မဲခေါင်၊ ဖေဖော်ဝါရီ ၉
စစ်ကောင်စီက ပြန်လည် ထိန်းချုပ်ထားသည့် ရှမ်းပြည်မြောက်ပိုင်း၊ လားရှိုးမြို့တွင် ပြည်သူ့စစ်မှုထမ်းများ စတင် စုဆောင်းနေသည့်အပြင် စစ်ရေး ပြင်ဆင်မှုများလည်း ပြုလုပ်နေသဖြင့် သတိပြုကြရန် ပြည်သူအချင်းချင်း သတိပေးမှုများ ရှိနေကြောင်း မြို့ခံများထံမှ သိရသည်။
ပြီးခဲ့သည့် ဇန်နဝါရီ ၂၈ ရက်က မြို့ပေါ်ရပ်ကွက် ၁၂ ခုမှ တာဝန်ရှိသူများကို ခေါ်ယူ၍ ပြည်သူ့စစ်မှုထမ်းဆိုင်ရာ အစည်းအဝေး ပြုလုပ်ခဲ့သည်။
ထိုအစည်းအဝေးတွင် တစ်ရပ်ကွက်လျှင် သင်တန်းတစ်ပတ်စဉ်အတွက် လူ ၂ ဦးစီ စုဆောင်းပေးရန်နှင့် စစ်မှုထမ်းမည့် သူများအတွက် ထောက်ပံ့ငွေများ ထည့်ဝင်ကြရန် စစ်ကောင်စီ အုပ်ချုပ်ရေးပိုင်းက ညွှန်ကြားခဲ့ကြောင်း ဒေသခံများထံမှ သိရသည်။
“ငွေကောက်တာက ရပ်ကွက်တိုင်းတော့ မတူဘူး၊ တစ်သောင်းကနေ ၅ သောင်းအထိ လစဥ်ရှိတယ်။ လူမရရင် ဝယ်ထည့်ရမယ် ပြောတယ်၊ စာရင်းပါသူကတော့ ပိုထည့်ရမယ်”ဟု ရပ်ကွက်(၉) နေသူတစ်ဦးက မဲခေါင်သို့ ပြောသည်။
လက်ရှိတွင် စစ်မှုထမ်းခေါ်ယူရန် စစ်ကောင်စီက အသည်းအသန် ကြိုးပမ်းနေသည့်အပြင် အခြားသော စစ်ရေး ပြင်ဆင်မှုများလည်း ရှိနေသဖြင့် ဒေသခံပြည်သူများ အထူးသတိပြုရန် စစ်ရေးလေ့လာသူတစ်ဦးက သတိပေးထားသည်။
လက်ရှိမှာ တပ်စခန်း ပတ်ပတ်လည်ကို ကတုတ်ကျင်းတွေ သေချာတူးနေပြီး လက်နက်ကြီးတွေလည်း သေချာ ဆင်ထားပါတယ်။ ဌာနဆိုင်ရာရုံးတွေကို အကြီးစား ပြင်ဆင်မှုတွေ လုံးဝပြုလုပ်ခြင်း မရှိတာ၊ ဝန်ထမ်းတွေကိုလဲ သတိဝီရိယနဲ့နေဖို့ မှာကြားတာတွေ ရှိနေပါတယ်။ ညဖက်မှာ ဒရုန်းတွေနဲ့ တစ်မြို့လုံးကို စောင့်ကြည့်တာမျိုး၊ စစ်ရေးဆိုင်ရာ အားနည်းချက်တွေကို ပြင်ဆင်တဲ့နေရာမှာ ငွေအင်အား အဆမတန် သုံးစွဲတာမျိုးတွေ ရှိနေပါတယ်၊ ကျန်တဲ့အချက်တွေလဲ အများကြီး ရှိပါသေးတယ်။ ပြည်သူတွေအနေနဲ့ မပေါ့ဆကြဖို့ သတိပေးချင်တာပါ၊ အရေးအကြောင်းဆို ထွက်ပေါက်ပိတ်ပြီး ဒုက္ခရောက်မှာက ပြည်သူတွေ ဖြစ်နေလို့ပါ”ဟု ၎င်းက ဆိုသည်။
ဖေဖော်ဝါရီ ၇ ရက် နံနက်ပိုင်းကလည်း လားရှိုးမြို့၊ ရပ်ကွက် (၄) အတွင်းသို့ ရှော့တိုက်ဒုံးတစ်လုံး ကျရောက်ခဲ့သည့် ဖြစ်စဉ်ရှိခဲ့သည်။
လက်ရှိတွင် စစ်ကောင်စီနှင့် MNDAA တို့အကြား နယ်မြေ ပြန်လည်ပေးအပ်ရေးနှင့် နယ်စပ် ကုန်စည်စီးဆင်းမှု ကိစ္စရပ်များ ညှိနှိုင်းရာတွင် အဆင်မပြေမှုများ ရှိနေသည်။
ထို့ကြောင့် အချို့ နယ်မြေများမှ ဆုတ်ခွာသွားသည့် MNDAA တပ်ဖွဲ့ဝင်များမှာ ယခုအခါ နယ်မြေများတွင် ပြန်လည် တပ်စွဲလျက်ရှိကြောင်း သိရသည်။
#MeKongNews
#လားရှိုး
#စစ်မှုထမ်းကောက်
#စစ်ကောင်စီ
#စစ်ရေး
#ပြင်ဆင်
