ်ရေးမှူးများမှတဆင့် တပ်သားသစ် တောင်းခံထားသည်။
MNDAA သည် ပြီးခဲ့သည့် ဧပြီ ၂၈ ရက်တွင် မုံးကိုးမြို့၊ ပန်စီတိုင်ကျေးရွာ၌ စစ်မှုမလာထမ်းဘဲထွက်ပြေးသည်ဟုဆိုကာ ပြည်သူတစ်ဦး၏ နေအိမ်နှင့် တောင်ယာများကို သိမ်းယူပြီး မိသားစုဝင်များကို ကျေးရွာအတွင်းမှ နှင်ထုတ်ခဲ့သည်။
MNDAA သည် ၁၀၂၇ စစ်ဆင်ရေး ပြီးသည့်နောက်ပိုင်း ၎င်းထိန်းချုပ်နယ်မြေအတွင်းတွင် ကိုးကန့်မဟုတ်သည့် အခြားလူမျိုးများကိုပါ နည်းမျိုးစုံဖြင့် စစ်မှုထမ်းရန် လုပ်ဆောင်နေပြီး သားသမီးထွက်ပြေးပါက မိဘများကို ဖမ်းဆီးထားခြင်းများ ပြုလုပ်နေသည်။
#MeKongNews
#မုံးစီး
#မုံးဟွမ်
#TNLA
#MNDAA
#ဖိအားပေး
