မဲခေါင်၊ ဇန်နဝါရီ ၁
၂၀၂၀ ပြည့်နှစ် ရွေးကောက်ပွဲ ရလဒ်များကို ပယ်ဖျက်ပိုင်ခွင့် အခွင့်အာဏာ ဗိုလ်ချုပ်မှူးကြီး မင်းအောင်လှိုင်တွင် မရှိဘဲ၂၀၂၀ ပြည့်နှစ် ရွေးကောက်ပွဲ ရလဒ်သည် ပျက်ပြယ်မှုမရှိ တရားဝင်ဆဲ ဖြစ်သည်ဟု မြန်မာနိုင်ငံ ရှေ့နေများကောင်စီက ယမန်နေ့တွင် ထုတ်ပြန်သည်။
အများ ပြည်သူအပေါ် အစုအလိုက် အပြုံလိုက် ရက်စက်စွာ သတ်ဖြတ်မှုများအတွက် ဗိုလ်ချုပ်မှူးကြီး မင်းအောင်လှိုင်က တာဝန်ယူရမည် ဖြစ်ပြီး ၎င်းခန့်ထားသည့် ဦးသန်းစိုး ဥက္ကဌအဖြစ် တာဝန်ယူထားသည့် ရွေးကောက်ပွဲ ကော်မရှင်က အပိုင်း ၃ ပိုင်းခွဲ ကျင်းပသည့် ရွေးကောက်ပွဲနှင့် ပတ်သက်ပြီး ဥပဒေရေးရာ သုံးသပ်ချက်များအား ထုတ်ပြန်ချက်တွင် ပူးတွဲ ဖော်ပြထားသည်။
ယင်းထုတ်ပြန်ချက်တွင် အချက် ၉ ချက်ပါဝင်ရာ အဓိက အချက်များမှာ တရားမဝင် အာဏာသိမ်းပြီး တရားမဝင် ခန့်အပ်သည့်၊ တရားဝင်မှု မရှိသည့် ရွေးကောက်ပွဲ ကော်မရှင်က ကျင်းပသော ပါတီစုံဒီမိုကရေစီ အထွေထွေ ရွေးကောက်ပွဲသည် ပျက်ပြယ်ပြီးဖြစ်သည်ဟု ဖော်ပြထားသည်။
“အာဏာသိမ်းကတည်းက ၂၀၀၈ လည်း ပျက်ပြီးသား၊ တရားမဝင်တဲ့သူ လုပ်တာအားလုံး ဥပဒေကြောင်းအရ ဘာမှ အတည် မဖြစ်ဘူးလေ၊ ဒီတော့ ၂၀၂၀ ရွေးကောက်ပွဲ ရလဒ်ပဲ အတည်ဖြစ်နေဆဲ၊ ဦးဝင်းမြင့်ပဲ သမ္မတဖြစ်ဆဲ၊ ဒေါ် စုပဲ နိုင်ငံခေါင်းဆောင် ဖြစ်ဆဲပဲ”ဟု တရားလွှတ်တော် ရှေ့နေကြီးတစ်ဦးက ထုတ်ပြန်ချက်အပေါ် သုံးသပ်သည်။
ပြီးခဲ့သည့် ဒီဇင်ဘာ ၂၈ ရက်တွင် ကျင်းပခဲ့သည့် ပါတီစုံဒီမိုကရေစီ အထွေထွေ ရွေးကောက်ပွဲ အပိုင်း – ၁၊ ယခုလတွင် ကျင်းပမည့် ပါတီစုံဒီမိုကရေစီ အထွေထွေ ရွေးကောက်ပွဲ အပိုင်း ၂ နှင့် အပိုင်း – ၃ သည်လည်း မြန်မာ နိုင်ငံ၏ မည်သည့် ဥပဒေနှင့်မျှ တရားဝင်မှုမရှိဟု ထုတ်ပြန်ချက်က ဆိုသည်။
ထို့ပြင် ယင်းရွေးကောက်ပွဲများကြောင့် ပေါ်ပေါက်လာမည့် တိုင်းဒေသကြီး/ ပြည်နယ် လွှတ်တော်များ၊ ပြည်သူ့ လွှတ်တော်နှင့် အမျိုးသား လွှတ်တော်၊ ပြည်ထောင်စု လွှတ်တော်၊ ပြည်ထောင်စု အစိုးရတို့သည် တရားဝင်မှုမရှိဘဲ ဥပဒေမဲ့ အာဏာသိမ်း ခြင်းကြောင့် ဖြစ်ပေါ်လာသည့် နိုင်ငံတော် သစ္စာဖောက်ဖျက်၊ ပုန်ကန်မှုနှင့် ဆက်နွှယ်သော ရာဇဝတ်မှုများ ဖြစ်သည့်အပြင် တရားဥပဒေ စိုးမိုးရေးကို ဆန့်ကျင်၍ နိုင်ငံတော်နှင့် နိုင်ငံသားတို့အား ဥပဒေနှင့် ယဉ်ကျေးစွာ နေထိုင်ခြင်းထက် ဥပဒေမဲ့ ရိုင်းစိုင်းသည့် လူမှုဝန်းကျင်ကို ဖြစ်ပေါ်စေနိုင်ကြောင်း ထုတ်ပြန်ချက်တွင် ဖော်ပြထားသည်။
#MeKongNews
#ရွေးကောက်ပွဲ
#ရလဒ်
#တရားဝင်
#ရှေ့နေများကောင်စီ
