မဲခေါင်၊ မေ ၈
တောင်ကြီးမြို့ရှိ Peter Bar ဆိုင်တွင် အလုပ်လုပ်ကိုင်နေစဉ် ဆိုင်ရှင်၏ ထိုးကြိတ်ရိုက်နှက်မှုကြောင့် သေဆုံးခဲ့သည့် အသက် ၁၆ နှစ်အရွယ် မဖူးပွင့်ဝေအတွက် တရားမျှတမှု ရရှိစေရန် အင်းလေးအမျိုးသမီးသမဂ္ဂ (Inle Women’s Union – IWU) က ယမန်နေ့ မေ ၇ ရက်တွင် တောင်းဆိုလိုက်သည်။
မဖူးပွင့်ဝေသည် ရှမ်းပြည်တောင်ပိုင်း၊ ညောင်ရွှေမြို့နယ် အင်းလေးဒေသ မင်းချောင်းလယ်ရွာတွင် နေထိုင်သူဖြစ်ပြီး Grade 8 ဖြေဆိုထားသည့် အသက်မပြည့်သေးသည့် မိန်းကလေးတစ်ဦးဖြစ်ကြောင်း ဖော်ပြထားသည်။
ထုတ်ပြန်ချက်တွင် မဖူးပွင့်ဝေသည် တောင်ကြီးမြို့ရှိ Peter Bar ဆိုင်ပိုင်ရှင် ဦးအောင်မျိုးမင်း (ခ) Peter ၏ ရိုက်နှက်နှိပ်စက်မှုကြောင့် သေဆုံးခဲ့ရကြောင်း ဖော်ပြထားပြီး ယင်းဖြစ်စဉ်အပေါ် IWU အနေဖြင့် ပြင်းထန်စွာ ကန့်ကွက်ရှုတ်ချကြောင်း ဆိုထားသည်။
ထို့ပြင် လက်ရှိ စစ်အာဏာရှင် စနစ်အောက်တွင် တရားဥပဒေစိုးမိုးမှု အားနည်းနေပြီး တရားစီရင်ရေးစနစ် ယိုယွင်းနေခြင်းကြောင့် မဖူးပွင့်ဝေအတွက် တရားမျှတမှု မရရှိဘဲ ဖြစ်စဉ် ပျောက်ကွယ်သွားမည်ကို စိုးရိမ်ကြောင်းလည်း IWU က ဆိုသည်။
မဖူးပွင့်ဝေအတွက် တရားမျှတမှု ရရှိရေးနှင့် ကျူးလွန်သူအား ထိရောက်စွာ အရေးယူနိုင်ရေးအတွက် အင်းလေးဒေသခံများ၊ ရှမ်းပြည်အတွင်းရှိ အမျိုးသမီးအဖွဲ့အစည်းများ၊ အရပ်ဘက်အဖွဲ့အစည်းများနှင့် တရားမျှတမှု လိုလားသည့် ပြည်သူများအားလုံး ပူးပေါင်း ဝန်းရံပေးကြရန် IWU က တိုက်တွန်းထားသည်။
အင်းလေးအမျိုးသမီးသမဂ္ဂ (IWU) အနေဖြင့်လည်း အမျိုးသမီးများနှင့် ကလေးသူငယ်များအပေါ် အကြမ်းဖက်မှုများကို ဆက်လက် ဆန့်ကျင်သွားမည်ဖြစ်ပြီး မဖူးပွင့်ဝေအတွက် မှန်ကန်သည့် တရားစီရင်မှု ရရှိသည်အထိ အဆုံးတိုင် ရပ်တည်သွားမည်ဖြစ်ကြောင်း ထုတ်ပြန်ထားသည်။
#MeKongNews
#တောင်ကြီးမြို့
#မဖူးပွင့်ဝေ
#တရားမျှတမှု
#IWU
#တောင်းဆို
