မဲခေါင်၊ ဧပြီ ၆
အောင်ပန်းမြို့ရှိ “Happy City” ဂိမ်းဆိုင်ဖမ်းဆီးမှုတွင် ဖမ်းဆီးခံရသူများကို မြို့နယ်တရားသူကြီး ဒေါ်ယဉ်ငြိမ်းနုက လာဘ်ငွေသိန်းထောင်ချီ ရယူကာ ချုပ်ရက်တစ်လဖြင့် ပြန်လွှတ်ပေးခဲ့သဖြင့် ဒေသခံပြည်သူများအကြား ဝေဖန်မှုများ မြင့်တက်နေသည်။
ပြီးခဲ့သည့်နှစ်အတွင်းက အောင်ပန်းမြို့၊ ကွက်သစ်ရပ်ကွက်တွင် ကလေးကစားကွင်းအကြောင်းပြ၍ ဖွင့်လှစ်ထားသော ယင်းဂိမ်းဆိုင်ကို ဝင်ရောက်ဖမ်းဆီးရာ၌ ဒိုင်ချုပ် ဦးထွန်းစိန် (ခ) အားချင်နှင့် အလျော်အစားဒိုင် အမျိုးသမီး ၂ ဦး အပါအဝင် ထိုးသား ၈ ဦး၊ စုစုပေါင်း ၁၁ ဦး ဖမ်းဆီးခံခဲ့ရခြင်းဖြစ်ကြောင်း ဒေသခံများက ပြောသည်။
“သူတို့နဲ့ မရှေးမနှောင်းမှာပဲ မြို့ဟောင်းက အသုဘအိမ်မှာ ဖဲကူရိုက်တဲ့ အိမ်ရှင် ကိုမြင့်ရွှေကိုကျတော့ ထောင် တစ်နှစ်ချတယ်၊ ထိုးသားတွေကို ၆ လ ချတယ်။ အခု Happy City အမှုကျတော့ ဒိုင်ရော ထိုးသားရောကို ချုပ်ရက် တစ်လနဲ့ ဖြတ်ပြီး လွှတ်ပေးလိုက်တော့ ဥပဒေဆိုတာ ငွေပေးရင်တစ်မျိုး၊ မပေးရင်တစ်မျိုးလားလို့ အဲဒီတရားသူကြီးကို မေးချင်တယ်” ဟု အောင်ပန်းမြို့ဟောင်းရပ်ကွက်နေသူတစ်ဦးက မဲခေါင်သို့ ပြောသည်။
အဆိုပါအမှုတွင် ထိုးသား ၈ ဦးအနက် တစ်ဦးမှာ အာမခံကာလအတွင်း သေဆုံးသွားခဲ့ပြီး ကျန်ရှိသည့် ထိုးသား ၇ ဦးမှာ တစ်ဦးလျှင် ကျပ်သိန်း ၅၀ မှ ၇၀ အကြားနှင့် ဒိုင်များက ကျပ်သိန်း ၁,၀၀၀ ကျော်ကို တရားသူကြီးထံ ပေးခဲ့ကြကြောင်း အမှုနှင့်နီးစပ်သူများထံမှ သိရသည်။
ထို့ကြောင့် အာမခံကို ပြန်လည်ရုပ်သိမ်းကာ ရဲအချုပ်တွင် တစ်လထားရှိပြီးနောက်၊ ယင်းချုပ်ရက်ကို ထောင်ဒဏ် တစ်လအဖြစ် သတ်မှတ်ကာ ပြီးခဲ့သည့် မတ်လအတွင်းက ပြန်လည်လွှတ်ပေးခဲ့ခြင်း ဖြစ်သည်။
ဒေသခံများကမူ တရားသူကြီးအနေဖြင့် ဥပဒေကို ကိုယ်ကျိုးအတွက် အသုံးပြုခဲ့သည့်လုပ်ရပ်ကို ဖော်ထုတ်ရန်နှင့် တည်ဆဲဥပဒေအတိုင်း ထိထိရောက်ရောက် အရေးယူဆောင်ရွက်မှုမျိုးကိုသာ လိုလားကြောင်း ပြောဆိုကြသည်။
ထူးခြားချက်အနေဖြင့် စစ်ကောင်စီသည် တရားခွင်အတွင်း တရားသူကြီးများ မှန်မှန်ကန်ကန် ဆောင်ရွက်မည်ဟု ကျမ်းသစ္စာကျိန်ဆိုရသည့် ၁၅၃ နှစ်သက်တမ်းရှိ ထုံးတမ်းစဉ်လာကို ပြီးခဲ့သည့် မတ်လ ၁၉ ရက်တွင် ပယ်ဖျက်ခဲ့သည်။
“တရားခွင်မှာ တရားသူကြီးတွေ ကျမ်းမကျိန်ရတော့ဘူးဆိုရင် အမိန့်ချတဲ့နေရာတွေမှာ အဂတိတွေ ပိုများလာပြီး တရားသူကြီးတွေဟာ အရင်ကထက် ပိုပြီး လာဘ်စားကြတော့မှာပဲ” ဟု ဥပဒေကျွမ်းကျင်သူတစ်ဦးက သုံးသပ်ပြောဆိုသည်။
#MeKongNews
#အောင်ပန်းမြို့
#တရားသူကြီး
#လောင်းကစားမှု
#ဂိမ်းဆိုင်
