မဲခေါင်၊ မေ ၆
ရှမ်းပြည်တောင်ပိုင်း၊ ဆီဆိုင်မြို့တွင် အကျဉ်းကျခံနေရသူများ၏ ကိုယ်ရေးအချက်အလက်များကို အသုံးပြုကာ မိသားစုဝင်များထံမှ ငွေကြေးလိမ် လည်တောင်းခံမှုများ ရှိနေကြောင်း ဒေသခံများထံမှ သိရသည်။
လိမ်လည်သူများသည် အကျဉ်းသားများ၏ အမှုအမျိုးအစား၊ ချမှတ်ခံထားရသည့် ထောင်ဒဏ်နှစ်အရေအတွက်နှင့် ကျန်ရှိသည့် ကာလများအထိ သိရှိထားပြီး “လွတ်ငြိမ်းချမ်းသာ ခွင့်စာရင်းတွင် ပါဝင်စေရန်” သို့မဟုတ် “ကျန်းမာရေးအရေးပေါ်” ဟုဆိုကာ မိသားစုများထံ ဆက်သွယ်၍ ငွေတောင်းခံနေကြောင်း ဆိုသည်။
“သူတို့က ဘယ်သူ ဘယ်အမှုနဲ့ကျတယ်၊ ထောင်ဒဏ် ဘယ်လောက်ကျန်တယ် ဆိုတာအထိ ပြောနိုင်တယ်။ အဲလိုအသေးစိတ် သိထားတော့ မိသားစုတွေ ယုံသွားတာများတယ်” ဟု ဆီဆိုင် ဒေသခံတစ်ဦးက ပြောသည်။
သတင်းရင်းမြစ်များအရ ဆီဆိုင်မြို့ရှိ သီရိရပ်ကွက်နှင့် အောင်သပြေရပ်ကွက်မှ အကျဉ်းသားမိသားစုများကို ပစ်မှတ်ထား ဆက်သွယ်နေပြီး တချို့ကို ကျပ် ၇ သိန်းမှ ၉ သိန်းအထိ တောင်းခံကာ အချို့ဖြစ်စဉ်များတွင် ကျပ် ၁၅ သိန်းအထိ တောင်းခံခဲ့ကြောင်း သိရသည်။
ထို့ပြင် နိုင်ငံရေးအမှုဖြင့် အကျဉ်းကျခံနေရသူများ၏ မိသားစုများကိုလည်း “အကျဉ်းသား ကျန်းမာရေး မကောင်း၍ ဆေးရုံတင်ထားရသည်”၊ “ခွဲစိတ်ကုသရန် ငွေလိုအပ်သည်” စသည့် အကြောင်းပြချက်များဖြင့် ငွေလွှဲခိုင်းနေကြောင်း သိရသည်။
“တချို့မိသားစုတွေက အရေးကြီးတယ်ထင်ပြီး ချက်ချင်း ငွေလွှဲလိုက်ကြတယ်။ နောက်မှ ရဲစခန်းသွားမေးတော့ လိမ်တာဖြစ်နေတယ်”ဟု ဒေသခံတစ်ဦးက ဆိုသည်။
ဒေသခံအချို့က ယင်းဖြစ်စဉ်နှင့်ပတ်သက်၍ ရဲစခန်းနှင့် သက်ဆိုင်ရာအာဏာပိုင်များထံ သွားရောက် အတည်ပြုခဲ့ရာ အကျဉ်းသား လွတ်မြောက်ရေး၊ ကျန်းမာရေး အရေးပေါ်အတွက် ငွေတောင်းခံမှုများ မရှိကြောင်း ပြန်လည် ရှင်းလင်းထားသည်ဟု သိရသည်။
အကျဉ်းသားများ၏ ကိုယ်ရေးအချက်အလက်များ အလွန် အသေးစိတ် ပေါက်ကြားနေခြင်းကြောင့် အချက်အလက်များ အကျဉ်းထောင် သို့မဟုတ် သက်ဆိုင်ရာ စနစ်အတွင်းမှ ပေါက်ကြားလာနိုင်သည်ဟု ဒေသခံများက သံသယရှိနေကြသည်။
#MeKongNews
#ဆီဆိုင်
#အကျဉ်းသား
#မိသားစုများ
#လွတ်ငြိမ်းခွင့်
