မဲခေါင်၊ ဒီဇင်ဘာ ၃၁
ပင်လောင်းမြို့နယ်တွင် ပအိုဝ်းပြည်သူ့စစ် – PNO က ဘိန်းခွန် တစ်အိမ် ကျပ် ၄ သိန်းထပ်မံ ကောက်ခံကြောင်း ဒေ သခံ တောင်သူများထံမှ သိရသည်။
ရှမ်းပြည်တောင်ပိုင်း၊ လိန်းညာ ကျေးရွာအုပ်စုရှိ လိန်းညာရွာ၊ တောင်လေးရွာ၊ တခါးယာဉ်ရွာ၊ ထိဗိ ကျေးရွာတို့တွင် ဒီဇင်ဘာ၂၈ ရက်က ကျေးရွာအသီးသီးရှိ ရွာသူကြီးအိမ်တွင် အစည်းအဝေး ခေါ်ယူပြီး ကောက်ခံခြင်းဖြစ်ပြီး မထည့်သောသူများ၏ ဘိန်းခင်းကို ဖျက်ဆီးမည်ဟုလည်း ခြိမ်းခြောက် ပြောဆိုကြောင်း ရွာခံများက ပြောသည်။
“ကောက်တာကလည်း ငါတို့အတွက် မဟုတ်ဘူး၊ ပင်လောင်းက ရဲတွေ မူးယစ်မှုတွေ တောင်းလို့ ကောက်တာ။ သူတို့ ဒီလို တောင်းတာကလည်း နင်တို့ အေးအေးချမ်းချမ်းနဲ့ လုပ်ကိုင်နိုင်ဖို့ သူတို့က တောင်းတာ။ တကယ်လို့ မထည့်ဘူးဆိုရင် ပြည်နယ်ကရဲတွေ စစ်သားတွေ လာဖျက်တဲ့ အချိန်ကျရင် ပိုက်ဆံမထည့်တဲ့ သူရဲ့ခြံနဲ့ နေအိမ်ကိုပြမယ်ဆိုပြီး ခြိမ်းခြောက် ပြီးတော့ကို ကောက်သွားတာ”ဟု ဒေသခံ တောင်သူတစ်ဦးက ပြောသည်။
လိန်းညာကျေး ရွာအုပ်စုတွင် ပြီးခဲ့သည် ဩဂုတ်လ ဘိန်းစတင် စိုက်ပျိုးချိန်တွင် တစ်အိမ်ကျပ် ၂ သိန်းကို ပအိုဝ်း PNO က တစ်နှစ်စာဟုဆိုကာ ကောက်ခံပြီးပြီ ဖြစ်သော်လည်း ယခုတွင် ၄ သိန်း ထပ်မံ ကောက်ခံသောကြောင့် ဒေသခံ တောင်သူများ အခက်ခဲ ဖြစ်ကြရသည် ဆိုသည်။
လိန်းညာ ကျေးရွာအုပ်စုရှိ ကျေးရွာများတွင် အိမ်ခြေ ၃ ထောင်ကျော်ရှိပြီး ဘိန်းစိုက်ပျိုးမှုကို အဓိက လုပ်ကိုင်ကာ ပင်လောင်း တစ်မြို့နယ်လုံး ဘိန်းအရည်အသွေးကောင်း ထွက်သော ကျေးရွာလည်း ဖြစ်ကြောင်းသိရသည်။
ယင်းကျေးရွာအုပ်စုတွင် ဘိန်းခွန်အပြင် ခေါင်းစဉ်အမျိုးမျိုးတပ်ပြီး လစဉ် ငွေသိန်းဂဏန်း PNO က ကောက်ခံနေ ကြောင်း ဒေသခံများထံမှ သိရသည်။
ပြီးခဲ့သည် ဒီဇင်ဘာလ ပထမပတ်တွင် နှင်းကျခြင်းကြောင့် ပင်လောင်းမြို့နယ်တွင် ဘိန်းခင်းဧက ၂ ထောင်နီးပါး ပျက်စီးသေးကြောင်း တောင်သူများက ပြောသည်။
#MeKongNews
#ပင်လောင်း
#PNO
#ဘိန်းခွန်
#ထပ်ကောက်
